المدونين القدامى

والله يامن ضيع معاك كل الحق في كل اللي قلته من طأطأ لريكا لكاظم بيه قصدي من طأطا لسلامو عليكو فبالنسبه للقراء خاصه الرجال ما بيهمهمش غير الكوره والسياسه او بقى الشباب السيس اللي عندهم احاسيس ودول بتوع الشات والسات والبنات ودول بالطبع مدونه زي دي قد تصيبهم بالغثيان واما الستات فيا اما بتدور على وصفات طبخ او وصفات للجمال او برضه بيدخلو على الشات والباقي معندهمش وقت او من كتر المشاكل اتسدت نفسهم حتى عن انهم يفضفضوا بيها في مدونه اما عن اصدقاء المدونه من المدونين القدامى فالله اعلم راحوا فين والغائب حجته معاه
اقوم انا الحق الروست بيف اللي بنتي حكمه عليا بيه يا تاخدو سندوتشات على المدرسه يا ترجع لي سندوتشاتها من غير ما تكلها.

تخاريف صيام

كل سنة وانتو طيبين وبعودة الايام .. انا بصراحه مستعجل وما كنتش عامل حسابي اكتب حاجه في المدونة المظلومه دي ، لكن لفت نظري حاجه شدتني للكتابة .. فتحت المدونة لقيت قدامي فيلم من بتوع الخلط بين الخيال والواقع والتاريخ والاسطورة .. لقيت ام العريف ماشيه لوحدها بين الاطلال والجبال والوديان ومن وقت للتاني بتصرخ وتقول حاجات مش مهم مضمونها ، المهم انها بتقولها عشان بس تتاكد انها هي نفسها لا تزال موجوده وانها ما فقدتش الامل في ان حد يسمعها ولو بالصدفه .. وكل ما تمشي اكتر وما تلاقيش حد رد عليها غير صدى الصوت طبعا، تقوم قايله حاجه جديدة .. وطبعا الاخت ام العريف تشكر اوي على اصرارها وتمسكها الشديد بالابقاء على حياة المدونه الي شكلها زي كتير من المشاريع والافكار العظيمه الرائعه اللي بتتولد كبيره ومبشره وشوية شوية الزمن بيلف عليها ويطويها تحت جناحه وبيخنقها لحد ما تموت .. المدونه كانت مسليه ومفيده جدا وكل اللي بيكتبو فها ليهم اسلوبهم الخاص والبسيط بخفة دم ما حصلتش وبعيدا عن البذائة والتجريح وقلة الادب وكان ممكن تكون من انجح المواقع واكثرها اجتذابا للقراء ، لكن الظاهر ان القارئ ما يعرفش ييجي لوحده ، يعني لازم دعايه وحتى لما ييجي ما بيكلفش خاطره ويشارك ولو بكلمة تشجيع او راي مهما كان .. بيبص ويمشي حتى لو عجبه الموقع اوي وما بيقدرش انه الموقع اللي عجبه ده عشان يستمر فهو محتاج مساعدته ، والحكاية لا تتعدى تعليق بسيط ممكن يكتبه في دقايق مش اكتر بس نتيجته بتكون كبيره اوي ويمكن تكون الحد الفاصل بين بقاء المدونة او فنائها .. على كل حال بكرر شكري للسيدة ام العريف واحيي فيها الاصرار وقوة الارادة وتبنيها اللامحدود لهذه المدونة اللي شكلها حتى اهلها الاصليين اتبرو منها ورموها امام اول جامع في سكتهم والاخت ام العريف الله يسترها لقتها وخدتها وحنت عليها .. زي الافلام العربي القديمة .. وعلى فكره الدنيا كانت مطر شديد وغيم وبرق ورعد لما لقتها امام الجامع . عشان تصدقو انه فيلم عربي يعني . وكل سنة وانت طيبة يا ام العريف وجزاك الله عن الصحافة والادب خيرا .. وبالمناسبة تخاريف الصيام دي مش صدى صوتك .. ده فعلا في واحد تاني رد عليكي واعلن تضامنه معك في رعاية وتبني المدونة المظلومه اللي لو بتعرف تتكلم كان هي اللي فضفضت من اللي بتقاسيه من القراء والكتاب على حد سواء .. وعلى راي الشاعر الفارس العبد الامير ( شوفو التناقض ) عنترة العبسي .. اللي كان التايتل الرسمي بتاعه ( اسد الآساد وحية بطن الواد ، الامير عنتر ابن الامير شداد ) .. على راي عنتر ده وفي معرض وصفه لجواده الابجر في المعركة قال .. فأزور من وقع القنا بلبانه . . وشكى الى بعبرة وتحمحمي . .. لو كان يدري ما المحاورة اشتكى .. ولكان لو علم الكلام مكلمي .. .... اما غريمه وخصمه ومنافسه على حب عبلة ، الامير عمارة الزيادي فقد قال .. يا ولد هات العطر .. بس يعني بالمناسبة في حاجه لفتت نظري دلوقت .. مين قال ان عبله كان اسمها عبله ، يعني كانت بتتنطق زي ما احنا بننطقها دلوقت بفتح العين وتسكين الباء وفتح اللام ؟؟ مش يمكن كانو بيقولوها بضم العين وتسكين الباء وفتح الللام . او بكسر العين ؟؟ او حتى بفتح العين وفتح الباء كمان يعني َعَبله ، ومنها اشتق العبل بفتح العين والباء وهذا هو الاقرب حيث ان الامير عمارة الزيادي كان موافقا على اخذها بعبلها كده ، يعني رغم حبها لعنترة والمشكوك فيه اصلا حيث انها من الاقرب الى المنطق كانت بتستغله في تنفيذ الاطماع العسكرية لعشيرتها باعتباره من اسلحة الدمار الشامل في ذلك الوقت ؟
معلش ، الجزء الاخير ده هو اللي تخاريف صيام .. بس برضه تضامنا مع الاخت ام العريف وفي سياق رعاية وتبني مدونة فضفضة اللي لازم يغيرو اسمها الى محتاجه فضفضة .. وكل عام وانتم بخير .

للمهتمين بالتطريز

في موقع عربي يا جماعه في مجال شغل الابره التريكو والكروشيه وبيشرح كل حاجه في المجال ده من الالف للياء وانا ولاول مره الاقي حاجه عربي في المجال ده والموقع هو www.sarahknit.com يا رب يعجبكم

رمضان كريم

رمضان كريم وكل عام وانتم بألف خير ويتم علينا وعليكم واحنا مؤديين فروضنا على اتم وجه وختمنا القرآن الكريم اكتر من مره ويارب يبلغنا ليلة القدر ونحسن دعائنا فيها

المرحوم فانوس

تحياتي للجميع وبالاخص من ضيع وبقوله الله يسلمك ومايحطكش في ضيقه
نزلت يا جماعه امبارح اجيب حاجات رمضان كل سنه وانتوا بخير هي الصراحه مش حاجه رمضان اوي يعني هي لوازم البيت العاديه بس في رمضان بعمل حسابي اجيب حاجاتي بدري قبل هجوم التتار لان في حاجات على الاواخر مش بلاقيها وانا يدوب بيزيد عندي في رمضان شويه ياميش وقمر الدين خاصة اننا مش اكيله اوي اهو بس تغيير الواحد يحس بيه في دخلة الشهر الكريم وبالطبع رحت اشتري فانوس لبنتي وهالني ما رايت !! مالقتش ولا اي حاجه تشبه حتى من بعيد للمرحوم فانوس رمضان لقيت يا اما ابريق على هيئة مصباح علاء الدين او شخصيات ديزني وبتجري على الارض وماسكه في ايدها فانوس صغير يادوب يرى بالعين المجرده ولعبه على شكل طفله قاعده على كرسي هزاز قال وبرضه على رجلها ميكرو فانوس ويشترك الجميع في ان الميكروفانوس بينور وكلهم بيغنوا وبكل نشاز اغنية حاللو يا حاللو او رمضان جانا وطبعا ما اشتريتش اي حاجه لاني ماكنتش عاوزه لعبه رديئه لبنتي انا كنت عاوزه فانوس لكن للفقيد الرحمه ولنا خالص العزاء

بجد الف حمد لله على سلامتكو

بصراحه انتو اتكتبلكو عمر جديد .. انا شخصيا تعرضت لمواقف زي دي في حياتي كتير .. وكانت كلها بالصدفه وبدون مقدمات . يعني مرة مثلا كنت مسافر ومعايا الاسره من الكويت الى السعودية . في الطريق وبدون سبب مقنع دخلت في طريق فرعي مع انه الطريق الرئيسي هناك ما بيتوهش وبيقول للاعمى اديني .. لحد هنا ومش اشكال .. لما اكتشفت اني بقيت في مجاهل الصحراء والاسفلت بأه ضيق والرمل مغطيه قلت ما بدهاش ، ارجع احسن .. ويادوبك لفيت بالعربية وبقول يا هدي ، العربية وقفت وبقت لا بتصد ولا بترد .. نزلت وفتحت الكبود وعملت كل المحاولات العشوائيه اللي الناس اللي مالهاش دعوة بالميكانيك بتعملها وبتفتكر في النهاية انها السبب في تشغيل العربيه من تاني .. العربية كان واضح انها مفيهاش كهربا خالص يعني مستحيل تدور .. طب اعمل ايه ؟؟ المهم مفيش صريخ ابن يومين في المنطقه ولا اي سيارات معديه ولا حتى معزه او خروف او جمل بيرعو هناك .. طيب اسيب زوجتي والعيال في السياره وامشي لحد الطريق الرئيسي احاول استدعاء نجده ، ولا افضل انا عند السياره والعيال واسيب المدام هي اللي تروح .. طبعا هما امران احلاهما مر وخطر ويودي في ستين داهيه في اماكن زي دي .. ماطولش عليكو ومفيش داعي اوصف المعاناه والخوف الشديد والقلق لانكو بالتاكيد متوقعينه وحاسينه .. المهم فجأه انشقت الصحرا عن عربيه نص نقل صغيره ونزل منها راجل والست بتاعته .. الاتنين متلتمين ، هي بحكم انها امرأه ولازم تخفي ماظهر منها وما بطن ، وهو بحكم العوامل الجويه ولاتقاء الريح والغبار .. كل اللي فهمته منه انه مفيش فايده العربيه تدور ولا حد يمر من هنا واني في طريق فرعي الى مضارب قبيله معرفش ايه وهي دي السياره الوحيده اللي يمكن تمر من هنا في ذلك اليوم .. طب والحل .. نزلت تاني تحت العربيه وانا خوفي مضاعف لانه زاد عليه الان الخوف من الراجل ومراته اللي ما بيعملوش اي حاجه غير انهم بيحركو عيونهم من خلف اللثام بطريقه مريبه شمال ويمين .. والحمد لله انه ما كنش الموبايل منتشر في ذلك الوقت كان الله اعلم الراجل المريب ده عمل ايه ومين الناس اللي كان حيستدعيهم ولعمل ايه بالظبط .. المهم .. فجأه وبدون مبرر برضه وانا بحرك في الاسلاك اللي قدامي في اسفل الموتور ، العربيه نورت ، يعني الكهربا رجعت .. نطيت من فرحتي وشغل الموتور قامت اشتغلت .. وانتهت المغامره على خير .. وعلى فكره انا حكيتها باختصار شديد لاني مستعجل ، بس الحقيقه هي تاخدلها فيلم كامل او قصة قصيره او حتى طويله لوصف تلك اللحظات العصيبه والغير مبرره والتي يرتبها القدر ولا اجدعها كاتب او مخرج واحنا بنكون فيها مجرد كومبارس مش اكتر .. واحيانا كومبارس صامت .
المهم الف حمد لله على سلامتك وسلامة الاسرة يا اخت ام العريف ولعله خير يا ستي

خلف الاسوار

انا رجعت لقواعدي اقصد رجعت من شرم وكان الرجوع متعب جدا لان حصل لنا في الطريق فصل بايخ جدا حيث نامت مننا العجله وراحت في سبات عميق والمقلب الصح لما جوزي جه يغيرها حيث اتقطم منه الكريك وهو بيحاول يرفع العربيه عشان يغير الكاوتش وكنا طبعا على الطريق في الصحرا حاول جوزي يوقف اي عربيه يستلف منها كريك لكن لا حياة لمن تنادي ما حدش وقف غير اتنين كانوا على موتوسيكل وهو اصلا ما حاولش يناديهم من اصله لانهم بالطبع معهمش كريك ولما عرفوا المشكله اقترحوا انهم يرفعوا العربيه بايديهم ويحطوا تحتها طوبه يسندوها ويغيروا الكاوتش وبصراحه انا كنت في غاية القلق والتوتر اصلي بتاثر اوي ببرنامج خلف الاسوار اللي بقى دلوقتي الجريمه في اسبوع كان في حوادث قتل كتير بتحصل بالمصادفه وفي ظروف احسن من اللي كنا فيها وفي الآخر القاتل تلاقيه طلعلوا ب 200 جنيه مثلا!! آه والله اما احنا وقتها بصراحه كنا في ظروف نموذجيه لتنفيذ جريمه طريق سريع وصحرا ووقت داخل على المغرب وهما اتنين واحنا يدوب انا وجوزي وبنتي لأ وكل ما يحاول جوزي يوقف عربيه الراجل يقوله ما تحاولش ماحدش هيقفلك هنا والمنطقه دي لما الليل يدخل بتلاقيها كلها عرب قطاع طرق وهو يقول كده وانا اقلق منه اكثر خاصة انه هو واللي معاه كانوا ما بيعملوش حاجه فعليا غير انهم بيضيعوا وقت في اللا شيء لغاية ما انفك الكرب ووقف لنا واحد ابن حلال بعربيتوا واطمنت اكتر لما لقيت جنبه واحده فعلا شميت نفسي الله يعمر بيته ويباركله اللي كنت مستغرباله جدا اننا قبل ما نطلع على الطريق كشفنا على الكاوتش في البنزينه يقى ازاى العامل ما اخدش باله !!؟؟؟؟؟؟
طلع ان العامل ده هو نفسه سبب الكارثه لان جوزي قالي انه كان متابعه وهو بيزود التلات عجلات وقبل العجله الرابعه جوزي استعجل واداله الفلوس وركب العربيه ولاحظ نظره امتعاض من العامل تدل على عدم رضاه عن الاجر اللي خده وترجم ده عمليا بأنه خرم الكاوتش واللي خلا جوزي يتأكد من كده ان العجله اللي نامت دي الوحيده اللي ما دخلهاش اي مسمار قبل كده بخلاف زميلاتها اللي كل واحده استضافت فيما سبق مسمار او اكتر
تخيلوا ! عشان جنيه ولا اتنين زياده نتبهدل كل البهدله دي واللي حصل لنا كان احسن سيناريو على الاطلاق كان ممكن نفضل كام ساعه على الطريق ومحدش يقف لنا كان ممكن العربيه تتقلب بينا كان ممكن سيناريوهات كتير سيئه تحصل هقول ايه ناس كلها سواد وحسبي الله ونعم الوكيل