مساء الخير....
في الاول احب اوضح حاجة مهمة ... المدونة دي مش معمولة للكلام في السياسة ولا في الكورة , المدونة دي معمولة لينا احنا البنات والستات اللي زهقوا وعايزين يفضفضو وحسو انه خلاص مينفعش يشتكو او يحكو للي حواليهم لآنهم شكو كثير وحكو اكثر ومبقاش ينفع يحرجو نفسهم اكثر من كده ... المدونة دي لكل واحدة حاسة ان في حاجة نقصاها ومش عارفة هي ايه,لكل واحدة بتدخل علي النت وهي مش عارفة هي عايزة تلاقي ايه حل لمشكلتها ولا حاجة تفرحها ولا حد عنده نفس حالتها و يمكن يواسيها وتبقي عملت بمقولة من شاف بلاوي الناس تهون عليه بلوته , ولكل واحدة حاسة انها كان نفسها تبقي حاجة ومقدرتش او كان نفسها تعمل حاجة ومعرفتش ... لكل بنت وست كان ليها احلام في حياتها معرفتش تحققها ,, المدونة دي انا عملتها علشان كل واحدة تدخل تكتب اللي نفسها فيه ,مش لازم يكون الكلام مترتب او باللغة العربية الفصحي ,كل واحدة تكتب اي حاجة كان نفسها تقولها , كل واحدة تدخل تفش غيظها اللي مش قادرة تفشو في اللي حواليها,, اللي عايزة تتخانق مع جوزها تقصر الشر وتيجي تكتب كل اللي كانت عايزة تقوله ليه هنا يمكن تحس بتحسن,اللي حاسة انها مكبوته من اهلها ونفسها تزعق فيهم تيجي تقول اللي كانت هتقوله ليهم..اللي حاسة انها اتظلمت من اهلها او من جوزها او من الدنيا تقول يمكن لما تحكي تبقي احسن
. اللي انا اقصده من المدونة دي ان كلنا نتكلم قبل ما نفرقع كل واحدة تقول اللي هي عايزاه مش ضروري ترد علي كلام اللي قبلها, ومش لازم يكون كلامها ليه علاقة بالموضوع اللي قبله,ومش لازم كلامها يبتدي مساء الخير او صباح الخير او السلام عليكم,
المهم انها تقول اللي في نفسها... وانا عن نفسي هقول اللي في نفسي وكله علي الله....
استعنا علي الشقي بالله.....
