المدونين القدامى

والله يامن ضيع معاك كل الحق في كل اللي قلته من طأطأ لريكا لكاظم بيه قصدي من طأطا لسلامو عليكو فبالنسبه للقراء خاصه الرجال ما بيهمهمش غير الكوره والسياسه او بقى الشباب السيس اللي عندهم احاسيس ودول بتوع الشات والسات والبنات ودول بالطبع مدونه زي دي قد تصيبهم بالغثيان واما الستات فيا اما بتدور على وصفات طبخ او وصفات للجمال او برضه بيدخلو على الشات والباقي معندهمش وقت او من كتر المشاكل اتسدت نفسهم حتى عن انهم يفضفضوا بيها في مدونه اما عن اصدقاء المدونه من المدونين القدامى فالله اعلم راحوا فين والغائب حجته معاه
اقوم انا الحق الروست بيف اللي بنتي حكمه عليا بيه يا تاخدو سندوتشات على المدرسه يا ترجع لي سندوتشاتها من غير ما تكلها.

تخاريف صيام

كل سنة وانتو طيبين وبعودة الايام .. انا بصراحه مستعجل وما كنتش عامل حسابي اكتب حاجه في المدونة المظلومه دي ، لكن لفت نظري حاجه شدتني للكتابة .. فتحت المدونة لقيت قدامي فيلم من بتوع الخلط بين الخيال والواقع والتاريخ والاسطورة .. لقيت ام العريف ماشيه لوحدها بين الاطلال والجبال والوديان ومن وقت للتاني بتصرخ وتقول حاجات مش مهم مضمونها ، المهم انها بتقولها عشان بس تتاكد انها هي نفسها لا تزال موجوده وانها ما فقدتش الامل في ان حد يسمعها ولو بالصدفه .. وكل ما تمشي اكتر وما تلاقيش حد رد عليها غير صدى الصوت طبعا، تقوم قايله حاجه جديدة .. وطبعا الاخت ام العريف تشكر اوي على اصرارها وتمسكها الشديد بالابقاء على حياة المدونه الي شكلها زي كتير من المشاريع والافكار العظيمه الرائعه اللي بتتولد كبيره ومبشره وشوية شوية الزمن بيلف عليها ويطويها تحت جناحه وبيخنقها لحد ما تموت .. المدونه كانت مسليه ومفيده جدا وكل اللي بيكتبو فها ليهم اسلوبهم الخاص والبسيط بخفة دم ما حصلتش وبعيدا عن البذائة والتجريح وقلة الادب وكان ممكن تكون من انجح المواقع واكثرها اجتذابا للقراء ، لكن الظاهر ان القارئ ما يعرفش ييجي لوحده ، يعني لازم دعايه وحتى لما ييجي ما بيكلفش خاطره ويشارك ولو بكلمة تشجيع او راي مهما كان .. بيبص ويمشي حتى لو عجبه الموقع اوي وما بيقدرش انه الموقع اللي عجبه ده عشان يستمر فهو محتاج مساعدته ، والحكاية لا تتعدى تعليق بسيط ممكن يكتبه في دقايق مش اكتر بس نتيجته بتكون كبيره اوي ويمكن تكون الحد الفاصل بين بقاء المدونة او فنائها .. على كل حال بكرر شكري للسيدة ام العريف واحيي فيها الاصرار وقوة الارادة وتبنيها اللامحدود لهذه المدونة اللي شكلها حتى اهلها الاصليين اتبرو منها ورموها امام اول جامع في سكتهم والاخت ام العريف الله يسترها لقتها وخدتها وحنت عليها .. زي الافلام العربي القديمة .. وعلى فكره الدنيا كانت مطر شديد وغيم وبرق ورعد لما لقتها امام الجامع . عشان تصدقو انه فيلم عربي يعني . وكل سنة وانت طيبة يا ام العريف وجزاك الله عن الصحافة والادب خيرا .. وبالمناسبة تخاريف الصيام دي مش صدى صوتك .. ده فعلا في واحد تاني رد عليكي واعلن تضامنه معك في رعاية وتبني المدونة المظلومه اللي لو بتعرف تتكلم كان هي اللي فضفضت من اللي بتقاسيه من القراء والكتاب على حد سواء .. وعلى راي الشاعر الفارس العبد الامير ( شوفو التناقض ) عنترة العبسي .. اللي كان التايتل الرسمي بتاعه ( اسد الآساد وحية بطن الواد ، الامير عنتر ابن الامير شداد ) .. على راي عنتر ده وفي معرض وصفه لجواده الابجر في المعركة قال .. فأزور من وقع القنا بلبانه . . وشكى الى بعبرة وتحمحمي . .. لو كان يدري ما المحاورة اشتكى .. ولكان لو علم الكلام مكلمي .. .... اما غريمه وخصمه ومنافسه على حب عبلة ، الامير عمارة الزيادي فقد قال .. يا ولد هات العطر .. بس يعني بالمناسبة في حاجه لفتت نظري دلوقت .. مين قال ان عبله كان اسمها عبله ، يعني كانت بتتنطق زي ما احنا بننطقها دلوقت بفتح العين وتسكين الباء وفتح اللام ؟؟ مش يمكن كانو بيقولوها بضم العين وتسكين الباء وفتح الللام . او بكسر العين ؟؟ او حتى بفتح العين وفتح الباء كمان يعني َعَبله ، ومنها اشتق العبل بفتح العين والباء وهذا هو الاقرب حيث ان الامير عمارة الزيادي كان موافقا على اخذها بعبلها كده ، يعني رغم حبها لعنترة والمشكوك فيه اصلا حيث انها من الاقرب الى المنطق كانت بتستغله في تنفيذ الاطماع العسكرية لعشيرتها باعتباره من اسلحة الدمار الشامل في ذلك الوقت ؟
معلش ، الجزء الاخير ده هو اللي تخاريف صيام .. بس برضه تضامنا مع الاخت ام العريف وفي سياق رعاية وتبني مدونة فضفضة اللي لازم يغيرو اسمها الى محتاجه فضفضة .. وكل عام وانتم بخير .

للمهتمين بالتطريز

في موقع عربي يا جماعه في مجال شغل الابره التريكو والكروشيه وبيشرح كل حاجه في المجال ده من الالف للياء وانا ولاول مره الاقي حاجه عربي في المجال ده والموقع هو www.sarahknit.com يا رب يعجبكم

رمضان كريم

رمضان كريم وكل عام وانتم بألف خير ويتم علينا وعليكم واحنا مؤديين فروضنا على اتم وجه وختمنا القرآن الكريم اكتر من مره ويارب يبلغنا ليلة القدر ونحسن دعائنا فيها

المرحوم فانوس

تحياتي للجميع وبالاخص من ضيع وبقوله الله يسلمك ومايحطكش في ضيقه
نزلت يا جماعه امبارح اجيب حاجات رمضان كل سنه وانتوا بخير هي الصراحه مش حاجه رمضان اوي يعني هي لوازم البيت العاديه بس في رمضان بعمل حسابي اجيب حاجاتي بدري قبل هجوم التتار لان في حاجات على الاواخر مش بلاقيها وانا يدوب بيزيد عندي في رمضان شويه ياميش وقمر الدين خاصة اننا مش اكيله اوي اهو بس تغيير الواحد يحس بيه في دخلة الشهر الكريم وبالطبع رحت اشتري فانوس لبنتي وهالني ما رايت !! مالقتش ولا اي حاجه تشبه حتى من بعيد للمرحوم فانوس رمضان لقيت يا اما ابريق على هيئة مصباح علاء الدين او شخصيات ديزني وبتجري على الارض وماسكه في ايدها فانوس صغير يادوب يرى بالعين المجرده ولعبه على شكل طفله قاعده على كرسي هزاز قال وبرضه على رجلها ميكرو فانوس ويشترك الجميع في ان الميكروفانوس بينور وكلهم بيغنوا وبكل نشاز اغنية حاللو يا حاللو او رمضان جانا وطبعا ما اشتريتش اي حاجه لاني ماكنتش عاوزه لعبه رديئه لبنتي انا كنت عاوزه فانوس لكن للفقيد الرحمه ولنا خالص العزاء

بجد الف حمد لله على سلامتكو

بصراحه انتو اتكتبلكو عمر جديد .. انا شخصيا تعرضت لمواقف زي دي في حياتي كتير .. وكانت كلها بالصدفه وبدون مقدمات . يعني مرة مثلا كنت مسافر ومعايا الاسره من الكويت الى السعودية . في الطريق وبدون سبب مقنع دخلت في طريق فرعي مع انه الطريق الرئيسي هناك ما بيتوهش وبيقول للاعمى اديني .. لحد هنا ومش اشكال .. لما اكتشفت اني بقيت في مجاهل الصحراء والاسفلت بأه ضيق والرمل مغطيه قلت ما بدهاش ، ارجع احسن .. ويادوبك لفيت بالعربية وبقول يا هدي ، العربية وقفت وبقت لا بتصد ولا بترد .. نزلت وفتحت الكبود وعملت كل المحاولات العشوائيه اللي الناس اللي مالهاش دعوة بالميكانيك بتعملها وبتفتكر في النهاية انها السبب في تشغيل العربيه من تاني .. العربية كان واضح انها مفيهاش كهربا خالص يعني مستحيل تدور .. طب اعمل ايه ؟؟ المهم مفيش صريخ ابن يومين في المنطقه ولا اي سيارات معديه ولا حتى معزه او خروف او جمل بيرعو هناك .. طيب اسيب زوجتي والعيال في السياره وامشي لحد الطريق الرئيسي احاول استدعاء نجده ، ولا افضل انا عند السياره والعيال واسيب المدام هي اللي تروح .. طبعا هما امران احلاهما مر وخطر ويودي في ستين داهيه في اماكن زي دي .. ماطولش عليكو ومفيش داعي اوصف المعاناه والخوف الشديد والقلق لانكو بالتاكيد متوقعينه وحاسينه .. المهم فجأه انشقت الصحرا عن عربيه نص نقل صغيره ونزل منها راجل والست بتاعته .. الاتنين متلتمين ، هي بحكم انها امرأه ولازم تخفي ماظهر منها وما بطن ، وهو بحكم العوامل الجويه ولاتقاء الريح والغبار .. كل اللي فهمته منه انه مفيش فايده العربيه تدور ولا حد يمر من هنا واني في طريق فرعي الى مضارب قبيله معرفش ايه وهي دي السياره الوحيده اللي يمكن تمر من هنا في ذلك اليوم .. طب والحل .. نزلت تاني تحت العربيه وانا خوفي مضاعف لانه زاد عليه الان الخوف من الراجل ومراته اللي ما بيعملوش اي حاجه غير انهم بيحركو عيونهم من خلف اللثام بطريقه مريبه شمال ويمين .. والحمد لله انه ما كنش الموبايل منتشر في ذلك الوقت كان الله اعلم الراجل المريب ده عمل ايه ومين الناس اللي كان حيستدعيهم ولعمل ايه بالظبط .. المهم .. فجأه وبدون مبرر برضه وانا بحرك في الاسلاك اللي قدامي في اسفل الموتور ، العربيه نورت ، يعني الكهربا رجعت .. نطيت من فرحتي وشغل الموتور قامت اشتغلت .. وانتهت المغامره على خير .. وعلى فكره انا حكيتها باختصار شديد لاني مستعجل ، بس الحقيقه هي تاخدلها فيلم كامل او قصة قصيره او حتى طويله لوصف تلك اللحظات العصيبه والغير مبرره والتي يرتبها القدر ولا اجدعها كاتب او مخرج واحنا بنكون فيها مجرد كومبارس مش اكتر .. واحيانا كومبارس صامت .
المهم الف حمد لله على سلامتك وسلامة الاسرة يا اخت ام العريف ولعله خير يا ستي

خلف الاسوار

انا رجعت لقواعدي اقصد رجعت من شرم وكان الرجوع متعب جدا لان حصل لنا في الطريق فصل بايخ جدا حيث نامت مننا العجله وراحت في سبات عميق والمقلب الصح لما جوزي جه يغيرها حيث اتقطم منه الكريك وهو بيحاول يرفع العربيه عشان يغير الكاوتش وكنا طبعا على الطريق في الصحرا حاول جوزي يوقف اي عربيه يستلف منها كريك لكن لا حياة لمن تنادي ما حدش وقف غير اتنين كانوا على موتوسيكل وهو اصلا ما حاولش يناديهم من اصله لانهم بالطبع معهمش كريك ولما عرفوا المشكله اقترحوا انهم يرفعوا العربيه بايديهم ويحطوا تحتها طوبه يسندوها ويغيروا الكاوتش وبصراحه انا كنت في غاية القلق والتوتر اصلي بتاثر اوي ببرنامج خلف الاسوار اللي بقى دلوقتي الجريمه في اسبوع كان في حوادث قتل كتير بتحصل بالمصادفه وفي ظروف احسن من اللي كنا فيها وفي الآخر القاتل تلاقيه طلعلوا ب 200 جنيه مثلا!! آه والله اما احنا وقتها بصراحه كنا في ظروف نموذجيه لتنفيذ جريمه طريق سريع وصحرا ووقت داخل على المغرب وهما اتنين واحنا يدوب انا وجوزي وبنتي لأ وكل ما يحاول جوزي يوقف عربيه الراجل يقوله ما تحاولش ماحدش هيقفلك هنا والمنطقه دي لما الليل يدخل بتلاقيها كلها عرب قطاع طرق وهو يقول كده وانا اقلق منه اكثر خاصة انه هو واللي معاه كانوا ما بيعملوش حاجه فعليا غير انهم بيضيعوا وقت في اللا شيء لغاية ما انفك الكرب ووقف لنا واحد ابن حلال بعربيتوا واطمنت اكتر لما لقيت جنبه واحده فعلا شميت نفسي الله يعمر بيته ويباركله اللي كنت مستغرباله جدا اننا قبل ما نطلع على الطريق كشفنا على الكاوتش في البنزينه يقى ازاى العامل ما اخدش باله !!؟؟؟؟؟؟
طلع ان العامل ده هو نفسه سبب الكارثه لان جوزي قالي انه كان متابعه وهو بيزود التلات عجلات وقبل العجله الرابعه جوزي استعجل واداله الفلوس وركب العربيه ولاحظ نظره امتعاض من العامل تدل على عدم رضاه عن الاجر اللي خده وترجم ده عمليا بأنه خرم الكاوتش واللي خلا جوزي يتأكد من كده ان العجله اللي نامت دي الوحيده اللي ما دخلهاش اي مسمار قبل كده بخلاف زميلاتها اللي كل واحده استضافت فيما سبق مسمار او اكتر
تخيلوا ! عشان جنيه ولا اتنين زياده نتبهدل كل البهدله دي واللي حصل لنا كان احسن سيناريو على الاطلاق كان ممكن نفضل كام ساعه على الطريق ومحدش يقف لنا كان ممكن العربيه تتقلب بينا كان ممكن سيناريوهات كتير سيئه تحصل هقول ايه ناس كلها سواد وحسبي الله ونعم الوكيل

بين شطين وميه

ايه يا اخواننا رحتوا فين يا ناس يا عالم يا بتوع المدونه حد يرد عليا ولا انتوا جبتوا ضرفها ولا ايه؟ انا بالنسبه لي كان بقالي فتره صحتي مش ولابد ونحمد الله على كل شيء انا احسن دلوقتي
على العموم انا لقيت نفسي رايقه وفاضيه حبتين قلت ادخل وامسي اصلي عقبال عند الحبايب بصيف في شرم والقعده مش ناقصها غيركم
على العموم انا مستنيه اخباركم

سبحان الذي سخر لنا هذا ..

نحمد الله حمدا كثيرا ونشكره على فضله ونعمته بان جعل ام العريف تعترف بان لنا فايده في هذه الدنيا ، اي فايده مش مهم .. والحمد لله ايضا انني انا شخصيا رغم عدم معرفتي بلعبة الشطرنج ، وعدم اتقاني لطاولة الزهر وبدليل موشح خالتي دوسة ودرجها ونظرها اللي شيش بيش ، الا انني لا ازال مسليا للست ام العريف ، ده طبعا في اوقات الهم والغم لما جوزها بيكون مش قادر او مش فاضي يفسحها ويسليها وبتكون جارتها وبنتها طفشانين منها . يا ستي مش اشكال ، عايزه تتسلي علينا ماشي ، بس سيبك من التحقيقات الفدرالية اللي كل شويه عاملاها معانا ومصره انه انا بالذات فاهم تهمتي وعارف جنايتي كويس اوي بس بأستعبط .. والنبي انتي شكلك كده من بتوع كلم الباشا عدل ياد !! والحمد لله للمره الالف اني بعيد عنك والحكايه قاصره على الكلام وبس ، يعني كتابه في كتابه وكان الله يحب المحسنين ، وعمرها ما حتبقى ملك ابدا ، ولو انه منصب الملكه اصبح شاغرا برحيل الاخت مولاتي الى الاسماعيليه اللي شكلها خارج نطاق التغطية . وبيني وبينكو شكلها تلكيكه من الملكة السابقة ، بس معلش كل واحد وظروفه بأه . على كل الاحوال انا عايز الاخت ام العريف ما تقلقش ابدا ، يعني احنا تحت امرها في اي تسليه ولا الحوجة للب ولا السوداني ، بس ما تكنش دي احدى وسائل انتزاع الاعترافات من المتهم اللي ما عملش حاجه ، اصله بحر الاستخبارات والتحقيقات ده غميق اوي وما لوش قرار .. وام العريف باينها عميلة مخضرمه ومتوتكه اوي ولا تقولي كولومبو ولا كوجاك ولا حتى يسري بيه .. مين يسري بيه ؟ انتي روحي مديريه الامن واسألي وهم حيقولولك بالتاكيد

اقل حاجه عندي

يا جماعه انا والله وضحت سؤالي كويس وانا متأكده مليون في الميه ان من ضيع فاهم سؤالي كويس وده باين اصلا من كلامه على العموم مش مشكله انا متنازله عن حق الرد
انا مبسوطه النهارده علشان سمعت خبر حلو عقبال عند الجميع يا رب رغم اني وكالعاده بمر بوعكه صحيه بس ده العادي بتاعي يعني زي ما بيقولو اقل حاجه عندي
اكتر حاجه غيظاني النهارده ان النهارده الخميس وطبعا بكره الجمعه هتقولولي وفيها ايه ؟ هقولوكوا ان قناة ال (mbc) وللاسف الشديد يوم الجمعه والخميس مافيش مسلسلات قال يعني اصل دي ايام اجازات والناس قال ايه بتخرج تتفسح طب والغلابه اللي زينا اللي اجوازهم بيجروا على اكل العيش ومالهمش اجازات يتسلوا في ايه؟
يا الله اديني بتسلى معاكم والناس لي بعضيها
وفوتكم بعافيه

الاسطوانة!!!

النهارده غلبنى الشوق زى كل يوم حنيت كتير لذكريات (....)اتصلت بتلفون تمحت ارقامه وتحرقت علشان اسمع اسطوانة فارغة بتقلى مفيش حد هيرد... مفيش حد هنا..الغريب انى مشغولة جدا فى حياتى وفكرى لكن بلاقى الوقت الكافى رغم الزحمة ولسه بحن... اكيد الرقم الصعب فهم الحكاية خد بعضو ومشى بقسوة وبسرعة وساب الاسطوانة الفارغة تواسينى ..وتخيلت الرقم بيرد وضحكت وتكلمت وفتكرت ايام حلوة كنت فيها لسه عايشة صداقة وحب وامل ولسه مبقيتش مجرد ذكرى موقعتش تحت ظلم القرار ..لسه مبكيتش من الفراق .
انا مبلومش حد ولا حاجة بس زعلانة من نفسى انى لسه............................................ بسمع ومصدقة الاسطوانة .

ايه اللى بيحصل ده!!ايه اللى انا شايفه ده؟؟؟

ايه يا جماعة بس صلوا بينا على رسول الله ، مش كده يا ام العريف هدى اخلاقك شوية الراجل مش فاهم قصدك ايه!! انتى بس جربى قوليله ايه هو السؤال وهو هيجاوب على طول، وانتى يا مولاتى صحيح هتسيبينا؟؟ ده انتى كنتى مونسانا والله ، ايه هتعيشى في الاسماعليه على طول ولا ايه ؟؟
وانتى يا من ضيع والله عداك العيب وازح اديك مسالم ومستعد لتقديم كافة الخدمات لكافة شئ ،ربنا يعينك على اللى انت فيه وعلى اللى هيحصل فيك .ويجعله عامر

اجري على ايديك ورجليك .. خالتك دوسه بتدور عليك

قلنا اننا منعرفش نلعب شطرنج ، وده مش عيب ولا مخالف للقانون والشرعية الدوليه على ما اعتقد .. ودلوقت كمان بنتنازل عن طاولة الزهر باللي فيها .. خديها يا ست ام العريف غنيمة حرب وابقي علقي عليها الشعارات الرنانة والطنانة والزنانة كمان بتاعتك من امثال تعمل ناضورجي ، اطويك واحطك في درجي .. و اجري على ايديك ورجليك ، خالتك دوسه بتدور عليك .. طب اقول لها ايه دي .. ياعم هي بس تفهمني ايه اللي بتقصده بالكلام اللي بتقوله وانا اديلها اللي هي عايزاه .. المشكله بس انها تقول جملة مفيده افهم منها المطلوب وانا انفذ على طول . عايزه اعتراف باني معادي للسامية مثلا ؟ معنديش مانع .. عايزه اعتراف باني من انصار تحديد النسل ؟ مفيش مانع . هي تكتب الاعترافات اللي هي عايزاها وانا اوقع عليها وانا مغمض ، بس افهم هي عايزه ايه واللي قالته كان معناه ايه . وبعدين انا عايز اسأل هي جارتها وبنتها راحو فين ؟؟؟ كانو شاغلينها عنا ومدينها فروتهم تنتف فيها براحتها ، وهم ما شاء الله فروتهم سميكه اوي والوبر فيها شبرين ، يعني ماده صالحة جدا للنتف ، بس الظاهر على حظنا نتفت فروتهم لحد ما دوبت الجلد ذات نفسه فصعبو عليها وسابتهم في حالهم واتدورت علينا .. والغريب بأه انها بتستنجد بالست الغلبانه مولاتي اللي يادوبك بتدافع عن نفسها بالعافيه ، وبتقول لها انتي خط دفاعنا الاول واوعي يا ابله تمشي وتسيبينا للرجاله الوحشين دول يضربونا .. ذكرتني بأسرائيل لما قلبت الايه وعملت عكس منطق الاشياء وضد الحقائق التاريخيه كلها وبأت هي اللي بتشتكي في مجلس الامن مش العرب ، ومن مين ؟ من الفلسطينين اللي نازله فيهم دبح ليل نهار ، قال ايه .. صواريخهم بتضرب البلدات والقرى الجنوبيه بتوعها !!! بالذمة مش حاجه تضحك ؟؟ تمام ، زي استعانة ام العريف بمولاتي لرد هجوم الرجاله الممثلين بحضرتي !

شيش بيش

ايه الحكايه يا مولاتي انا مش فاهمه ايه اللي هيحصل بالظبط ؟ انتي قصدك انك كنتي مش فاضيه الوقت اللي فات لانك كنتي في اسماعيليه ودلوقتي فضيتي وهتكتبي ولا قصدك هترجعي تاني اسماعيليه ومش هتكتبي ؟ ويا ترى مش هتكتبي ليه وانتي هناك؟ واسماعيليه دي فتره مؤقته ولا دائمه؟
يا ريت ما تبعديش عن المدونه لاني بعتبرك خط دفاع اول ليا في المدونه وما ينفعش تبعدي ابدا
اما عن تعليق مدام\آنسه ذكريات فالمدونه مكان مفتوح للي يحب يتكلم في اي حاجه هو نفسه يتكلم فيها او شاغله باله وكل واحد حر يكتب عن فلان يكتب عن فلانه يكتب تعليق عن حاجه اتكتبت قبل كده براحته اقصد انه مش ضروري كل الكلام يكون خاص بالواحد وبحياته وبمكنوناته الداخليه المنبثقه من البؤره المركزيه للاشعور اللولبي الشبه منحرف والمشتق من الكتله العنقوديه للفراغ الكوني بالعكس الواحد ضروري يشترك مع الآخرين في حواراتهم ومشاكلهم لان ده بيكون احيانا الحل الوحيد عشان الواحد ينسى مشاكله الشخصيه وما يجيلوش اكتئاب وبالعربي كله يدلع نفسه اما الاخ سوسو قصدي من ضيع ولو ان سوسو مش وحش يعني انا ما كنتش اعرف ان الجامعه الامريكيه فتحت كليه جديده متخصصه في اللف والدوران والتتويه لان من الواضح ان البكالوريوس بتاع حضرتك كان في الحاجات دي لانك مصر ما تردش على سؤالي الاساسي والغريب انك كمان مش عاوز تتعداه وتتجاهله وخلاص فا نفهم انك مش عاوز ترد عشان منظرك ما يبقاش وحش ونقول بلاش نحرج الراجل ويبقى زي اللي خد دش بارد ونسيبك في حالك ونعديها لا ده انت بتصر تلف حوالين الموضوع وتنكش فيه وترمي كلام زي الدبش و تقولي قال خانة اليك ؟ يك ايه بس شكلك كده شيش بيش ومش شايف اني اقدر اطويك واحطك في درجي واخسسك النص و تربط بنطلونك بدوباره و كفايه عليك كده وروح احسن خالتك دوسه بتدور عليك

حتوحشيني اوي يا مولاتي

طب وحياة ربنا اني زعلت اوي لما قريت كلام مولاتي .. انا كنت ناوي ارد كالعادة رد جر شكل على كل اللي في سكتي . وكالعادة قريت المواضيع من تحت الفوق ، يعني من القديم للجديد ، بس لما وصلت لمولاتي وقريت انها حتسيبنا وتروح الاسماعيليه فرحت طبعا انها داخله على تجربه جديده وواضح انها بتأمل منها خيرا وانشاء الله تكون فعلا كما تتمنى وانا عارف الاسماعيليه وجمالها وهدوئها وكان نفسي اعيش فيها واقعد كل يوم على شط الكنال اتفرج على السفن الكبيره وهي معديه ، وكمان اخد فلوكه انا وحبيبتي ونضرب بنطه على شط الكنال .. بس اللي زعلني هو ليه مولاتي حتسيبنا ، افهم من كده ان الاسماعيليه لسه ما وصلتهاش الانترنيت ؟؟؟؟؟؟؟ وحتى لو كان المكان اللي حتنزل فيه مولاتي مفيهوش انترنت لاي سبب من الاسباب ، طب الانترنيت كافيز راحت فين يا مولاتي !! والا انتي عملتيها حلوانه في سلوانه يعني بتخلعي مننا بصنعه لطافه ؟؟!! انا شخصيا بالاصالة عن نفسي وبالنيابة عن كافه الزميلات اناشدك العدول عن قرار التنحي عن الكتابة في المدونه والعودة الى اهلك وناسك والى مكانك الطبيعي في صدر المدونه .. وبصراحه عندي احساس قوي بان مولاتي مش حتخيب املي فيها وستنزل على رغبة الجماهير وتعدل عن قرار التنحي . ما هو بيني وبينك العرش ما لوش طعم من غيرك يا مولاتي ، والبلاط كله من غيرك نقلعو احسن ونبيعه كسر . اما عن ذكريات فانا اشكرها على عقلانيتها ودعوتها المخلصة لنبذ الخلافات بيننا ووأد الفرقة في مهدها حتى لا تصبح فتنه تصيبن الذين امنو منكم خاصة . بس فات الست ذكريات ان كل ما كان يدور بيننا من مهاترات لم يكن يعدو كونه ضربا من المشاكسات والمناغشات لاضفاء جو من البهجة والاثارة على المدونة يكسر رتابة الحديث في الخصوص وعن الهموم والاحزان والاحباطات بالذات . واعتقد ان ما كتبته الان وهو ردة فعلي الحقيقية على قرار مولاتي بالرحيل عن المدونه ، وانا صادق فيه كل الصدق ، لهو خير دليل على صحة ما اقول . . وعلى فكره انا ومولاتي كنا اكتر اتنين بنتناقر في المدونة دي .

اما عن الست ام العريف ، فأنا من الاول حاطط ايدي على قلبي وبقول اللهم كف عنا لسان ام العريف .. واذا بتذكرو من يوم ما يسريه اللي ليها على كل بيت في الحتة واجب قالت وا جاراتاه .. انا قلت كله يهون بس اخلع قبل ما تصحالي ام العريف .. واهي صحيت وحتشتغلي في الازرق .. طب يا ست ام العريف ويا استاذ هاني سلامه انا موافق اخليني في السباكه . بس هي فين السباكه دي ؟ ما هو انا اهلي الله يسهل عليهم ويرحم الميت منهم ما علمونيش حاجه اواجه بيها الزمن واكل من وراها عيش .. اعمل ايه ، اصلهم كانو دقة قديمه وتفكيرهم حلزوني على قدهم ، قامو وعلى قد فهمهم دخلوني الجامعه الامريكيه وخدتلي حتتة بكالوريوس لا بيودي ولا بيجيب ولا بينفع ولا بيشفع .. واديني بدفع التمن لحد النهارده .. وياريت الست ام العريف تدلني على الاستاذ هاني سلامة عشان ياخدني من ايدي للعلامة سوسو بلبل الشرابيه اديله حتة البكالوريوس بتاعي يغني بيه في الافراح والموالد والحدائق العامة كمان ، واخد منه السباكة واقول يا فكيك لحسن يرجع في كلامه . على فكره يا ست ام العريف اهلنا زمان لا كانو بيعرفو احنا بنذاكر ايه ولا فين ولا ليه .. ولا بيقولولنا ذاكرو من اصله .. ولما رحنا الجامعه كنا عايشين لوحدنا بعيد عنهم مسافات من بتاعة نادية صالح وشوف سافرو معاك كام واحد ما وحشنا منهم واحد .. بس شوف الحاجه العجيبه بأه والخارقه لناموس الطبيعه وناموس كفر الجبل .. دنت وحشتنا بالذات .. واهي ارزاق .. وياريت حد يشوفلنا الست نادية صالح يمكن يكون معاها هي الاخرى مهنة خياطة ولا ترزي عربي اهي تنفع برضه ، وخليلها الغنا تشبع بيه . وشوفي الصدفه كمان الخارقة لناموس الطبيعه ، انا فعلا ما بعرفش العب شطرنج من اصله ، يعني ريحي دماغك يا ام العريف ، لا بعرف العب مع محترفين ولا مع مبتدئين حتى . بس بعرف العب طاولة زهر .. ايه رأيك ؟؟خانة اليك حلوه ، مش كده ؟؟؟؟

اسماعيليه رايح جاي

إخترت عنوان الفيلم عشان ينطبق عليا هلا يا جماعة أولا ازيكو كلكو وحشتوني ويارب تكونو بخير انا كنت في شغل في الإسماعيليه وهلا هعد فتره هناك عندي حاجه جديده يارب تعجبكو والفتره اللي رحت والله فكرت فيكو وكان نفسي أقرا المدونه واشوفكو كاتبين شو المهم انشغلت وما لقيت وقت أعد عالنت بس هلا هقضي فتره طويله هناك هحاول أتابع المواضيع أول بأول وبتمنى ليكو أيام حلوة وأشوفكو على خير وعارفين حلوة الاسماعيليه هدوء وعجبتني السفن الكبيرة وهي بتعدي منظرها كتير حلو زي تيتانيك هههه المهم ربنا يوفقكو كلكو وأراكم بخير واحنا نتمنى ما يكون حدا زعل منا طبعا كنا بنكتب ونمزح والايام الحلوة على فكره ما بتتعوض وبنفضل فاكرينها ويارب تتعاد ويجي أيام أحسن وأحلا وشكرا يا من ضيع في الأوهام عن كلامك عني والمسامح كريم أنا مش زعلانه من حد بس قلتلك قبل كده اللي ما يعرفك يجهلك

عرب يا رسول الله

فحياتى دخل عنصر قال عايز نبقى صحاب ...والصديقة دى عايزة تبقى صدوقة وداخلة حامى وانا بخاف من الكلام المزوق والحب اللى ملوش داعى ولولا الخطوط الحمرا اللى انا حطاها كانت تلزقلى فى كل طلعة ودخلة يا جماعة قلبى بيقلى النصب دا وراه حاجة بس انا معنديش حاجة معقول تكون شافت فيا صفات يعنى مبهرة تخليها تمتدح فيا طول الوقت وتحبنى بالطريقة دى ولا علشان ظروف حياتها التعيسة جدا بتخليها تدور على حد يساعدها ويشغلها كل الاحتمالات بقلبها فى راسى بس بقيت محبش تكلمنى ولا تيجى بيتناوحلقتلها خالص وهى حاسة وبرضو بتيجى ومبصدق انها تمشي تطورت معايا حالة الهسهس وبقيت بشك انها بعد متمشى بيجرالى حاجة او بيحصل نكد هتقولو طيب خلاص فهميها متجيش تانى هقول انها قربتى ومقدرش امنعها تيجى بيتنا المهم يمكن علشان انا مريت ايام الجامعة بصداقة انتهت بكارثة بيئية ونفسية بحتة كنت تعرفت على صديقة قال ومخلصة جدا لدرجة انها بقت مش عايزة الهوا يجى عليا وتخدنى وتودينى وتجبلى حاجات وانا مبسوطة انها بتحبنى يااااه كل دا انا مبهرة وذات صفات ساحرة تخلى الناس تحبنى كدا وفى يوم حسيت انها بتخنقنى وبتضغط عليا باختصار انهيت صدقتنا ولكن العواقب كانت وخيمة جداعلى اثرها بقيت بخاف من الناس وثقتى مهزوزة ..

فى النهاية احب اقول انى ملاحظة ان المدونة بقت ساحة معارك بين الاعضاء وفقدت معناها الحقيقى وهى الفضفضة عن مشاعرنا ومخاوفنا ومشكلاتنا و توجيه الانفعالات والمشاكل تجاه بعض ونعترض على الرأى اللى مبيعجبناش وننتقد بعض ياريت نهدا شوية ونبدأ من جديد نحكى فى امور اهم من فلانة وفلان قالو انا متاكدا ان جوانا حاجات وافكار اهم من الاعتراض على اراء بعض والتحزب والعنصرية ولا هنعمل زى العرب مفيش مجال للراى الاخر...

لو ما كنتش حريف شطرنج

يبدو ان الاخ من ضيع مالوش في الشطرنج وحب يخلع من اللعبه لما لقى نفسه اتورط وبيلعب مع محترفين مش هواة فقام بصنعة لطافة عامل قال ايه مش فاهم الكلام ونظام سعاد نصر الله يرحمها لما مره كانت في مسلسل كان لما جوزها يسألها عن حاجه مش عاوزه تجاوب عليها تعمل نفسها فقدت الذاكره وجالها زهايمر وتقعد تقوله: هااه مين معاياااا؟
وانا عاوزه حد واحد بس يقولي ان كلام من ضيع في الاوهام صحيح وان كلامي مش مفهوم
على العموم هنعديهالك المره دي يا من ضيع وهقولك زي هاني سلامه في فيلم اصحاب ولا بزنس :يا اخ سوسو يا بلبل الشرابيه سيبك من الغنا وخليك في السباكه احسن محتاجالك

سببان وجيهان ..

انا المره دي اتأخرت عليكو مكرها لابطل . . ولتأخري سببان وجيهان .. الاول هو انني اضعت عنوان المدونة كما اضعت في الاوهام عمري ، اصله الكمبيوتر بتاعي حب يتعنطز حبه ويسوق دلاله قام معرفش عمل ايه في العناوين كلها ، الظاهر زهق من اللعبة دي قام قالب الطاولة وقال مش لاعب . اما السبب الثاني فهو انني ما خليتش متحف ولا عالم اثار ولا حتى مرشد سياحي الا ولفيت عليه ووريته اللي قالته الست ام العريف ، ان حد يقوللي ايه اللغه دي ، ابدا . لا هي سنكسريتيه ولا اشوريه ولا سيريانيه ولا مسماريه ولا حتى هيروغليفيه . في الاخر رجعت وامري لله اسألها هي يمكن تحن علي وتفهمني ايه اللي قالته .. انا بصراحه مفهمتش ، مين اللي يعترف بايه ومين اللي يكش ملك وليه .. كل اللي قدرت افهمه من واحد نجار غلباوي افتى بان دي لغة مسماريه بس قديمه اوي وبطلت موضيتها ، ان الحكاية فيها محكمة ومتهم واعتراف ، وقاللي انه يعرف محامي خلع فتك اوي وخلاصه وممكن يطلعني من القضية زي المسمار من اللوح ، يعني يسحبني من وسط الستات اللي اني واقع بينهم زي الشعرة من العجينه . قلتله ياعم انا لا عايز محامي ولا وكيل نيابه ، انا اروح لام العريف بنفسي اخلص الموضوع معاها ، واذا الحكايه على لقب الجلالة بتاع مولاتي انا خلاص ياستات ماليش دعوة ، تسمي نفسها مولاتي ولا حتى كسرى انو شروان ، انا ما ليش دعوة وكل واحد حر في اسمه . عموما انا مش عارف هي تعبانه من الاسم ليه ، يعني فاكره انها لو غيرت اسمها من مولاتي لجاريتي حتى ، شخصيتها حتتغير مثلا ؟ ما اعتقدش ، حتفضل برضة واقفالي على الواحده ونعمل انا وهي فريد شوقي ومحمود المليجي . الا على فكره ، هي ما عدتش تكتب ليه ؟ شكلها كده كانت متأجره المقالين اللي كتبتهم ولا مستلفاهم من حد ، ولا يمكن هم دول الكلمتين اللي حفظاهم . طب معلش يعني الجيران لبعضيها واحنا ولاد منطقه واحده ، يعني ممكن اغششها في اي موضوع عايزه تكبته وما اقولش لحد .. احنا برضه ستر وغطا على بعضينا . بس هي تقول سلفني موضوع والا اتنين وانا على طول فريره . اصله بصراحه شكلها وحش كده وهي بتكتب تحت الهوا ، يعني مش على الهواء مباشرة . عموما خلي سمرا وام العريف ينفعوها .. شبكت معايا في معركة غير متكافئة واهم ما حدش فيهم دافع عنها بكلمة ولا حط في عينه حصوة ملح وسلفها موضوع تنشره بدل الاحراج اللي هي فيه . هم الستات كده ، من اول الست ام شيرين المرأه العاملة لحد الفت بتاعة الكشري .. مين الفت بتاعة الكشري ؟ الست اللي بتقف على عربية الكشري جنب بتاعة الدرة المشوي اللي اشترت منها مولاتي كوزين ، ايام ما كان ليها سنان وبتاكل دره مشوي .

كش ملك

تحياتي للجميع وحشتوني كلكم يا جماعه انا غبت الفتره اللي فاتت وماحشنيش عنكم إلا الشديد القوي انا اصلي كنت تعبانه شويه وكنت بدخل كل فتره اتابع اللي بيحصل في المدونه لكن ماكنتش بقدر اقعد اكتب ولما كان في حاجه بتستفزني اني ارد عليها بلاقي فورا مولاتي جزاها الله كل خير ردت عني وقالت كل اللي عاوزه اقوله وزياده واحب اقولك يا مولاتي اوعي تغيري اسمك وبالعكس شكرا لسمرا انها اقنعتك بعدم تغيير الاسم انت مولاتي وتاج راسي
واحب ابارك لام علي على انها قامت بالسلامه ويتربى المولود في عز والديه اما عن من ضيع في الاوهام بالنسبه لرأيه في الخلفه احب افكره برأيه هو برضه يعني مش رأي حد غيره لما كان بيعلق على اننا كنا زعلانين وكان بيقول اننا بنعلق زعلنا مره على اهلنا ومره على اجوازنا وانه اكيد احنا متحملين جزء كبير من اللي احنا فيه ده إذا ماكناش كمان احنا السبب الرئيسي فيه وبالتالي وبناءا عليه يبقى لو ده رأيه في الخلفه يبقى هو السبب في الرأي ده او متحمل جزء كبير من المسؤليه عن وصوله للرأي ده ما هو يا كده يا إما يتنازل عن اننا إحنا السبب في النكد ومتحملين جزء كبير من المسؤليه شوف بقى انت مستعد تطلع غلطان في اي راي فيهم كش ملك ودلوقتي جه دورك

ذو العقل يشقى في النعيم بعقله ...

بصراحة انا مابحبش افتح المدونة دي يومين ورا بعض والاقي نفس العنوان في وشي . والمشكلة اني بفتحها في اليوم على الاقل خمس ست مرات على امل اني اشوف حاجه جديدة ، لكن لا حياة لمن تنادي .. يعني مفيش فايده اسرح وامرح انا لوحدي في المدونة واكتب اللي انا عايزه .. مش اشكال ، انا سيد مين كتب . بس بيني وبينكو في اشكال صغير كده وهو اكتب ايه !! اصلي انا بحترم كلام مولاتي جدا وبعمل بنصحيتها ميه ميه . هي قالتلي ما تكتبش الا اللي تفهم فيه ، طب انا اعرف اللي بفهم فيه واللي ما بفهمش فيه ازاي ؟ انا عايز حد يساعدني ويقوللي انا بفهم في ايه عشان اكتب فيه .. ما حدش بيعرف اللي الواحد بيفهم فيه اكتر منه هو شخصيا !!! مين قال كده ؟! ده كان زمان ياعم ، اما دلوقت في مولاتي بتفهم ايه اللي بيفهم فيه الواحد وايه اللي مابيفهمش فيه اكتر منه هو شخصيا . لا وايه ، كمان بتعرف ايه اللي الواحد جربه وايه اللي ما جربوش ، يعني مش ناقص الا تكون حكيم عيون وبتفهم في العين . ياسيدي ما علينا ، اللهم لا اعتراض ، خلي جلالتها تقوللي انا بفهم في ايه وانا اكتب فيه على طول . وطبعا شكلها بعد الكلمتين اللي كتبتهم دول حتقوللي اني ما بفهمش في اي حاجه ، ولا حتى في قواعد الجرجير والفلفل الرومي واصول المسقعه اللي بالفاصوليا . ساعتها بأه حقفل المدونة المظلومه دي وامشي ولما ستاتي الافاضل ييجي على بالهن يكتبن اي حاجه ، ابقى ارجع . بس اقول لكو حاجه قبل ما امشي . بغض النظر عن رأي مولاتي ، انا بفهم في التحليل النفسي وممكن اكتب المره الجايه في موضوع ، ليه مولاتي سمت نفسها مولاتي ، واثر هذه التسمية على شعورها بالعظمة والجلالة واستخفافها بعباد الله . حلو الكلام ؟!!! انتظرونا

اول الخسسان كيلو .. واول الفرحه ام علي

طب الحمد لله ياستي ربنا ما ضيعش تعبك هدر .. واهو كيلو احسن من بلاش بس خدي بالك من ام علي ، هو طبق ولا اتنين وترجعلك الكيلو وعليه ميتين جرام محبة كده .. والف مبروك لام علي على الواد مع اني معرفهاش ، بس اللي اعرفه واللي مش قادر افهمه هو ليه المباركة والتي تنم عن الفرح والاستبشار بالخلفه ؟؟؟؟؟؟ طب وحياة ربنا الواحد لازم يعزوه لما يخلف .. ليه ؟ عشان لا الاب عاجبه عياله ولا العيال عاجبهم ابوهم .. حتى ربنا احتار في الموضوع ده .. مره قال والمال والبنون زينة الحياة الدنيا ، ومرة قال ومن اموالكم وابنائكم عدو لكم ( او كما قال يا مشايخ ، متاخذوناش .. وانا متاكد ان رسول الله قال رفع عن امتي الخطأ والنسيان .. يعني سامحونا ان كنا اخطئنا في الاية ) المشكله بأه انه لا اللي خلف مبسوط بخلفته ولا اللي ما خلفش مرتاح من المشكله اللي بيعتبرها مصيريه وماساوية .. ما علينا ، خلينا في اللي يخصنا .. اما بالنسبة لعدم الانتظام في الكتابة فذلك مرده لاني بعد ما رجعت المره الماضية تهت .. بقيت مش عارف انا في سقط اللوى ولا في سقط المتاع ولا في سقط سهوا .. اصلي يا دوب نزلت وبسمي بالله وادخل لقيت القفا في وشي على طول ، والست الكاتبة باين عليها مش عارفه الفرق بين امرؤ القيس وبين الريس معرفش اسمه ايه مؤلف الاغاني الهابطه في فيلم الكيف .. واهو كله عندها قفا بفتح القاف او بكسرها مش فارقه .. لا وايه ، فجأة لقيت جارتها اللي اسمها مولاتي طلعالي وفارده الملايه .. ولا لا يا من ضيع في الاوهام معرقش ايه .. ما لكش حق .. متسيب البنات يفضفضو يا اخي ، دول ولايا برضه ، هو انت معندكش ولايا ولا ايه .. فكرتني بفيلم احلى الاوقات لما يسريه اللي ليها على كل بيت في الحتة واجب قالت وا جاراتاه .. وعينك متشوف الا النور .. والست سمرا ارتاحت بأه لادارة المعركة وانشكحت على اداء جارتها مولاتي وقالتلها تشكري يا اختي يا معليا حسنا في الحارة الفقر دي .. انا بأه بصراحه بما اني راجل محترم ومضيع في الاوهام عمري ، قلت ما بدهاش ، انا ما ليش قعاد في الحتة دي .. يعني افضل قاعد لما تصحالي ام العريف كمان وتفتح عالرابع هي الاخرى ، خصوصا ان جارتها باينها بقالها كام يوم مش مدياها فرصة تعمل في فروتها تمزيقا ونتفا .. المهم ، طلعت اجري انادي على شيخ العرب سواق البعير اللي جابني من سقط اللوى ما لقيتوش ، واللي فهمته من الواد سايس الابل في الموقف اللي ورانا انه بعيره كان من غير ترخيص واللجنه سحبته .. والمشكله اني معرفش طريق سقط اللوى لوحدي .. وامرؤ القيس حتى لو لقيته حيكون سكران طينه ومتدهول على عين ابوه الملك حجر الكندي اللي اتقتل فقال امرؤ القيس قولته الشهيرة اليوم خمر وغدا امر .. بس المشكله انه الزمن عنده توقف على اليوم ، اما غدا دي فمجتش خالص .. يعني باختصار مش حيقدر يصلب طوله ويرافقني الي سقط اللوى ده اذا كان هو اصلا عارفها وما كانتش تأليفه من عنده عشان يظبط ايقاع البيت .. لا والادهى من كده الدخول وحومل .. الاقيهم فين دول .. وببني وبينكم فكرت ادور على عنتره اهو خبير بمسالك الصحراء ودروبها ومش سكير زي امرؤ القيس ، يعني ممكن الاقيه صاحي ويوصلني معاه ، لكن بعد البحث والتقصي اكتشفت انه هو كمان مصيبته مصيبة ومضيع وقته كله بين مسامط الحسين نازل شفط في لحمة الراس والفشة والممبار وخلافه عشان يحافظ على قوته ، وبين كباريهات شارع الهرم واستديوهات السيما بيدور على عبله .. اصله في شوية عيال صيع ضحكو عليه وقالوله انهم شافوها هناك وهم ما كنش قصدهم يكدبو عليه بس ما كانوش عارفين الفرق بين عبله الحقيقيه وبين كوكا اوهاجر حمدي الممثلة ، زيحكاية زميلتنا سمرا بتاعة القفا .. على كل الاحوال بائت محاولاتي كلها بالفشل وبقيت تايه رسمي بين سقط اللوى بتاعة امرؤ القيس وبين سقط المتاع بتاعتكو .. وشكلي في الاخر كده مش حتوقف معايا لحد من ضيع في الاوهام عمره ، يمكن قريب اوي نضيف لقب جديد وهو من ضيع في الاوهام عقله .. والعاقبة عندكم في المسرات وربنا مايوقع راجل بين الستات ، خصوصا لو كن حليفات ... عارف حتكملو تقولو ايه .. التعلب فات فات وفي ديله سبع لفات . اشكركن .

مبروك يا ام على

ازيكو ، النهاردة فى حاجتين بسطونى ، الاولى هى ان اعز صديقة ليا ولدت الحمد لله وقامت بالسلامة والبيبي كويس الحمد لله ، اي نعم هي تعبت في الولادة بس ده حال الدنيا،الف مبروك يا ام على ويتربى في عزك انشاء الله وتعملى فيه كل اللى كان نفسك تعمليه، اما الحاجة الثانية بقى هي انى قدرت انزل كيلو الحمد لله هو اى نعم طلع عينى برضة ونزلته فى 15 يوم بس اهو نزل الحمد لله .

انا مش شايفة صحيح حد بيكتب اى حاجة ، ايه اللى حصل هو انا اغيب شوية ارجع الاقى كله نام كده، وانت يامن ضيع فى الاوهام عمره ، جيت بس تقول اننا مش موجودين ومعرف ايه ورجعت تختفي ثاني.. ...؟؟ وانتى يا مولاتى ويا ام العريف ايه الحكاية خلاص هتبطلو ولا ايه؟؟؟

شكرا .....

العند والعنااااااد كلمة لها معنى خاص فى حياتى ...انا شخصية مش عنيدة أبدااا وبحب البساطة فى السلوك والفكر ولكن فى حياتى متلقيش غير العقول الباطونية الاسمنتية العنيدة جدا ولو عرفوا انهم غلطانين ياويلى وسواد ليلى تبدأ مرحلة عجيبة من العند واختلاق الاعذار الغير منطقية لنفسهم بناء عليه يبدأ سلوك من القطيعة والانكار ...
احب اعرفكو على اعند واقرب شخصية ليا ..استذة فى العند من خلال اى حوار تبنى فكرة ان اللى قدامها دا حمار ومش فهمها وتنسج شويه افكار بتعشش فى نفوخها الحديدى وتقفل بالضبة والمفتاح وانسا مفيش داعى للنقاش والحوارات واذا لم تكن معى فانت بتكرهنى .
مع انى أكتر حاجة بفهمها وبحبها ومع انها شخصية سهلة وكريمة وارضاءها بسيط ومطالبها عبيطة وطفولية محتاجة لفنان حقيقى يفك رموز وطلاسم العند اللى عندها ويحوله لحالة صلح جميلة ويعم الرخاء بعدها على الكوكب أه الكوكب وربما المجرة كلها منتو مش عرفين كمية النكد اللى اللى بتسببو:)
واخيرا احب اقول ان الشخصية اللى بتكلم عنها خلت للباطون معنى جميل وماثر فى حياتى وبقيت اتعامل مع باقى انواع الاسمنت والصخور بحرفية وبساطة ..فشكرا يا حوبىىىىى!

ضيعته بعندك يا قفاااااا

بص بقى يا من ضيع في الاوهام عمره ، انا بصراحة نص الكلام اللى انت كاتبه مفهمتش منه حاجة غير كلمة القفا واللى حفظاها من اغنية محمود عبد العزيز يا حلو بانت لبتك اول ما دابت قشرتك تحرم عليا محبتك وراح اتوب اتوب عن سكتك ، وطبعا كان محمود عبد العزيز عنده كامل الحق وقالها حكمة لما قال ضيعته بعندك يا قفا، وده معناه ان العند اخره وحش وحاجات كثير كده فوق بعض ، ويارب النفوس تهدى والمايه ترجع لمجاريها واللى عندنا منها كثير قوى فى مصر وطافحة فى حتت كثير قوي برضة، وتشكرى يا مولاتى يا واخدة بحسنا وحامية قفانا. ويجعله عامر.

قفا نبك من ذكرى حبيب ومنزل ..

في ايه يا ستات ؟؟ انا غلطت في العنوان ولا ايه ؟؟ الله العليم انا عسلت شويه فالناقة خدت راحتها وشرخت ، والظاهر انها جابتني هنا في سقط اللوى .. انا معرفهاش ولا عمري شفتها ، بس سمعت امرؤ القيس اظن بيعيط هناك جمب الحيط الواقعه في البيت اللي مش فاضل منه غير كام حجر .. قالب طين يعني .. وكام جزع نخلة مخوخ .. وعرفت بعد كده انه كان بيبكي على الاطلال في المعلقة الشهيرة اللي بيبدأها .. قفا نبك من ذكرى حبيب ومنزل .. بسقط اللوى بين الدخول فحومل .. هو باين الحتة دي اطلال برضه بس مفيهاش كام قالب طوب وجزع نخله مخوخ .. اللي فيها كلام متنتور هنا وهناك .. شوية شتيمه على الرجاله على كام دعوه من اللي طالعه من قلب مجروح .. وباينه كانت الحكاية سخنه حبتين ، يعني كان في نواحه ورداده .. واحده تولول والتانيه ترد عليها .. وماكنش يومكو يارجاله يا ولاد الكلب ياللي ربنا خلقكو للنكد بس .. طب ليه ده كله يا ستات ؟؟ الدنيا ما بقتش سوده للدرجة دي والرجاله مش كلهم وحشين وحتى الوحشين فيهم مش وحشين للدرجه دي .. خلاص زعلتو من الرجالة كرسي في الكلوب وقفلنا الموقع ومشينا .. طب انا اعمل ايه دلوقت .. خلاص اندب على الاطلال شوية وامشي انا الاخر .. لخولة اطلال ببرقة ثهمد .. تلوح كباقي الوشم في ظاهر اليد ..وشكرا ياعم طرفه يا ابن العبد والسلام عليكم .. امشي بأه ، اصله الحكاية مش طالبه نكد .. شوية قاعدين تتباكو على مستقبلكن المظلم والذي يتحمل مسئولية اظلامه وضياع الطريق من اقدامكن ، ابواكما احدهما او كلاهما .. وشوية الجارة بنت اللي هي بنته وبنتها الموغله في الازعاج .. وفي الاخر تنزلو نتف في فروة الرجاله باعتبار انهم اصل الشر في هذه الدنيا .. طب بالذمة انتو مصدقين نفسكو فعلا ؟ لو كنتو مصدقين فعلا تبقو هبل ومغرر بكن ميه في الميه .. لانه بكل بساطه مفيش خطأ بيعمله راجل مع مراته او اولاده الا بتكون وراه امرأه .. حتى الخطأ اللي بيعملو في حق نفسه بتكون وراه امرأه .. ولا انتو صدقتو حكاية ام شيرين المرأه العاملة اللي شغاله ليل نهار طافحه الكوته وجوزها سي السيد بياكل في قته محلوله .. لعلمكو باه هي اللي مطلعه البلا على جتته لدرجة انه فعلا بيلعن اليوم اللي اشتغلت فيه .. ده ما بيشفش في حياته ساعه واحده هنيه .. ناهيك عن النواشف اللي خلت معدته عايزه صهريج محلول جفاف بزيه .. والفلوس اللي بتكسبها بتروح لبس ومكياج وواجبات اجتماعيه .. النهارده بنت المدير اتخطبت .. بكره ابن زميلها العزيز عامل حفلة عيد ميلاده .. واللي حبلت واللي ولدت .. والي طالعه الحج واللي نازله تصيف .. وهلم جرى .. وليه ده كله ؟ ابدا عياقه بس .. عشان تقول انا موظفه قد الدنيا .. وبيني وبينكو مش بس كده ، هي متكيفه اوي على كلام الغزل اللي بتسمعه في الشغل ومحاولات بعض الزملاء لا ستدراجها الى علاقة خاصه ربما تصبح غير مشروعه ولا على الاقل عشوائيه وبحاجه الى ازاله .. المهم .. زي ما في رجاله وحشين في نسوان اوحش .. فيعني سيبيكو من اللي انتو فيه ده وكفاية على اللون الاسود لحد كده .. ده الواحد بأه يفتح المدونه ويروح قافل على طول كأنه بيفتح قبر .. الشكوى لغير الله مذله ، تروح سافخاه على وشه كده .. والغريبه يا ستاتي الافاضل .. قاعدين في رواق الشيخه نفيسة العلوم وقت درس العصر في جامع السيده نفيسه ولا ايه ؟؟ وبعدين ما كنتو كويسين بتتكلمو في الجيران وغلاستهم والجيم والناس والشارع والمواضيع بتاعة مولاتي اللي قلنالها تهدى شويه قامت هي لاخرى همدت خالص وكلت سد الحنك .. وام العريف اللي عامله دويتو مع سمرا ولا شاديه وفريد الاطرش .. واحده تغني والتانيه ترد عليها .. فوقو بقه ولا نامو خالص واقفلو المدونه او اجروها مفروشه حتى .. وانسو .. اهو مشروع وفشل زيه زي مليون مشروع فشلو مع انه كان ممكن ينجحو اوي .. وبصراحه المدونه كانت دمها خفيف ومسليه وممكن ترجع تاني لو انتو خرجتو من بين الاطلال وركبتو الناقة اللي جابتكو وقلتو يا فكيك .. بس اوعو يقابلكو امرؤ القيس وتسمعوه بيقول مكر مفر مقبل مدبر معا .. كجلمود صخر حطه السيل من عل .. تفتكروه سواق المكرو باص اللي اسمه ريكو والا زيكو ولا اللي هو .. يعني بالعربي هاتو بعضكن وتعالو على المدونه عدل من غير لكاعه ليقابلكو عنتره يقوللكو هل غادرالشعراء من متردم .. ام هل عرفت الدار بعد توهم .. تفتكروه بيسال عن رقم الناقه اللي بتروح مضارب عبس .. هو لعلمكو بيدور على بيت عبله .. يا دار عبلة بالجواء تكلمي .. وعمي صباحا دار عبلة واسلمي .. يعني بالعربي الفصيح مش بس انتن اللواتي تتباكين على الاطلال .. كان في رجاله بشنبات بيعملو زيكو كده .. بس كانو بيكتبو كل حاجه عشان كده فضلو موجودين لحد دلوقت .. فهمتو يا حلوين ؟؟؟؟؟

الشكوي لغير الله مذله

الغريب بقى يا ستاتى الافاضل ان الراجل يقدر فجاة بدون اى سابق انذار انه يقرر ان الحاجات الحلوة اللى كان بيعملها لمراته وكانت معجبة بيه علشان بيعملهلها عادي ومش بيهمو حد ، ان الحاجات دي كانت غلط !! تخيلو !! غلط ، بمنتهى السهولة كده

الظريف كمان في الراجل ان اهتمامه بالست اللى المفروض انه حارب علشان يتجوزها يعنى المفروض يفضل شايلها فى عينه وقلبه ويعملها كل اللى بتحبه زي ما هى بتعمله اللى بيحبه وتتمناله الرضى ، اهتمامه بيها بيبتدي يقل ويقل ويقل لحد ما يختفى ، يختفى تماما حتى لو هو كان بيمثل انه مهتم او بيحاول يقنع نفسه انه مهتم بس بطريقته، الست بتكون حاسه بانه متغير وانه مش طبيعي ، طبعا الرجالة عندهم الف عذر وعذر على التغير ده واللى الست بتبقي متجنيه وظالمة لما بتلومو وتتطلع ان هى اللي مش حاسة بيه وبأنه تعبان ومكتئب!!طيب هي مين يحس بيها ؟؟وامتي هيحس! بعد المصيبة ما تكون حصلت ؟وخلاص هي فقدت بهجتها وحلاوتها وسعادتها بسببه؟بسبب انه مبيفكرش غير في نفسه ومعتقد ان القليل جدا اللي بيديه كثييير جدا وتحمد ربها اني كده ومفيش حد بيدي اللي انا بديه.. مش بالذمة ده ظلم وافتري ، وبرجع اقول ان الظالم ليه رب ، وانا بشتكي لربنا هو اللي يقدر يوقف الظالم عند حده .

الحظ قليل يا سمرا

انا ملاحظة اذا تسمحولى بالكلام ان سمرا الوحيدة اللى اعطت رأيها عن الحب بعنف و نوع من الانكار وبتحاول تخبى احباطها من الحب عن طريق الشتيمة والغضب على المجتمع الذكورى وماعطتش راى حقيقى ومترابط يعنى لا انها مع او ضد زى باقى الاعضاءويظهر انها فى حالة هروب هى كمان ومن الواضح انها انسانة رقيقة ومليئه بالمشاعر على الرغم من كلامها القاسى اللى عاملة فيه جدار حماية لذكرياتها واحب اقلها ان مش من العيب ان الواحد يتكلم عن حالة حب مش هيتكرر تانى حقيقى عشناه وكمان نتحسرعليه ويفضفض مش هو دا الهدف من المدونة ...مش نتخبى من مشاعرنا انا مبقلش انى فى حالة هروب من الحب زى مفهم الكل لا انا بهرب من الالم اللى سببهولى فقدى للحب لكن بصراحة حبى الوحيد دا انا بعتز بيه ومتمسكه بيه لكن المو وعذاب الفراق هو اللى بيخلينى انساه وابعدواركز فى حياتى الجديدة والاشخاص المحيطين ونتقبلهم مش نرفضهم ونشتم عليهم ونلوم عليهم لاننا اخترناهم.... ايوه احنا اخترناهم على الرغم من احباطنا انهم اختيار قد يكون فاشل بس احنا المسؤلين وكلنا عارفين ان الغضب والسلبية مش حل مثلا قدامك جوز سلبى مبيعملش اللى انا عيزاه مش ضرورى يمكن انا كمان مبعملش اللى هو عايزو مبيحبنيش ومبيهتمش طيب ايه الحل كملى تضحيتك وقربى انتى يمكن تلاقى جوانب ايجابية فية غير الحب والهيام لان الجواز حياة وواقعية وجزء منو خيال وغرام جزء قد يكون صغير لدرجة منشوفهوش وفى جواز كلو حب وغرام بس حظ بقا والحظ قليل يا سمرا

آآآآآآآآآآمييييييييييييييييين

اولا بالنسبه للحب انا عن نفسي كان كلامي عن الحب بشكل عام الحب للحب يعني احب بنتي وابني واختي واخويا والمجتمع والناس انا كنت بتكلم (عن نفسي) مش بالضروره عن حب الراجل والست وبعدين امر مفروغ منه ان الراجل قبل الجواز حاجه وبعد الجواز حاجه تانيه خاااالص والستات كمان قبل الجواز بتبقى فرحانه بروحها شايفه نفسها سلطانه زمانها الملكه المتوجه على عقل وقلب واهل خطيبها اما بعد الجواز بتتحول فجأه لمرجانه جاريه يعني وحتى ما حصلتش الجاريه بتاعة المثل اللي بيقول يا جاريه اطبخي يا سيدى كلِف لان السيد هنا وهو الزوج المصون عاوز الطبخ وقال كمان من غير ما يكلف ازاي بصراحه ما اعرفش بس الجيش بيقول اتصرف او بقى مرجانه تستحمل في كل مناسبه كلمتين في العضم عن كتر صرفها وانها لازم تلم ايدها ولما تيجي تقوله: طيب شوف المصاريف ويبقى لك الحق لو في حاجه مش اساسيه او ممكن الاستغناء عنها
يقول:ما اشوفش
طيب امسك انت مصروف البيت
يقول: ما امسكش
طيب قولي انت رايك ايه اللي مفروض اعمله من وجهه نظرك؟
يقول :ما اعرفش
يعني من الآخر صحيح ما تكسرش ومكسر ما تكلش وكل لما تشبع ونظام مش لابس الطاقيه ليه ياد؟ وكأن موضوع الصرف ده مجرد تلكيكه يسموا بيها بدن الواحد كل شويه ويفشوا غيظهم فينا وهم في قرارة نفسهم متأكدين اننا مفيش حاجه ممكن نعملها لتقليص المصاريف
ده غير بقى التحكم ونظام لا ارحم ولا اسيب رحمة ربنا تنزل عشان هو عاوز كده يبقى في 500 حاجه عاوزه تتعمل ليكي وللبيت وللاولاد ويفضل يأجل هو يا إما لانه عنده شغل او لانه اجازه وعاوز يرتاح ..يا سلااام طيب يعني دوخيني يا لمونه والبيضه بقى ولا الفرخه؟ طيب انتي مش عاوزاه يتعطل عن شغله ولا يفقد راحته واسترخائه في اجازته وتيجي تقترحي انك تعملي انت المشاوير او الطلبات او ايا كان الشئ ياااااااااا لااااهوىىىىىىىىىىىىى تقوم الدنيا وما تقعدش يا إما انتي ما عندكيش صبر ما انا قلت هعمل الحاجه فيها ايه لو استنيتي شويه(مع العلم ان شويه دي ممكن توصل ل 4 سنين من غير مبالغه والله) يعني خلاص مش قادره تستحمليني شويه ولما تقولي انهم مش شويه وتيجي تفكريه بتاجيلاته كل مره بيطلعلك بسبب للتاجيل ولو زنقتيه في خانه اليك يا إما تكون النتيجه انه يقولك انا بقى مش هعمل الحاجه دي إلا لما افضى انشاالله اقعد كمان 4 سنين ولو قلتي انك هتعمليها انتي يقولك آآآه انتي بتهديني لااا انا ما اجيش بالتهديد طب بقى ما حدش هيعمل الحاجه دي غيري وتطلعي انتي الغلطانه آآآه ازاي تهدديه مالكيش حق صحيح
وطبعا ينطبق ده على الفسح تبقي انتي محبوسه بين 4 حيطان ويا ريتك فاضيه لا ده انتي طالعان عينك مع العيال وفي شغل البيت وزهقانه وتعبانه والعيال كمان زهقانين ولو قلتي تستغلي الموقف انه هو بره فتخرجي تروحي لصاحبه ولا جاره ولا اهلك تيجي تقوليله يمتعض ويستغرب اوي انتي خارجه ليه ؟ طيب هو في حاجه حصلت؟ طيب اشمعنى النهارده؟ وبعد كل الاستجوابات دي يبتدي يحاول يأجل الخروجه دي ولو ما قدرش يفضل من اول ما يعرف انك وصلتي المكان اللي رايحاه وهو كل شويه تليفون وفي اليوم ده بالذات يروح بدري وتبوظ طبعا خروجتك ما بين انك مالحقتيش تقعدي وما بين مكالماته اللي ورا بعضها وبكده يبقى نجح في انه يخليكي تندمي على الخروج من غيره مع العلم انك قبل كده فشلتي تماما في انك تستني انه يخرجك هو لانه يوم اجازته يا اما عاوز يرتاح يا يفضل رايح جاي ما انتيش عارفاله بيعمل ايه بالظبط ولو قلتيله طيب خلاص اخرج انا لااااا ازااااي ويقولك لا ما تخرجيش لوحدك
كائنات غريبه لا بيعرفوا يتصرفوا لوحدهم وهم اكتر ناس مسرفين وهم اساس النكد ويموتوا في التلاكيك وبيفهموا الحاجه على مزاجهم وتبقى الحاجه قدامهم ومعطياتها واضحه 1+1=2 مالهاش حل تاني ورغم كده ما تعرفي بيطنشوا ولا بيعملوا عبط ولا بيستسهلوا
الى كل بنت ما اتجوزتش
انت سلطانة زمانك اوعي تتجوزي واحمدي ربك وبوسي ايدك وش وضهر
ومش هعيد الدعاوي بتاعة سمرا وهكتفي بأني اقول آآآآآآآآآآآآآآآآآآآآآآآآآآممممميييييييييييييييييييييييييييين

حب ايه اللى انت جاى تقول عليه؟؟!!!

قال حب قال،بالذمة يا بنات انتو مصدقين نفسكو؟؟هو فى راجل بيحب الا نفسه ؟؟او فى راجل بيحب الا قبل الجواز ؟ سبحان الله الرجالة دول حسبى الله ونعمة الوكيل فيهم ربنا مديهم كل القوة والصلاحيات اللى فى الكون لكن تقول ايه لا حمد ولا شكر ، الهى يارب كل راجل مش حامد ربنا على النعمة اللى عندو تعاقبه يا رب ، او اى راجل ظالم او شايف نفسه يارب ، يارب اللى يذل واحدة ست تذله يارب ، واللى يهين واحدة يتهان وياخد على دماغه ، واللى يشوف نفسه ويتعالى على اللى بتخدمه ومرعياه وتتمناله الخير ،ياخد جزائه منك يا رب ويعرف ان الله حق ويعرف ان ده ذنبها يارب ، انا مش فاهمه هما عايزين ايه بالظبط.؟؟؟ والمشكله اننا فى مجتمع ذكوري يعنى اى حاجة يقولوها هى اللى بتنتشر وبشده ، يعني البيه من دول يكون منه زى قلته ويجي يتقنعر علي الست الغلبانه اللي معاه، هما اللى يقدرو يوصمو اى ست ويخلوها انها ست نكديه بنت ستين(............) وهو يا عينى غلبان طلعان عينو في الشغل وكله ليها بس هي بقى هييييييه ما هى ست بقى عادي ، نفسى اشوف راجل عادل نفسى اشوف راجل زى ما كان مع الست قبل الجواز يفضل معاه كده بعد الجواز ، بس مفيش بيتغيرو في كل حاجة ولو قلت نص كلمة يبقى خلاص الدنيا تقوم متقعدش ونبقى ستات نكده وفاضين وبنكبر المسائل ، مش عارفة ادعى اقول ايه لانى فعلا مليش غير ربنا هو اللى عالم بيا وهو اللى يقدر ياخودلى حقى ، ومش حقى انا بس حق اى ست ممكن يكون في راجل ظلمها وبما انه راجل يبقى طبعا مظلمهاش وهى اللى تستاهل كل اللى يجرالها.

العقل زينه في الباترينه

والله يا جماعه انا ليا رأي جايز ينفع حد انا طول عمري بشوف ان الواحد قبل ما يحب ويسيب نفسه للحب ويوصل لمرحلة انه مش قادر يعيش من غير اللي بيحبه لازم في الاول خالص يكون متأكد بنسبه عاليه ان اللي بيحبه ده هو الشخص المناسب هتقولولي ازاي؟
اقولكوا يعني في حالات من الحب مستفزه جدا كان باين وطبيعي انها محكوم عليها بالاعدام مش بس بالفشل وطبعا انا هنا بتكلم عن الاطراف الناضجه يعني كلامي مش موجه للمراهقين لان المراهق بتبقى خبرته قليله وبياخد الامور على حالها وزي ما تيجي اهو حب وخلاص ومش بيفكر الموضوع هينتهي ازاي لكن لما تكون او يكون شخص ناضج وعنده وعى وخبره ليه يحط نفسه في موقف هو في غنى عنه زي ان واحده تحب واحد متجوز وعنده عيال وسعيد في حياته الزوجيه طيب ما هو حاجه من اتنين يا مش هيعبرها من اساسو وده طبعا لو كان راجل محترم وهي هتفضل تتعذب بحبها ده او هيطلع ندل ويقولك لما اتسلى شويه ويعيشها في قصه حب وهميه اخرتها اكيد كارثه ليها وغير كده الامثله كتير لما تبقى واحده مثقفه وبنت ناس محترمين ليه تحب واحد بلطجي ماعندوش ريحة الذوق يبهدلها كل شويه ويكسفها قدام الناس او واحده غنيه ليه تحب واحد صايع لا شغله ولا مشغله وكسلان ومش بتاع شغل ؟ ما هو الطبيعي انه هيفضل يسحب منها الفلوس وتكتشف في الاخر انه بيعرفها عشان يعيش على قفاها!!
غير كده مثلا عدم التوافق في الطباع او وجود عيب في الطرف التاني تكوني متأكده انك ما تقدريش تتحمليه يعني ازاي ترتبطي بالحب مع واحد مشهور مثلا ومعجباته كتير وانتي من النوع الغيور او ثقتك قليله بنفسك او بيه يبقى حياتكو هتبقى جحيم... او تحبي شخص طبيعة عمله بتاخد كل وقته وده غصب عنه وانتي عارفه نفسك مش هتحتملي العيشه بالطريقه دي وغيره كتير من الامثله اللي لا حصر لها اللي بتبقى معطياتها باينه من الاول ورغم كده تلاقي الطرفين استمروا في قصة حب معروف مقدما فشلها وبعد كده يقعدوا يعيطوا ويقولوا الحب والعذاب مع ان الغلط كان غلطهم من الاول
هتقولولي لا الحب ما فيهوش حسابات والواحد بيلاقي نفسه فجأه واقع في الحب هقول لا غلط مش صحيح كل حب بيبتدى بقبول وبعدين اعجاب وبعدين حب يعنى في اكتر من فرصه الواحد يراجع نفسه فيها ويشوف ينفع يكمل ولا يقف عند حد القبول والاعجاب لانه ما تقولوليش ان في حد من اول نظره بيقع في الحب لدرجة انه لو بعد عن حبيبه المزعوم ممكن يتدمر!! اكيد المرحله دي بتيجي بعد ما يكونوا قطعوا مشوار طويل في الحب يبقى كان ليه من الاول ؟وليه تضييع كل الوقت ده والخروج بخساير كبيره؟
انا طبعا كل كلامي بفترض فيه صدق الطرفين مع بعض يعنى اكيد مش بتكلم على حالات الخداع زي انه يقول حاجه دلوقتي وبعد كده ما ينفذهاش او يخبوا حاجه مهمه على بعض
المهم الواحد لازم يحكم العقل الاول وبعد كده يسلم نفسه للقلب

الحب في الارض

انا ما صدقت اصطلح وافض الاشتباك مع مولاتي وقعدت كافي خيري شري مش عايز اكتب اي حاجه بعدين اغلط بكلمة كده ولا كده ومولاتي تغضب تاني .. لكن الكلام عن الحب ده كله بصراحه استفزني وحرك كوامن الشوق للكتابة في نفسي .. يا جماعه احلى وادق واصدق وصف للحب هو اللي قاله شيخ العشاق نزار قباني ( الحب في الارض بعض من تخيلنا .. لو لم نجده عليها لاخترعناه ) يعني باختصار شديد الانسان ما يقدرش يعيش من غير حب .. سنة الحياة وطبيعة الانسان تقتضي انه يحب ويكره .. بس في حب بيختلف عن حب .. يعني الحب الذي يرقى الى مرتبة العشق والذي يجعل من يحب لا يتخيل الحياة بدون محبوبه .. لا يستطيع الابتعاد عنه ولا يحتمل فكرة هجره او قطع العلاقة معه .. ذلك النوع من الحب الذي جعل الاخت ذكريات تحب اغاني فيروز وتحس ببرودة الهواء ويرقص قلبها على وقع زخات المطر .. ذلك الحب الذي يجعل لشمس الاصيل شكلا مختلفا ويجعل لتلك اللوحات الفنية الرائعة الموشاة بخيوط الذهب والفضة ، التي ترسمها وهي تداعب سحب المساء بينما تحاول حجبها قبل ان يغيبها البحر ، سحرا يمس شغاف القلوب .. ذلك الحب الذي يجعل صورة المحبوب تقفز الى الذهن كلما رأى العاشق منظرا جميلا او وردة على غصنها او سمع زقزقة عصفور او اغنية عاطفية .. ذلك الحب الذي يجعل اغاني ام كلثوم ونجاة وعبد الحليم ووردة وفيروز نهر يتدفق بأكسير الحياة الاسطوري الذي لا يدري احد كنهه ابدا ، ولكنه يحس به . هذا هو الحب الذي ان لم يعشه الانسان لا تكتمل حياته .. وبقدر ما لهذا النوع من الحب حلاوته ، بقدر ما له من مرار وعذاب ونار تأكل القلب وتسحق العقل في اوقات الرغبة والهجر والصد وحالات الخيانة والخداع .. وهو ما دفع احد الحكماء الي القول لابنه ناصحا ( لا تحب يا بني .. لانك عندما تحب تكون قد اسلمت حياتك لمن تحب ووضعت نفسك تحت رحمته ) ومع ذلك يظل شيخ العشاق مصرا على روعة الحب ومتمسكا به مخلصا له ومدافعا عنه حتى الرمق الاخير ، حيث يقول ( وبرغم جميع حرائقه .. وبرغم جميع سوابقه .. وبرغم الحزن الساكن فينا ليل نهار .. وبرغم الريح .. وبرغم الجو الماطر والاعصار .. الحب سيبقى يا ولدي ، احلى الاقدار ) .. تصدقو مين وتكدبو مين بأه ؟؟ انا رأيي تجربو بنفسكو .. وادي دقني ان قدرتو تخرجو بنتيجه وتحسمو امركو هو الحب وحش ولا حلو .. سعاده ومتعه ولا شقاء وعذاب ؟؟ واذا عايزين رايي من واقع خبرتي .. الحب الحقيقي .. الحب الكبير الذي يرقى الى مرتبة العشق هو كل هذه الاشياء معا .. هو السعادة والعذاب والهناء والحلاوة والمرار .. هو .. هو الحياة ذاتها .
أه .. نسيت اقلكو .. متحاولوش تدورو على الحب .. عارفين ليه ؟ لانه هو اللي بيدور عليكو ويلاقيكو وقت ما يحب وفي المكان اللي يختاره .. وانتو ونصيبكو بأه .. حب من اللي يسعد ويبني .. ولا من اللي بيشقي ويدمر .. وعلى راي القصبجي لما قالتله السلطانه عن حبه لام كلثوم ( بس ده الحب اللي بيدمر ) رد عليها القصبجي بكل بساطه وواقعيه وقال ( هو انا اللي اخترته !) وكان فصل الخطاب .

الحب حلو آه حلو اوي

ردا على رسالة حالة حب اكيد الحب حلو وحلو اوي اوي ولازم طبعا اي حد يتمنى لو ان فيه في حياتو حب لانه احلى حاجه في الدنيا وهو اللي بيحلي اي حاجه في عين الواحد حتى لو كانت وحشه وهو اللي بيخلي الصعب يهون مفيش حياه من غير حب واللي مفيش في حياتو حب عايش عشانو يبقى عايش و مش عايش

حالة حب...حالة هروب

يعنى اية حب وايه السر ان كل الناس عايزة تحب وتنحب ...ويقطعو نفسهم علشان يكونو بيحبو واللى ميقدرش بيخترع حالة شبيها بالحب وهمية وبيعيشها ..كل التساؤلات دى اثارها كلام اخويا اللى نفسو يكون فى حد فى حياتو مين ميكون مش مهم بس يحب وحاسس حياتو فاضية ومملة وتيجى بنت حلوة زى نانسى ولا مايصة ولااسمهم اية دول من ميلودى يحبوه ويجبلهم حاجات ويخسر مكالمات ومشاوير عليهم طيب ليه التعب دا يا ربى والجرى الفاضى ولا كلامى غلط .............سؤال تانى فى بالى ليه انا بفكر بالطريقة دى منا حبيت وجريت وقطعت نفسى وعشت قصة طويلة عريضة واهم حاجة فى الموضوع انى حلمت ..حلمت حلم كبييييررر وفى الاخر فين انا وفين الحلم انا بصراحة ليا سنتين ناسية موضوع الحب دا مفكرتش فيه وتقريبا عزلت نفسى عن اى ذكرى بيه بطلت اسمع اغانى (ام كلثوم) وغيرها ومبقتش بحب فيروز وبكره ريحة العطور والنسكافيه والصحيان بدرى ومبرحش الاماكن والشوارع اللى دهولتنى على عينى حتى نسمة الهوا الباردة اللى بتفكرنى بالشتا بقفل منخيرى علشان مشمهاش وفتكر وبهرب من المطر مبخلهوش يلمسنى لانو بيفكرنى باعز انسان عندى ..طول الوقت بهرب وبهرب وايه الفايدة دا سؤالى مدام بنهرب بندور ليه من اساسو؟ هقفل الموضوع دلوقتى لانى لو تكلمت اكتر هدخل فى تفاصيل ومش عايزة انسا انى فى حالة هروب.

كلام جميل

وحشتوني يا جماعه بقالي 10 ايام غايبه ويظهر حصل فيهم حاجات كتير واحداث مصيريه وواجب عليا ارسال التهنئه على الصلحه بين مولاتي ومن ضيع وانامن جهتي اؤيد واناصر وادعم الاتفاقيه والمعاهده اللي تمت وبقول الصلح خير وكمان لازم نشكر عراب الصلحه سمرا بس ليا سؤال يا ترى بعد ده كله والاهم في الموضوع الحلوان عند مييين؟؟؟ ولا هي صلحه حاف كده ارديحي من غير حلوان؟
ثانيا من الاحداث المهمه ظهور ذكريات على ساحة المدونه وانا من جهتي برحب بيها والحمدلله ما طلعتش من جواسيس امي ولا جوزي ولا من طرف بنت الجيران اللي بتطلع تلعب مع بنتي
ثالثا قريت التعليقات اللي جت على رسالة يعوض الله وحابه ارد
بالنسبه لتعليق سمرا كلامك مظبوط وكل وقت وله اوان صحيح جوزي مش هيمانع اني اكمل تعليمي وهيحاول يدعمني لكن خلينا نكون واقعيين هو معظم الوقت في الشغل ده اذا ما كانش مسافر كمان يعني انا بتقع عليا المسؤوليه الاكبر للبيت والعيال وده واخد كل وقتي يبقى اجيب منين وقت للدراسه ؟ واذا جبت وقت لللذهاب للمحاضرات اجيب منين وقت للمذاكره في البيت؟ واذا جبت الوقت اوفر ازاي مواصلات عشان افضل رايحه جايه كل يوم ف لو رحت بتاكسي خراب بيوت مستعجل واذا ركبت مواصلات عامه هتبهدل وانا صحتي علي قدي ومش حمل البهدله واذا حليت كل المشاكل دي اجيب منين روقان البال والتركيز اللي محتاجاه المذاكره؟
اما بالنسبه لتعليق مولاتي فبرضه معاكي حق مش دايما الشهاده اللي بتنفع والشهاده لوحدها مالهاش قيمه من غير الخبره والكورسات والدورات بس في البلد هنا الشهاده لازم تكون موجوده من غيرها حاجات كتير هتفرق يعني بره ممكن بالخبره والدورات التدريبيه تتعيني في وظيفه كويسه وتلاقي شغل كويس لكن هنا هتتعاملي معامله فيها دونيه حتى لو كنتي بتفهمي احسن وشغلك احسن من اللي معاه شهاده صحيح في نماذج كتير نجحت نجاح باهر من غير شهادات لكن دي حالات نادره اوي مش بتتكرر كتير وبعدين للاسف الشهاده بقت في كثير من الاحيان واجهه اجتماعيه انا حاليا مش محتاجه الشهاده عشان اشتغل بيها لاني مقدرش اشتغل اصلا حتى لو معايا شهاده لاني شايفه ان الجواز والشغل ما بينفعوش مع بعض خاصة لو في اولاد بس المشكله انك ما تضمنيش الظروف يعني لا قدر الله لو اي مشكله حصلت بدل ما تمدي ايدك يبقى معاكي شهاده ممكن تشتغلي بيها ده غير ان بالنسبه ليا انا بالذات وضعي الاجتماعي وثقافتي ووعيي بيتناقضوا تماما مع كوني معيش شهاده جامعيه....اما بالنسبه لان ربنا بيعوض حاجات في حاجات انا مؤمنه جدا بالموضوع ده وانا عندي مواهب وهوايات ربنا ادهاني واعتقد اني افضلهم عن لو كان معايا دكتوراه واهم من ده كله ان عندي ثقه بالنفس بتخليني احس اني راضيه عن نفسي وعن حالي تماما ومبسوطه بنفسي زي ما انا كده ويمكن قلت قبل كده اني من النوع القنوع جدا وشايفه دايما ان اللي عندي هو احسن حاجه ونعمه كبيره من ربنا لكن موضوع الشهاده اتكلمت عنه في اطار الامنيات اللي ما تحققتش كان ولازال من الاحلام المهمه
وردا على من ضيع بالنسبه لمشكلة انه العيب في مين انا ولا الجامعه ولا الظروف اكاد اجزم اني مش انا المشكله اما بقى فكرة ان يمكن الاهل ماكانوش بيقولوا خشي ذاكري فهي في حد ذاتها مربط الفرس فمن الجهه دي هما كانوا بيقولوا خشي ذاكري لكن تفتكر دي كفايه؟؟!! يعني ايه خشي ذاكري من غير جو ملائم للمذاكره؟ يا سيدي الفاضل ما ينفعش تقول لابنك خش ذاكر وهو شايف انكوا قاعدين بتتفرجوا علي فيلم حلو وهو بيحبه او مسلسل او قاعدين مع باقي افراد الاسره في جلسه عائليه وبتحكوا عن اللي حصل معاكوا النهارده او تخلي شغله الشاغل هونظافه وترتيب البيت في المقام الاول وانشا الله عنه ما ذاكر بس البيت يبقى نظيف ولو سقط هتزعل منه شويه وخلاص لكن لو كركب البيت او ما تعاونش في تنظيفه العقاب يبقى فوري ويا ويلك يا سواد ليلك او تشتت تفكيره بانك تحمله من وهو طفل ما لاطاقة لبشر ان يحتمل من هموم ومشاكل وخلافات ... ايوه جايز انت كمان ظروفك دفعتك لكده بس متجيش بعد كل ده تقوله خش ذاكر وتتوقع انه هيذاكر وهيتفوق او حتى هينجح ومنظومة البيت كله ضده ده غير ان التلميذ ده بنى آدم برضه عاوز اللي يقعد معاه ويعرف مشاكله ويساعده على حلها ويقف جنبه ويبقى عينه عليه يحس بيه امتى فرحان ويشاركه فرحته امتى متغير او متضايق وايه السبب ويبقى حقيقي مشغول بيه مش بس يقولو بقين في المناسبات القوميه وبعد كده ادي وش الضيف ونظام انتوا في القلب واحنا بنعمل كل ده عشان مين ما هو عشانكوا
اما بالنسبه لان فيه نماذج الجده والام اللي بتدرس في نفس صف ابنها وعلى فكره ده طبيعي لانها كانت عمرها ما هتقدر تلاقي الوقت والظروف المناسبين قبل ما ابنها يدخل الجامعه وعلى كده يبقى نأجل الكلام في الموضوع ده 15 سنه يدينا ويديكم العمر والصحه وفوتكم بعافيه

مجرد ذكريات

الحقيقة انا ذكرى يعنى ماضى زمان ومفيش داعى تخافو منى طبعا كلامى للمدام اللى كانت خايفة اكون برقبها ...الذكرى مبتخوفش الا اذاكانت وحشة فبيقوم عقلك بحبسها فى زاوية بعيدة فى المخ لحد ما تتلاشى وتتنسى وكمان الذكريات الحلوة اذا الواحد مخدش بالو منها واعتنا بيها زى مبيعتنى بنفسو واللى حوليه وانشغل بتوافه الحياة الى هتنسيه لون وريحة حدث وذكرى جميلة كانت معاه وفى حياتو ...ذكرى حب جميلة احساس مش هيتكرر انسان كان مالى اوقاتك بالفرح والحزن فى نفس الوقت كلكو طبعا عرفين انا بتكلم عن ايه ومجربين وعرفين يعنى ايه ذكريات.

خلى قلبك ابيض بقى يا مولاتى

كده بصراحة بقى يا مولاتى الراجل عداه العيب وأزح، مقلش حاجة غلط وبيمد أيده بالسلام ، فمدى أيدك انتى كمان وناخدلوكو صورة زى صور اوسلو 2 وانا بنفسي هاجي اقف وراكو واعمل علامة النصر، خليها عليكي المرة دى واثبتيلو ان الستات حلوين وقلبهم طيب.
و يا جبل ما يهزك ريح

ما احلى الرجوع اليه

بقوللكو ايه .. كفو شركو عني يا ستات وسيبوني اعيش .. انا كنت رايح ومش راجع .. مش زعلان منكو ولا حاجه بس انا قلت اعمل بوصية الست مولاتي ورحت ادورلي على منتج محترم اديله مسلسل المرأة العاملة اللي انا كتبته عشان ينتجه ولا يعمل منه فيلم ، فبصراحه ما لقتش ، لا محترم ولا قليل احترام حتى .. كلهم قالولي اذا كان اللي انت كتبته ده ما عجبش مولاتك نغامر احنا بفلوسنا وننتجهولك ازاي ؟ وانا بيني وبينكو لقيتهم معاهم حق .. اصله المسلسل بتاع المراه العامله لا فيه اكشن ولا فيه حب وغرام ورومانسية ولا فيه بحر ومايوهات ولا حتى لقطات اغراء داخليه .. يبقى مين حيشوفه بأه .. يعني قضيتي خسرانه على كل الاصعدة .. قلت يا واد من فات قديمه تاه وما لكش الا شوية الستات الطيبين دول اللي على قدهم لا عايزين اكشن ولا اغراء ولا رومانسية حتى .. هي شوية الفضفضه واحيانا البكاء على الاطلال وصب جام غضبهن على الرجالة عموما وازواجهن على وجه الخصوص ، وكان الله بالسر عليم .. بس بيني وبينكو كنت قلقان من مولاتي وقلت في عقل بالي ياواد لو رجعت بخفي حنين هكذا حتستقوى عليك وتقعد كل شوية تقطمك وتبستفك عالطالعه وعالنازله ، يعني بالعربي تحل عقدها النسائية فيك .. بعدين افتكرت انها قبل ما امشي على طول كانت توقفت عن الكتابة فانا قلت اكيد مولاتي تنازلت عن العرش ، ولربما تكون حبت الواد الجنايني وسابت الدنيا وما فيها عشانه .. وده اللي بصراحه شجعني ارجع ، بس لجل حظي النحس رجعت لقيتها راجعه تكتب تاني وشاده حيلها عالاخر وفارده قلوعها .. قلت يا واد ما بدهاش ، فرض عليكم القتال وهو كره لكم .. ويا اهلا بالمعارك .. ومع ذلك فنحن نقبض على البندقية بيد ونمد يدنا الاخرى بغصن الزيتون .. ونرحب ايما ترحيب بسلام الشجعان .. يعني مش اي سلام والسلام .. لا ، يا سلام الشجعان يا بلاش . فأن جنحت مولاتي للسلم جنحت لها والا فانها والله الحرب ونحن اهلها .. ولينصرن الله من ينصره ، وما النصر الا صبر ساعة .. وسندخل المسجد كما دخلناه اول مرة .. الله يرحمك يا ابو عمار .. خربتها و .. اه ، انا اسف المدونة ليست للسياسة ولا للكورة مع انه في خبر كروي سعيد بالنسبة للفلسطينين .. والغزازوه بالذات .. النادي الاهلي خد حارس المرمى بتاع المنتخب الفلسطيني ، وهو من غزة ، يلعب معاه .. وبكده حيكون ثاني حارس مرمى فلسطيني للنادي الاهلي بعد مروان كنفاني اللي كان حارس مرمى الاهلي ايام عزه .. ماشي يا مولاتي .. اني خيرتك فختاري .. سلام الشجعان ولا حرب الطرشان ، قصدي حوار الطرشان ؟؟

الستات دول عليهم حاجااات

حاجة غريبة جداً، فى ستات فعلا تغيظ يبقى الواحد مش عارف يعمل فيهم ايه، وانا فى الجيم ( اصلى قررت انى انتظم بقى في الجيم وكده) المهم وانا فى الجيم لا بيا ولا عليا جت واحدة ومشيت على المشاية اللى جمبى وانتو عارفين ان الرغى بيخلى الوقت يعدى والواحد يستحمل التعب ، المهم الكلام جاب بعضه وروحت سألت الست دى هو انتى عندك بيبي؟ قامت قالتلى لا، ف اللى جه فى بالى ساعتها هو انها مش متجوزة اصلا، المهم الكلام جاب بعضه برضه مع المدربة وجت السيرة انى عايزة اشد شوية في التمرين علشان الحق اتظبط واقدر اجيب بيبي ثاني بعد ست شهور ، راحت دى نطت وقالتلى بيبى ثاني؟؟؟ مش بنتك صغيرة قوي على انك تجيبي بيبي ثاني، قلتلها ما انا مش هجيب دلوقتي انا لسه كمان ست شهور ابتدي بقى الموضوع ده ونشوف ويبقى الفرق في العمر 3 سنين مش قليل، قامت عملت بوشها علامة امتعاض كده ، قلت مش مشكلة هى خلقتها كده ، المهم يخونا قامت قالتلى وهو انتى عندك كام سنة ؟.. قلتلها 27 قامت قلبت وشها بقرف كأنها شمت ريحة وحشة وقالتلي ايييييههههههههه 27 ده انا افتكرتك اكبر من كده بكثيييييييييييييييييييييييييييييييير ، ده انا افتكرتك قدى!! قلتلها وعمرك قد ايه ؟؟ قالتلى 37 ، قلتلها يااااه ، والله مش باين عليكي شكلك صغير، قامت تقولي اه فعلا ما انا علشان رفيعة فمش بيبان عليا ، قمت قلتلها اه وانا علشان انا تخينة باين عليا سن زيادة، وقالتلى انها عندها ما شاء الله اثنين.

هكملوكو حكايتها المرة الجاية انشاء الله.

حاجة غريبة يا بسيونى تعالى بص !!

في حاجة غريبة انا ملاحظاها ، اصل انا عملت مخصوص عداد للزوار والعداد عمال يعد الساعة بخمسة جنية والحسابة بتحسب ، ومع انه بيعد مبلاقيش اى تعليق من اى حد ، هل يا ترى العداد ده بايظ ولا الناس مش عايزة تعلق ولا ايه.؟؟؟؟؟؟؟؟؟

ارجو من الاخوة الزوار انهم يعبرونا ويقولو اى حاجة علشان الروح المعنوية بس

وشكرا.

اللي ما يعرفك يجهلك

سبحان الله قالو تعرف فلان قلك ااااااااه اقلتلو عشرتو قلك لأ يبقى ما تعرفوش بقى وما تتفصحن واسكت احسسسن والله زمن العجايب فعلا المثل دا جه في بالي من حاجات كتير بشوفها وبسمعها طبعا وبتحصلي وبتحصل لناس كتير بعرفهم يعني مثلا حسيت في لما قريت موضوع ام العريف اللي يقطع القلب ولما سمرا ردت عليها حسيت فيهم كتير ورأي ان التعليم مش كل حاجه فالدنيا مش التعليم المدرسي قصدي بالعكس دا هو الاهم قصدي الجامعي يعني ممكن حاجات كتير تعوضو زي الخبرة والتدريب والدبلومات والدورات لو الواحد صمم ودور واتعلم حاجه بحبها وتكون هوايه عندو ويعملها هينجح طبعا ويحقق نفسو وكل واحد وحسب ظروفو طبعا عشان انا كمان ما اتفلسفش
اللي ما يتعوضش يمكن ومش يمكن هو اكيد هو العمر اللي راح ما برجعش واحنا بنحب اللي راح عشانو راح ولو رجع هنكرهو يمكن تعرفو الواحد بقى نفسو بحاجات كتير لكن الظروف بتوقف قدامو او يمكن ما يكنش بايدو يعمل اي حاجه بسبب وضع منيل اتحط في مثلا زي أهل غزة في كتير منهم نفسهم بحاجات يعملوها ويحققوها ويروحو وينبسطو ودي ابسط الحقوق ومحرومين منها كمان وما لهمش دعوة ولا بسياسه ولا بحرب بس عايشين لمجرد العيشه حياة واتفرضت عليهم وهي اساسا حرام نقول عليها حياة لكن لا قادرين يتكلمو ولا يخرجو من الوضع اللي اتحطو في غص بعنهم وانا متاكده لو أي انسان تاني من العالم الاخر ولا يمكن يتحمل ربع العيشه اللي في غزة الناس ما بتصدق يجي الصيف عشان تصيف وتسافر وتعمل شوبينج بس مش شوبينج ام العريف طبعا لالا شوبينج بفرنسا وايطاليا عقبال عندك يا ام العريف يعني دول مثلا شو يعملو ولا يعيشو كيف بالرغم من كل دا عايشين وصابرين وراضين وظروفهم اصعب من الصعب الحياه واقفه عندهم بدون الدخول للتفاضيل ...لا والغريبه أحياناً فعلا بتلاقي ناس حققت حاجات وبسرعه وبدون اي عناء ومجهود وناس تانيه بتحارب عشان تحقق القليل بس وما بتقدرش هو اكيد نصيب لكن سبحان الله أرزاق ولا حظ ولا شطارة ولا.... الله اعلم!!! يمكن لو علمتم الغيب لاخترتم الواقـــــع ؟؟؟والحمدلله ع اللي احنا في واللي من الله يا ما أحلا

NO Comment

كلمة حلوة وكلمتين حلوة يا بلدي غنوة حلوة وغنوتين حلوة يا بلدي
أملي دايما كان يا بلدي اني ارجعلك يا بلدي وافضل دايما جمبك على طووووووووووول
زكريات كل اللي فات فاكره يا بلدي قلبي مليان بحكياااات فاكره يا بلدي فين أيام زمان قبل الودااااااع كلمة حلوة وكلمتين حلوة يا بلدي

بحبك وحشتيني بحبك وانتي نور عيني دا وانتي مطلعي عيني بحبك موووت

رفضك يا زماني يا أواني يا مكاني انا عايز أعيش في كوكب تاني فيه عالم تاني فيه لسه اماني فيه الانسان لسه انسان عايش للتانييي

وعدى العمر مش خايف على عمري لكن قد اللي فات عمري ما حسيتو انو فات عمري كأني ما عشتش الماضي وببدأ من جديد عمري بس السؤوال اللي يحير عشت الحياة ولا عشتني
طول عمري مش عايش ليا مستغرب الدنيا وهي عماله تلعب اوي بيا من كتر ما انا شايف منها ما بقتش خايف احزانها وحسبي ربي عالم بيا...

لفو بينا قالو لينا قالو بينا عالمدينه لما جينا التقينا كل شيء فيها ناسينا كل شيء فيها ناسينا

كفايه بعدين تكرهوني اكترمن كده حرام عليا اسمعو دلوقتي اي حاجه على زوقكو البقيه تأتي....شكرا عشان استحملتوني

ويعوض الله

تعرفوا كنت بحلم زمان اني قال ايه اخلص تعليمي الجامعي واشتغل ويبقى ليا حياتي المستقله على المستويين المادي والاجتماعي وحلم الجواز والاولاد ده ما كانش بيجي في بالي خالص وكنت باستبعده جدا مش عارفه ليه ؟! يمكن كان الاقرب ليا هو الحلم الاول لاني كنت بشوف كل الدنيا اللي حواليا بتتخرج وتشتغل وبعدين بيجي موضوع الجواز ويمكن يتأخر كمان لان ده بيبقى نصيب وتوافق والانسان مننا ايه غير قسمه وتوافق وحاجات صغيره فوق بعض .... وحلم التخرج والعمل ده كان بالنسبه ليا مفروغ منه طبعا لان كل الناس بتتخرج من الجامعه حتى اللي في منتهى الغباء واللي مبيعرفوش السما من العمى ولا الالف من كوز الدره (ابو جنيه مش السياحي بتاع مولاتي) وانا طبعا مفروض اني ذكيه صحيح انا مش متفوقه ولا دحاحه لكن يعني اجيب جيد مثلا ورغم كده والغريب جدا جدا بالنسبه ليا اني كنت بافشل فشل زريع ليه ما اعرفش؟ والغريب اني ما كنتش بلاقي حد من شديدي الغباء بيفشل زيي برضه ما اعرفش ليه رغم ان كان بوصل لمرحله اني بحفظ الكتاب حفظ عشان اشوف اخرتها وبرضه مفيش فايده
ولما جاتلي الفرصه انقل علي جامعه محترمه مش مشكوك في اساليب دكاترتها زي الجامعه اللي كنت فيها واهو على الاقل كنت اعرف العيب فيا ولا في حاجه تانيه كان الرفض الغير مبرر من السيده الوالده اللي فضلت تحاربني بكل الوسائل اللي تقدر عليها لغايه ما كسبت هي وخسرت انا و ضاعت فرصة عمري عليا وضاعت معاها حاجات كتيييير كتير اوي
انا مش في مجال دلوقتي للمقارنه باي حد كان ايه بالمقارنه بيا ودلوقتي بقى ايه ... انا مش نمروده بطبعي ولا انا من اللي بيستكتروا الخير على الللي حواليهم بالعكس انا دايما قنوعه وراضيه باللي بيبعتوا ربنا ده حتى اوقات استكتره واقول يااه الحمدلله ده انا ما كنت اتوقع القليل وجالي الكتير ودايما ابص للي اقل مني واقول الحمدلله انا في نعمه اما اللي احسن مني انا مش ببصلهم خالص وباعتبرهم مش موجودين
ورغم كده انا شايفه ان انا اتظلمت واتظلمت كتير كمان لكن خلاص قضي الامر وتتعوض في الاولاد بقى ان عطانا ربنا العمر والصحه

نيلة تنيلكو

جتكوا ستين نيلة تنيلكوا يا كل الرجاله اللي ما فيكم واحد عدل ابدا تموتوا في التحكم الغير مبرر وانانيين بطبعكم ما يهمكوش الا اللي في مصلحتكم وبس انتوا سبب النكد في الدنيا وفي الآخره كمان قال ويقولك الستات هي اللي نكديه ماهو طبعا من اللي بنشوفوا منكم هنعمل ايه غير اننا نتنكد ونقول حسبنا الله ونعم الوكيل فيكم الهي اللي بتعملوه فينا يطلع عليكم ازواجا وافرادا
قولوا آمين

ومـن تكلم عن الناس ...

احنا الحمدلله يا ام العريف طول ما انتو بخير احنا كمان بخير ومكيفين

في ناس عندها هوايات اخرى يا ام العريف وعندي عقده منها والله زي الناس اللي بتتكلم على بعض اللي عندها هوايه نميمه يعني اكيييييد كلكو عندكو فكره عنهم وما بتحبوهم زي أو اساسا ما بعملهم اعتبار عشان هما بيحرقو بدمهم وبنفسهم بس وبطلعو اشاعات كده لوحدهم فجاة دي راحت دي جت دي لبست دي نزلت دي طلعت دي اتنيلت اتجوزت دي اطلقت مش فاهمه شو مدايقهم وحارق دمهم وما يعيش كل واحد براحتو ان شالله يقطع نفسو واحنا مالنا اه ممكن نزعل نتعاطف نتضامن نعبر عن مشاعرنا بس مش لازم نتحشر فيهم ليييييه وليه ونهري فروت اللي جابوهم ونوجع راسنا فيهم كل واحد عندو ظروفو هو ادرى فيها ..يعني مثلا في يوم بتكون قاعد في امان الله بتلاقي اشاعه عليك او على أي حد تعرفو وممكن تكون اشاعه لا تصدق بس خلاص اتقالت وبس ومصدرها واحد مريض طبعا ونفسيتو زي وشو بس طبعا ولا بيهمنا صحيح ممكن نزعل وندايق ونرفز شوي وممكن نروح نبهدل اللي حكا لو عرفنا وأنا متأكده ان كل واحد في الدنيا بتطلع عليه أشاعه لو عمل أو ما عملش والناس طبعا دايما بترجم الشجره المثمرة والله الناس ما بيعجبهاش العجب وكل حاجه بتعلق عليها الوحش والحلو بقو زي بعض حتى لو ضحكنا بتضحكو ليه لو مكشرين هو انتو مكشرين على طول لو فرحنا بنفرح ليه لو زعلنا يووووو انتو نكدييين يعني هو الواحد مش عندو مشاعر وطاقة يتحمل ولا احنا حجر لازم نكون ما بنحسش وبعدين كل انسان بيضعف في اوقات وبيبقى مش طايق حاجه خلاص والله انا بقول خير الامور الوسط واحنا حرين واللي مش عاجبو بلالالالاش يخبط راسو بالحيط او يشرب من بحر........هما لاعاجبهم كده ولا كده فخليناا كده احسن

(علموني كيف اكبر الخط حد يقلي وشكرا )

من راقب الناس مات هما

ازيكو يا حبايب انشالله تكونو كلكو تمام يا رب
يا اخوانا انا عاوزه اسال سؤال بس بيني وبينكم عشان ما حدش يسمعنا ما لاحظتوش ان فيه مشاركه جديده دخلت معانا اسمها ذكريات !!؟؟؟؟؟؟؟
الغريبه ان ذكريات دي بتدخل كتير جدا على المدونه ورغم كده ولا كتبت حتى تعليق على اي حاجه وكل اللي بتعملو انها بتراقبنا ...اللي ما تعرفهوش بقى اني لسه مخلصه المراقبه اللي عليا..قصدي اني عندي عقده من موضوع المراقبه ده اصل الست الوالده ماما يعني ربنا يديها الصحه كانت بتراقبنا وبتسجلنا مكالماتنا ولاني رغايه كنت بجيب القديم والجديد مع صاحباتي على التليفون(اصل وقتها مكانش فيه موبايل) وقعدت انا ارغي وهي تعبي في شرايط لغاية ما صرفت اللي وراها واللي قدامها علي الشرايط وخسرتها الجلد والسقط كمان فقالت خلاااااص كفايه كده وقررت انها تعترفلي بانها بتسجلي وده لانها اكتشفت اني حماره حصاوي وشكلي عمري ما هكتشف الموضوع ده لوحدي وطبعا مش محتاجه احكيلكوا حصل ايه بعدها لاني من كتر اللي حصلي فقدت الذاكره ومش فاكره ايه اللي حصل....بعدها اتخطبت لزوجي العزيز وللاسف هو كمان طلع بيراقبني بس بقى بطرق نواكب عصر العولمه يعني بيخش على الايميل بقى وحاجات كده طبعا ماهو ده التطور الطبيعي للحاجه الساقعه الغريب ان دابما بلاحظ ان كل واحد في الدنيا دي ليه عفريت بيطلعله دايما يعني انا اخلص من ام في السي اي ايه يطلع لي جوز من الموساد (يجعل كلامنا خفيف عليهم ودستور يا اسياد) زي اعرف واحده كانت الحشرات وراها في كل حته حتى في ازايز الحاجه الساقعه المقفوله واكياس الحلويات المقفوله برضه ..عشان كده بقول لكل اللي راقبوني واللي لسه هيراقبوني هتروحوا من ربنا فين ومن راقب الناس مات هماً
تصدقوا جاتلي فكرة مشروع اشارك ماما في انتاج الشرايط اللي سجلتهملي خاصه انها لسه محتفظه بيهم لدلوقتي دي تضرب وتبقى مفاجعة قصدي مفاجأة الموسم خاصه ان الصيف داخل وكل سنه وانتوا طيبين وكله اكل عيش وهسميه مكالمات مراهقه مع الاعتذار لاحمد عز وهند صبري

المرأة العاملة / الجزء الثالث

صباح الخير ولا مساء الخير .. ولا الاحسن من ده كله والاضمن هو طابت اوقاتكن .. انا بقالي مده مختفي ، مش هربان من الهجوم النسائي على موضوع المرأة العاملة اللي بكتبه .. ولا حتى تطبيقا لقاعدة تعلمتها من الزمن وهي ان الراجل الشاطر بيخرج من دائرة التفاعلات لدى المرأة ، خصوصا لما تكون عنيفه .. وبالطريقة دي بيضمن ما يحصلوش حاجه وكمان بيضمن ان التفاعلات حتفضل محصورة في داخل المرأة ذاتها ، يعني بالبلدي كده تاكل بعضها .. انا يا اخواتنا فضلت ابعد الكام يوم اللي فاتو عشان ادي سي السيد والست ام شيرين حرمه فرصه يستعيذو من الشيطان ويصفو النفوس والمياه ترجع الى مجاريها . وهم عادة ده اللي بيعملوه ، يعني على راي الست اطول خصام بينهما كان يروح في يومين .. لكن خصامهما ليه النوبه دي زاد ، وخلى الخطوه بينهما بلاد ؟؟ معرفش انا .. الظاهر والله اعلم ان الست ام شيرين المراه العامله خلاص فاض بيها وماعدتش قادرة تستحمل ابتزاز سي السيد اكتر من كده .. المشكله انها عارفه ومتاكده انه محتاج لمرتبها حاجه ماسه جدا وبصراحه لولا مرتبها كان حالهم بأه بالويل .. يعني لا كانو قدرو يلاقو شقة محترمه زي دي ولا قدرو يشترو عربيه مش بطاله زي عربيتهم .. طب هو مرتبه اصلا ما يكفيش الاكل والشرب واقساط المدرسة ، والباقي كله من مرتب ام شيرين .. العربية والشقه وكسوة العيال وكسوتها وجهاز شيرين اللي هي بتحضر فيه وتستفه في السندرة من دلوقتي .. وشهادات الاستثمار بتوع الواد حمادة اللي بتحوشهم لتعليمه .. ما انتو عارفين التعليم بأه بيكلف اد ايه في مصر دلوقت .. تصورو انا على ايامي كان قسط الجامعه الامريكيه في القاهرة 240 جنيه مصري في السنه كلها مش في السيميستر .. اما دلوقت فالواد ولا البت في الابتدائي عايزله حسبة تلاتين الف جنيه .. الجنيه ما بقاش في بركه للدرجه دي ولا احنا اللي كنا زمان بتوع الجامعات والمدارس مستعدين يدفعولنا من جيوبهم بس نرضى نيجي نتعلم !! المهم .. خلينا في الست ام شيرين اللي رغم معرفتها بكل المعطيات دي سايبه سي السيد يبتزها ويهينها ويستغلها .. عارفين ليه ؟ .. ابدا ، بس لسبب واحد وهو طموحها الزايد عن حده والحكاية اياها بتاعة تحقيق الذات وهي كانت خدت الشهاده ليه ، والموال اللي كلنا حافطينه عن ظهر قلب .. وهو بأه سي السيد مش يلايمها ويخلي عند اهله شويه من الاحمر ولا البني حتى .. لا .. مادام هي ساكته ومستحمله تاخد على دماغها بأه .. اقولكو سر يا ستات .. الراجل بطبعه نمرود وبيستوطي ويركب .. عارفين هي لو شخطت فيه بجد وكشرت عن انيابها ، حيكش على طول ويعمل قط .. لكن هي بأه مش عايزه تصعد الامور ، ومعلش بأه خلي المركب ماشيه وشويه علي وشويه عليك ، ويتضح في النهاية ان كل الشويات عليها هي .. يا سيدي ، هي حره .. احنا علينا نشوف ايه اللي حصل ونحكم بنفسنا

سي السيد فتح التكيف وتمدد على السرير بالاربعه زي ما بيقولو وعايز ينام بعد الغدا .. اصل نومة بعد الغدا دي ملك تاني خصوصا في الصيف .. ام نسرين عاجناه وخابزاه وعارفه انه عايز ينام ، بس على مين .. والله في سماه ما هو نايم في سنته .. غسيل المواعين ما يحلاش بصراحه الا مع المؤثرات الموسيقية ، وايه .. مؤثرات اكشن من اللي هو ، خبط ورزع بكل انواع الحلل والغطيان وعياراتها المختلفه .. سي السيد يتقلب شمال ويمين وشويه يحط المخده فوق راسه ، وشويه تانيه يحط نفسه تحت اللحاف ومفيش فايدة ، واضح ان الحكاية مقصودة وصوت الحلل اللي جاي من المطبخ اكبر كتير مما يحتمل غسيل المواعين ، يعني زي الافلام العربي القديمة ، السيارة خلاص قربت توقف ولا وقفت حتى وصوتها صوت طيارة هليوكبتر في معركة . ما بدهاش بأه ، فرض عليكم القتال وهو كره لكم .. سي السيد قام منتور من السرير وجري على المطبخ .. يعني ياست انتي الواحد ما يعرفش ينامله نص ساعة في البيت المخروب ده .. فاجأته ام شيرين بكمية البرود التي حطت عليها مرة واحدة وبجوابها الذي لم يتوقعه ابدا .. لا ياسيدي ، وتنام ليه اصلا ماتيجي تساعدني في الشغل .. طلب غريب لم يسمعه منها من قبل .. رد سي السيد بغضب .. اساعدك في ايه ، هو ده اللي كان ناقص .. ما تروحي انتي تنامي وانا اكمل بدالك .. بنفس البرود القاتل ردت ام شيرين وهي تغسل يديها وتجففهما بمريلة المطبخ .. كتر خيرك ، ابقى صحيني بعد ساعه ونص عشان ادرس للعيال ، ولا ابقى درسهم انت بيكون احسن . ذهل سي السيد .. ايقن انه امام مخطط لايدري كنهه .. ثمة امر دبر بليل على راي المسلسلات الدينية .. قال لها وهو يحاول استقراء الموقف بحذر شديد .. في ايه يا ست .. انتي اتجننتي ولا جرى لعقلك حاجه .. ردت ام شيرين بهدوء تحسد عليه .. قصدك عقلت .. اتفضل كمل المواعين وبعدين شوف حتطبخ ايه عشان بكره . لم يطق سي السيد صبرا .. جذبها من زراعها وصاح في وجهجها .. لا انتي فعلا اتجننتي . اكسري الشر يا وليه وكملي شغلك بس ما تعمليش دوشه .. دفعت ام شيرين يده بعيدا عن يدها وقالت بلهجة تحذيرية .. اوعى تمد ايدك ولا تلمسني تاني .. خلي لغة التخاطب بينا ارقى من كده لو سمحت .. سي السيد لا يزال مذهولا ، قال في سره الظاهر انا وقعت في مؤتمر تربوي ولا انا خدوني لسيادة الناظر .. في ايه يا ام شيرين عايز افهم .. قالت ام شيرين ، انا اللي عايزه افهم انت مستعبدني ليه .. اشمعنى انا اللي اشتغل بره وجوه وانت اللي ترتاح على طول .. اجاب سي السيد وكأنه قد جاءه الفرج .. لانني انا الرجل الذي يكد ويكدح خارج البيت اما عمل البيت فليس واجبه .. قالت ام شيرين وقد اوقعته في شر اعماله .. طب ما انا بكد واكدح في الخارج مثلك ، ويمكن زياده كمان .. بهت الذي كفر .. كلام جميل ومعقول ومفحم ايما افحام .. لم يجد ردا منطقيا على قولها الا باللا منطق .. قال برعونة الاطفال ، ومين قالك تشتغلي بره .. ما تقعدي في البيت وتحترمي نفسك .. مرة اخرى اثار حفيظتها بقلة ادبه .. ردت بعنف ، وهو انا عشان بخرج اشتغل ابقى مش محترمة .. طب وديني ما انا شغاله ولا معتبة الشغل ده تاني . رد سي السيد بشبه زغروده .. قال ايش بده الاعمى .. ما انا بقالي ميت سنه بترجاكي تبطلي شغل وانتي اللي مستحليه الخروج والدخول كل يوم .. قالت ام شيرين ، ماشي يا سي السيد ابقى شوف حتدفع قسط السيارة ازاي اخر الشهر .. رد سي السيد بحماقة شديدة .. طز .. انشالله ما اندفع مش عايزين سيارة .. قالت بانفعال ، وقسط الشقة .. قال بحماقة اكبر ، طزين ، مش عايزين الشقة حنرجع على بيت العيله عند ابويا تاني . جن جنون ام شيرين .. بأه كده يا سي السيد ، قول انك متفق على كده مع امك .. وانا بقول الراجل بيستفزني ليه كل الاستفزاز ده .. ماشي يا سيدي خلي امك تنفعك .. انا كمان لي بيت اب واعرف طريقه كويس .. خد . خلعت ام شيرين مريلة المطبخ والقت بها في وجه سي السيد واتجهت الى غرفة النوم وسي السيد في اثرها صائحا .. انتي بتهدديني طب المركب اللي تودي ، وابقي خدي العيال معاكي لحسن تتلككي وتقولي انك اشتقتي للعيال فرجعتي ، ولا تقولي للناس اني حارمك من عيالك .. قالت ام شيرين بذكاء يصل الى حد الدهاء .. لا يافالح خلي عيالك عندك وما تنساش والنبي تدرسهم وتعشيهم قبل ما تنيمهم .. وتنساش كمان تطبخ عشان بكره .. والغسيل بتاع امبارح انا لسه مكوماه زي ما هو ، يعني عايز تطبيق ومكوى والذي منه . باي باي يا بوعيالي . ... سي السيد لا يزال مذهولا .. شيرين وحماده استيقظا من نومهما على الصياح المتبادل بين المرأة العاملة وزوجها .. سي السيد يمسك الصغيرين بيديه وهو يصيح بينما ام شيرين تغلق الباب خلفها .. طب وربنا ما انتي معتباه تاني لو خرجتي دلوقت .. الباب كان قد اغلق وام شيرين قد خرجت خلاص .. اما مسألة تعتبه تاني ام لا فالايام بيننا ..
وللحيث بقية ..

الغساله

معلش يا اخوانا انا اليومين الجايين هغيب شويه لان اللاب توب بتاع جوزي جاله سكته دماغيه وربنا يكفيكو الشر وانا لو اضطريت اكتب لازم اخاطر وادخل قوضة الفيران عشان استعمل الغساله اللي بكتبلكوا منها ودي مخاطره كبيره غير محسوبة العواقب لكن هنعمل ايه وادعولنا لاب توبنا يقوم بالسلامه عشان المياه تعود لمجاريها
واهداء خاص لمستر اكس(الذي) وف عز الكلام راح مني وناااام واتاريني تيرارا بكلم الهوا يا عينيا بكلم الهواا..

زملائي الاعزاء...شكرا

بصوا يا جماعة الخير انا فيا حاجه يمكن ما تعرفوهاش انا وللاسف في بعض الواقف بيبقى رايي شديد التطرف يعني يا ابيض ناصع البياض يا اسود غطيس واللون الرمادي حقيقي بيخنقني ماشي يا سمرا كلامك حقيقي ده دورنا ورسالتنا والجزء الخاص بمسؤوليتنا عن الاسرة وده دور صعب جدا واعتقد ان الاجل لا يمكن يستحمل يعمل اللي احنا بنعمله على مدار اليوم هو بيشتغل في اغلب الاحيان 8 ساعات مثلا بعد كده بيروح يرتاح لكن احنا طول ما احنا صاحيين واحنا بنشتغل و ورانا مسؤوليات في المنزل (انا طبعا بتكلم عن الستات صاحبات الضمير) يبقى بعد ده كله إزاي بس اضاعف الشغل عليا اللي انا اصلا تعبانه منه باني اشتغل بره؟ اي عقل واي منطق ؟ ممكن لو اولادك كبار ومعتمدين على نفسهم ..ممكن لو الحاله مبشبشه وعندك شغاله لكن غير كده يبقى انا مصره ان اللي بتعمل كده في نفسها من غير مساعده نفسيه وفعليه من جوزها يبقى تستاهل كل اللي يجرالها
والى من ضيع لما مرتبها اكبر منه وعايش هو على قفا المدام ما بتشبشبش للي جابوه ليه؟ لو بكل بساطه تخلص منه ما هو لا بيساعد ولا كلمه حلوه ولا ذوق ولا حتى كافي خيره شره وحاطط لسانه في بقه يبقى احسن تخلص من عبئه يا اخواننا هي عايزه من واحد زي ده ايه بس؟؟!! ما تقولوليش ضل راجل بقه.

من ضيع في الاوهام عمره .. موضوعك واقعي جدا

بصراحة موضوعك واقعي جدا، واللى يقول غير كده يبقى عايز ينتقد من أجل النقد، دى فعلاً حياة امرأة عاملة، ومش بس عاملة لآ كمان حياتها الزوجية فاترة، اذا أنا اللى مش بشتغل، صباحي بيكون مٌشابه للى أنت قولتو، لما بصحي الصبح بجرى علي ملى وشي بدخل بسرعة أعمل لجوزى السندوتشات وبعدها أجرى علي غرفة بنتي أصحيها وبعد كده اغسلها وشها وأغيرلها والبسها، يكون جوزي طلع من الحمام، أحضرله الفطار، وافطر البنت ،وبعد كده اجرى اعملها سندوتشات الحضانة ، وكل ده لازم يحصل خلال ساعة او ساعة ونص بالكثير ، ده طبعا بيتخلله طلبات فين الشراب ، الشاي عايز سكر ، البنت تجرى مني وانا بلبسها ، فا انا متخيلة لو فعلا انا بشتغل وهعمل ده كله وبعده هلبس وافطر واجهز نفسي انا كمان ، ده انا كنت اتجنتت، وانا مش شايفة ان الواحدة لما تشوف طلبات جوزها وتكون بتدرس عيالها وتخدمهم انها في الحالة دي بتبقي سيرلانكية او محتاجة تخلع جوزها، ده واجبها ودى حاجة المفروض تخليها فخورة بنفسها، اللي يضايقها فعلا اهمال جوزها ليها المتعمد، مبتكلمش علي انه بيشوف الاخبار الصبح ومش بيساعدها لآن معظم الرجالة كده ، مش هيساعد وهو نازل شغل ولا جاى من شغله .

بصراحة يا ام العريف انتى كنتى متعصبة جدا في ردك على القصة دى ، يمكن لانك مجربتيش يكون عندك مسؤلية الصبح انك تفطري عائلة وتفطرى وجوزك وتكوني مضطرة تنزلي علي شغلك كمان، واللى أيده في المية مش زى اللي أيده فى النار، واللى مايعرفش يقول عدس..واذا احنا يا ستات قلنا على بعضنا كده وكان حكمنا كده علي ظروف بعض ، يبقى الرجالة ليهم حق يدونا بال...... باللي عايزينو بقي.

قالت يا ولدي لا تحزن

النقد عليك هو المكتوب يا ولدي.... رسالة الي من ضيع في الاوهام عمره.. لاتحزن وتشجع ، في انتقادات كثير جايالك بس ده مش معناه انك تُحبط وتبطل كتابة ، احنا مازلنا بنرحب بيك وبمواضيعك ، وزى ما انا قلت قبل كده كل واحد حر يكتب الموضوع اللى هو عايزة ومن حق اى حد انه ينتقد براحته برضة ما دام النقد ده مفيهوش تجريح ، بعدين انت لو كنت قدمت السبت كنت هتلاقي الاحد قدامك ، بس يظهر انك نسيت اول مرة كتبت نقدك فيها انك واقع في مدونة ستات وان كيدهن عظيم ، ولكن معلش انشاء الله مع العـشرة هيحصل هدنة . اما عن رأيى الشخصي في المرأة العاملة ، ف انا على خلاف مع ام العريف ، بس انا مضطرة اقوم دلوقتي ولما ارجع انشاء الله هكمل.

فينك يا مولاتي .. تنازلتي عن العرش ولا ايه ؟!!

صباح الخير يا مولاتي .. انا قريت تعليقك على الجزء الاول من المرأة العاملة ، ولانني رجل ، يعني شديد الذكاء عرفت ليه انتي على طول كده بتخانقي دبان وشك .. انتي اكيد امرأة عامله .. بس والعلم عند الله لسه لم يستعبدك الرجل بمنحك امتياز العمل لزيادة دخل الاسرة وتحسينه .. يعني من الاخر كده لسه ما دخلتيش دنيا .. وبيني وبينك بس من غير زعل ولا شتيمه يعني وما تقوليش على موضوعاتي بايخه ، انتي بالعصبية دي عمرك ما حتدخلي دنيا ولا تعرفي بابها فين .. لا انا مش بفول عليكي ( من الفال وليس الفول ) انا بس بلفت نظرك عشان انتي صعبانه علي ومستخصرك في العصبية .. اصلك بتكتبي حلو ومسلية جدا ، وانا بصراحه زعلت وقلقت لما شفتك اختفيتي كده لعل المانع خيرا .. اذا كان علي انا وموضوعاتي البايخه ما تشيليش هم .. انتي اؤمري وانا اوقف كتابة من دلوقت ، بس ما تهربيش من اول جوله كده وتنسحبي من المدونه .. ارجعي اكتبي وزي ما لاقيتي واحد بينتقد اللي بتقوليه ، بكره يمكن تلاقي ميه يعجبو بكلامك .. وبيكي كمان ياست ولا تزعلي ..

العلبه القطيفه(تعليقا على الجزء الاول من المراه العامله)

انا بصراحه عاوزه اعرف إذا حقيقي في واحده ست عايشه حياه زي كده زي ما صورت القصه انها يعيني طالعان عينيها الاتنين ومش ملاحقه تخدم ولادها ولا جوزها (اللي صورته القصه في دور اقرب ما يكون للكومبارس الصامت ) ولا تنظف بيتها ولا لسه بقى شغلها اللي اكيد همه ما يتلم من ضغط اعصاب ومسؤليه وخلافه...كل ده ليه ؟ ومقابل ايه ؟ لو علشان الفلوس برضه ليه هل جوزها دخله مش مكفي ؟ وإذا دخله مش مكفي ايه السبب ؟هل هي شايفه انه قليل لانه مش مكفي مصاريف مدارس اجنبيه للاولاد وموبايل ليها وللاولاد آخر موديل ويتغير كل كام شهر ومش مكفي إشتراك البيوتي سنتر عشان جمال المدام ومش مكفي قسط العربيه الفور باي فور وقسط الشاليه اللي علي البحر لزوم تصييف الاولاد؟؟ والله لو كان كده يبقى ضروري قى تشتغل عشان يقدروا يجيبوا ده كله بس في الحاله دي يبقى هي اللي جايباه لنفسها واللي بيحصلها ده اقل واجب وحق جوزها يقعد ويحط رجل علي رجل واياكش هي تولع هو ماله ما هي اللي عاوزه كده ولو اني مستغربه لما هي متطلبه كده ما اتجوزتش من اولها ليه رجل اعمال يوفرلها كل ده ؟ ولا هو ده اللي اتقدم ومالقتش غيره؟ اما بقى إذا كانت غلبانه وراضيه بقليلها بس راتب جوزها مش مكفي الاساسيات طيب ليه ما يدورش على شغل احسن ولا يشتغل بعد الظهر اي حاجه ولا بهدلة مراته وفي الحالة دي يا إما هو راجل خسع وبيقبل على مراته البهدله او هو بوروطه مش بتاع شغل طيب برضه الحاجات دي بتبان قبل الجواز يعني خطأ منها في الاختيار من الاول يبقى تشربه وهي ساكته لان محدش ضربها على ايدها عشان تتجوزوا ده غير انها مازالت مستمره في الخطأ بأستمرارها في الجواز من راجل زي ده رأيي تخلعه في ستين داهيه واهي تبقي ريحت نفسها من خدمته اما إذا كان مسكين بتاع شغل وبيحب مراته ومش هاين عليه يبهدلها في الشغل وحاول يلاقي شغل وحظه وحش طيب مش بيساعدها ليه في مسؤوليات البيت والاولاد رغم ان هي بتساعده في المصاريف ؟ ما هو يا عديم الاحساس وواحد زي ده ما يستاهلش اللي بتعمله عشانه يبقى مكمله معاه ليه؟ او بقى هي اللي عودته وتستاهل برضه اللي يجرالها انها ما اخدتش معاه موقف حازم في الموضوع ده يا اما بقى حالها من حال واحده صاحبتي جوزها وصلها لحاله من عدم الثقه بالنفس وانها ماكانتش تستاهله وان الحمدلله انه رضي بيها رغم انه العكس هو اللي صحيح بس مسح المخ بقه وصلها لدرجة انها بتشتغل وتصرف عليه وهو ما بيعملش حاجه تبقى برضه تشرب وهي ساكته او لو هو فعلا الوضع كده يعني وحشه في عين جوزها وهو شايف ان مستواها اقل منه وهي قبلت تعيش معاه على الوضع ده يبقى برضه تستحمل وهي ساكته اما بقى لو بتشتغل عشان بقى تحقق ذاتها والكلام الخايب اللي لا بيودي ولا بيجيب يبقى انا مش عاوزه اكمل حكاية الست دي لان العالم دي بتخنقني وآخر حاجه اقولهالها في كل الاحوال انت السبب الاول والخير في كل اللي انت فيه واشربي وانت ساكته لان اللي زيك هما اللي جابوا الرجاله ورا وعلموهم البلاده وقلة النخوه وابتدت تختفي نظرتهم للمراه على انها كائن لطيف رقيق ناعم اقل حاجه تجرحه ومحتاج لعلبه قطيفه تحفظه ويعامل بمنتهى النعومه وان المراه ملكه في بيتها كلها دلع ورقه ولطافه تأمر فتجاب ولو بعد حين جتكوا نيله جبتونا ورا

المرأة العاملة .. الجزء الثاني

صباح الخير يا اخواتنا .. شوفو انتو عندكن الساعة كام دلوقت وحولوها حسب فروق التوقيت .. انا بالنسبة لي صباح الخير ولسه يادوبك صاحي من النوم .. بس الحمد لله غسلت وشي وفطرت كمان .. ماهو انا مش موظف زي الست ام شيرين مرات سي السيد اللي بتصحى والديك بيدن كوكو كوكو في الفجرية ، مش عشان تعجن لا سمح الله .. لا ده كان زمان .. ايام ستي وستك .. النهارده الحمد لله في مخابز بتبيع العيش جاهز .. يعني الستات ارتاحو من دوشة العجين وهدة حيله ، وكمان من الخبيز ونار الفرن وبهدلته .. وبقت الست معززه مكرمه مرتاحة على الاخر .. طبعا مع توفر الاختراعات الحديثة اللي كلكن عارفينها من التلاجه والبوتجاز للكوفي مشين .. تحمد الست ربنا وتشكر فضله وتهدا وتكن بأه ؟؟ ازاي !! وحريتها ومساوتها تسيبها لمين .. وهدى شعراوي الست الكبارة صاحبة الدعوة النبيلة لتحرير المرأة تموت فطيس يعني من غير هدف ولا ايه !! .. تقوم الست تصر على انها تشتغل زيها زي الراجل .. يقوم الراجل بصفته اكثر خبثا من المرأة في كثير من الاحيان يستغل الرغبة دي عند المراة ويحولها الى ضرورة قصوى والى حاجة اساسية لايمكن للاسرة انها تعيش حياة كريمة من غيرها .. وبكدة يا ستات يا حلوين وقعت المرأة في الفخ .. وعادت عن طريق العمل الى عبودية الرجل من جديد .. راجل مستعبدها في الشغل ، الا فيما ندر عندما تكون رئيستها في العمل امرأة وفي الحالة دي بتكون عبوديتها اكبر واشد قسوة وايلاما .. وراجل تاني .. ايوه سي السيد بعينه .. مستعبدها في البيت .. ازاي ؟ اقولكو ازاي .. بس ياريت اللي لم يقرأ الجزء الاول يرجع يقراه عشان يستوعب الجزء التاني ده كويس . وايضا ارجع والفت الانتباه الا انني لا اقصد نقد المرأة او لومها بما اكتب ، وانما احاول ان الفت الانتباه الى ما قد يكون فاتها عندما وقعت في شرك العمل واصبحت الست الجارية العاملة .. نتوكل على الله ونبدأ استئناف الموضوع من غير زعل انشاء الله ...

يلقي سي السيد الست ام شيرين زوجته على باب المؤسسة التي تعمل بها كما يلقي كيس مهملات ويندفع في طريقه الى عمله من جديد والشر بيطق من عينية .. اصله الست ام شيرين اخرته .. معلش الفولت بتاعها كان واطي النهارده وطاقتها الانتاجية لم تكن في عنفوانها .. تدخل ام شيرين الى المؤسسة وتتصنع ابتسامة لا لون ولا طعم لها علها تغري المسئول عن سجل توقيع الموظفين حضورا وانصرافا يغض الطرف عن تاخرها بطريقته الخاصة .. تصل الى مكتبها فينظر اليها رئيسها في العمل نظرة اعتادت ان تفهم معناها .. ويزفر زفرة تسمعها بكل حواسها ، وتكاد يلفحها لهيبها وهو يقول .. مفيش فايدة .. وهي ولا كأنها سمعت حاجه .. رائحة الفول والطعمية تنبعث من الغرفة المجاورة .. تتذكر انها لم تتناول الافطار بعد .. تتبع الرائحة كما يتبع الفأر جيري رائحة الجبن الى مصدرها في افلام الرسوم المتحركة .. يهتف الزملاء والزميلات عندما يروها .. اتفضلي ، بسم الله .. ويستمرو في عملية الوهم المتبدد والموجهة اصلا الى مقولة اللقمة الهنية بتكفي ميه .. هو معرفش في انهي زمن كان ده ، بس هي على اي حال مجاملة والسلام .. الست ام شيرين العاملة تفلت ببضع لقيمات يقمن اودها الى حين العودة الى البيت .. قال يعني الخروف المحشي مستنيها في البيت .. تمضي الست ام شيرين الى روتين عملها اليوم .. اوامر متلاحقة من السيد المدير .. مضايقات لا تنتهي من الجمهور واحيانا من الزملاء .. وايضا بعض الغزل والتحرش الذي يصل الى حد السماجة احيانا .. ومعلش يا بت استحملي .. اكل العيش عايز كده .. يدق جرس هاتفها المحمول .. هو مش جرس بصراحه بس جرت العاده اللغوية على تسميته جرس .. الادق هو ، يغني هاتفها المحمول فترد من فورها على سي السيد وقد عرفت رنته بالطبع .. يقول بطريقة استفزازية ساخره .. الكفتة اللي عملتيها للغداء بالطحينة ولا بالطماطم .. تكتم ام شيرين غيظها وترد بهدوء .. يا حبيبي ما انت عارف اني امبارح بالليل ما لحقتش اعمل حاجه .. يادوبك غسلت وكويت بعد ما درست العيال ونضفت المطبخ ، وعلى ما حضرت جدول المدرسة ورتبت الشنط كنت خلاص استويت ونمت مكاني .. يقاطعها سي السيد قائلا .. مفهوم مفهوم .. حفظنا الدرس من زمان .. يعني اجيب معايا حاجه جاهزه للغدا ولا علب السردين والتونه ماليه البيت .. بنفس الهدوء تجيبه .. اللي انت عايزه يا حبيبي بس ارجوك انا عندي شغل ومش لاحقة .. يقول بغضب وهو ينهي المكالمة .. طيب ياوزيرة اللي هو .. ادي اللي احنا ماخدينه من شغلك ..
تبتلع ام شيرين الاهانة وتواصل العوم تحت اكداس الملفات التي يجب الانتهاء منها اليوم .. يمضي يوم عملها كبقية الايام .. نفس المنغصات ونفس المعوقات ونفس الرتابة وهدة الحيل كمان .. ينتزعها من غياهب الاستغراق في العمل غناء هاتفها النقال من جديد .. يا الله .. انه هو .. كم الساعة الان .. يبدو انني نسيت نفسي .. تفتح الهاتف في اضطراب وتقول فيما يشبه التوسل والرجاء .. معلش يا حبيبي الشغل كبس علي ، انا نازله حالا .. ما ان تصعد الى السيارة حتى يبدأ موشح انا في انتظارك مليت ويضيف عليه سي السيد هذه المرة صب جام غضبه ولعناته على اليوم اللي سمح لها فيه بالعمل .. وتهديد بان يكون هذا الشهر هو خاتمة الاحزان .. اقصد خاتمة تاريخها النضالي في العمل .. تتشاغل ام شيرين عنه بمداعبة الاولاد والسؤال عن كيف كان يومهما المدرسي .. يستمر الموشح مسافة لابأس بها من الطريق ثم يسود صمت مطبق لا تقطعه سوى زفرات سي السيد التي تعبر عن ماهو واقع تحت نيره من ظلم شديد وعدم استمتاع بالحياة .. ولا حتى لقمة هنية .. او اي لقمة والسلام بس تكون سخنه وطرية ..
في البيت تلقي ام شيرين بحقيبتها حيثما اتفق وتهرع الى المطبخ تخرج علب السردين وتسخن الخبز وتعد وليمة الغداء فسي السيد لم يسمح وقته بشراء طعام جاهز .. سي السيد يدخل مباشرة الى الحمام ليزيل عن بدنه وعثاء الطريق والعمل في ذلك اليوم المكفهر القائظ الحر .. شيرين واحمد في غرفتهما يحاولان تبديل ملابسهما . . الغداء يصبح جاهزا وسي السيد منتعش تماما بعد الدش الساقع الذي تنعم به .. يجلس الى المائدة بينما تبدل ام شيرين للاولاد ملابسهما وتحضرهما معها لتناول الغداء .. ما ان تجلس الى المائدة وتمد يدها الى الطعام حتى يبدأ سي السيد موشح ظلموه .. يعني الواحد لو اضطر يعمل عملية في بطنه الدكتور لازم يلبس بدلة غوص .. اصله حيلاقي نفسه فجأة في بركة سمك سردين .. انا مش عارف الرجاله بتتجوز ليه .. ولا يمكن مش كلهم زيي .. اكيد في منهم بيعرفو يعني ايه طبيخ وشوربة ومحمر ومشمر والحاجات دي يعني اللي كنا بنسمع عنها ايام الستات اللي كنت محترمه نفسها وقاعدة في بيوتها تشوف شغل بيتها ومصالح عيالها وجوزها .. الى هنا وانقطع الاستقبال عند الست ام شيرين .. طفح الكيل .. القت باللقمة التي في يدها وهبت واقفه وهي ترغي وتزبد .. واللهي العظيم ما انا واكله .. هو كل يوم سمة بدن بالشكل ده .. يعني الحق علي اللي بشتغل وبطفح الكوتة عشان اساعدك في المصاريف .. قاطعها صائحا .. حيلك حيلك .. تساعدي مين .. هو انا اشتكيتلك .. طب ايه رايك ما نتيش رايحه الشغل من بكره .. دنتي اصلا اللي بتكسبيه من الشغل بيروح على لبسك ومكياجك يا هانم .. حمي الوطيس فانسحب احمد وخلفه شيرين الى غرفتهما واغلقا الباب ليتركا حلبة الصراع خالية الا من المتصارعين .. لم تشأ ام شيرين ان تصعد الموقف وذلك من واقع خبرتها الطويلة في مثل هذه المواقف .. وكالعادة حطت همها في تنظيف البيت .. بدأت برفع الاطباق عن المائدة حتى وسي السيد لم ينته من طعامه بعد ، ما دفعه الى القاء ما بيده من خبز على الطاولة بعنف والانصراف الى سريره يتمدد عليه كعادته بعد الغداء يشاهد التلفاز استعدادا لنومة القيلولة .. اما الست ام شيرين فقد بدأت برنامجا تحفظه عن ظهر قلب .. تنظيف المطبخ .. لا ليس تنظيف المطبخ بل تجميع الاواني والاطباق في الحوض تمهيدا لتنظيفها فيما بعد .. والانتقال الى الحمام مع شيرين واحمد لياخذ كل منهما دش كل يوم .. ومن ثم العودة الى المطبخ ومنه الى بقية ارجاء المنزل .. وهكذا دواليك ..
وللحديث بقية ....

التكرار يعلم الشطار!

قال التكرار يعلم الشطار قال ، كلام فاضى ، وبالذات مع الرجالة اى والله، بجد الواحد مش عارف يقول ايه ، سبحان الله فعلاً ، تفتكروا هما بيكونوا اتعلموا وبيطنشوا ويعملوا اللى فى دماغهم برضة ولا مساكين واحنا اللى ظالمينهم وهما مبيكونوش واخدين بالهم.؟؟!!

بجد انا مش عارفة اقول ايه غير اني حاسة ان راسي هتفرقع من الغيظ ، مش عايزة اقول حسبي الله ونعمة الوكيل علشان محدش يجرالو حاجة بس هقول ايه طيب ... هقول منه له ..منه له

وقال على رأي المثل ، تيجي تصيدو يصيدك ، والمعني في بطن الشاعر، والشاعر لازم يبقى همه علي بطنه .

المرأة العاملة (الجزء الاول)

في البداية عايز اوضح حاجه مهمه يمكن تخلي الستات تهدى وماتدورش الضرب على طول من غير لا احم ولا دستور .. انا لا اعني النقد ولا اظهار عيوب السيدات بهذا المقال .. كل ما ارمي اليه هو لفت انظارهن الى حقائق على ارض الوقائع لو انهن انتبهن اليها لكان رايهن هو نفس رايي .. تمام كده ؟ يعني مفيش ضرب انشاء الله ؟ توكلنا على الله .

المرأة العاملة يا اخواتنا ، الشرقية بالطبع ، هي مثال حي على كون المرأه الشرقية تعشق تعذيب الذات وتشتري بعبوديتها للرجل حرية زائفة لا معنى لها .. ازاي ؟ اقوللكم ازاي .. ربنا فتح عليها واتوظفت زي ماهو كمان متوظف .. خلينا ناخد يوم من حياتهم ونشوف .. يادوبك الديك يأدن كوكو في الفجرية ، تفز من نومها مفزوعه زي اللي قرصتها عقربة وجري على اودة العيال .. اومي يا شيرين ، قوم يا احمد .. ياللا يا حبيابي مفيش وقت .. وتتركهما بعد الانذار الاول وتهرع الى المطبخ تضع ابريق الشاي على النار وتخرج اللبن من الثلاجه وشوية الجبنة والمربى والذي منه وتلقي بربطة الخبز على الطاوله ثم تعود مهرولة الى غرفة نوم الاولاد .. انتو لسه ما صحتوش .. يالله بأه بلاش دلع اتاخرتو عالمدرسه .. ياللا ياوله بلاش لكاعه .. وتجذب احمد خارج الفراش ، فتشتري شيرين نفسها وتزيح الغطاء بعيدا فتطمئن الام العاملة الى ان كل شئ يسير حسب الخطه .. تعود مهرولة الى المطبخ لتغلق البوتجاز فالماء في ابريق الشاي يغلي .. تعد الشاي وتضعه على الطاوله وترجع ثانية الى غرفة الاولاد ، وبدون اي كلام تشد شيرين واحمد من زراعيهما الى الحمام ليغسلا وجهيهما وينظفان اسنانهما ويقضيان حاجتهما اذا لزم الامر .. تتركهما بسرعه بعد ان يكون سي السيد قد اصدر صوتا هو في الواقع اعلان عن استيقاظه من النوم .. تنشغل باعداد قهوة الصباح له .. في هذه الاثناء يكون احمد قد بلل ملابسه بالماء وهو يحاول غسل وجهه .. تصيح شيرين الفتانه باعلى صوتها .. الحقي يا ماما ، حمادة غرق نفسه .. تركض الى الحمام تبدل لاحمد ملابسه كاملة .. ينادي سي السيد طالبا القهوة .. تترك احمد وشيرين وتعود الى المطبخ لتصب القهوة وتحملها الى سي السيد ثم تعود الى احمد وشيرين وتصحبهما الى غرفتهما ليرتديا ملابس المدرسة . تخرج لهما الملابس المطلوبة من الخزانة ثم تعود الى المطبخ لتعد الافطار .. يصبح الافطار جاهزا على الطاولة .. تهرع الى غرفة الاطفال .. احمد لا يزال بالملابس الداخلية .. اصلة ما بيعرفش يلبس .. ماشي .. البس يا احمد وخلصني على الصبح .. يصبح احمد جاهزا للخروج .. يسبق امه الى المطبخ ريثما تمشط لشيرين شعرها .. تعود الى المطبخ ويجلس الجميع الى مائدة افطار الصباح وفيروز تغني سالوني الناس عنك يا حبيبي .. اين حبيبها ؟ يالله يا سي السيد الفطار جاهز .. يقطع سي السيد دندنته امام المرأه وهو يسرح شعره تارة الى اليمين وتارة الى اليسار .. يصيح بكل الحماشة التي في الدنيا .. طيب .. احمد يرفض اخر لقمة وراسه والف سيف انه شبع خلاص .. يترك المطبخ ويركض الى الصالون ليشاهد التلفزيون وتلحق به شيرين .. لم يبق على موعد الخروج من البيت سوى ساعة واحدة .. تركض الى غرفتها لتبدأ في ارتداء ملابسها .. تتذكر انها لم تغسل وجهها بعد .. تتجه الى الحمام فترى ان سي السيد قد انتهى من افطاره .. تعرج على المطبخ لتزيل بقايا الطعام وتعيد بعض الاطباق الى الثلاجة والبعض الاخر تلقي به في حوض المطبخ .. تهرول الى الحمام تغسل وجهها .. تتذكر انها لم تعد سندوتشات الاولاد بعد .. تنادي على سي السيد وتطلب منه ان يساعدها باعداد السندوتشات ريثما ترتدي ملابسها . يصيح سي السيد بعدم اكتراث وهو يحدق في التلفزيون ويرتشف ما تبقى من كوب الشاي .. استني بس تخلص الاخبار . . اية اخبار هذه التي يمكن ان تنتظرها .. تعود وهي نصف عارية الى المطبخ .. تعد السندوتشات وتضعها في حقائب احمد وشيرين ثم تركض الى غرفتها لتكمل ارتداء ملابسها .. يبدأ سي السيد في التململ .. ينظر الى ساعته .. يرفع عقيرته بالصياح .. وينك يا ست .. مش باقي غير نص ساعه انا نازل اسخن السيارة .. تهتف كالغريق من تحت الماء .. طيب خد الاولاد معك الله يخليك .. لحظة صمت ثم ياتيها صوت انفجار من الصالون .. كيف بدي اخدهم .. احمد لسه حافي .. هاتيهم معك يا ستي . تصمت مغلوبة على امرها وتكمل مايمكن ان يطلق عليه مكياجها مجازا .. يعني على راي اللي قالت ، فرشه كده وفرشه كده .. تخرج الى الصالون وهي تلهث .. تمسك بحذاء احمد في يدها وحقيبتها وحقيبته في اليد الاخرى وتحاول ان تمسك بيد احمد فلا تستطيع .. تعطي الحذاء لشيرين وتشد احمد من يده ثم تغلق الباب وتهرول الى المصعد .. السيارة تقف على باب العمارة في انتظارها .. سي السيد يجلس خلف مقعد القيادة ودخان سيجارته يتصاعد كمدخنة كبابجي عندما تكون اللحمة كثيرة الدهون . تفتح الباب الخلفي وتدفع بشيرين واحمد الى داخل السيارة . تجلس في المقعد الامامي وتستدير للخلف لتمسك بقدم احمد وتلبسه الحذاء .. ينفث سي السيد دخان سيجارته بغضب واضح قبل ان يندفع بالسيارة بعنف يوحي بعدم رضاه عن الدنيا كلها .. يصيح في وجه زوجته .. يعني مفيش فايدة .. عمرك ما حتظبطي موعد الخروج الصبح .. لازم كل يوم تاخرينا .. عيشه تطهق .
تحدق المرأة العاملة في وجه زوجها وتهمس لنفسها .. يا فتاح يا عليم يارزاق يا كريم .. تمضي السيارة في طريقها وفيروز تغني .. بكتب اسمك ياحبيبي عالحور العتيق .. تكتب اسمي يا حبيبي عرمل الطريق ..
نواصل غدا انشاء الله

وعايزها محافظ ولا شيكات؟

ده جزء من اغنيه في فيلم مولد يا دنيا المفروض ان عفاف راضي عامله جنيَه ومحمود يس طالب فلوس فبتقوله وعاوزها محافظ ولا شيكات..اما اللي فكرني بالاغنيه دي هي اني زهقانه وانا ما بزهقش غير من حاجتين المرض بعيد عنكم وقلة الفلوس اصل انا احسن فسح عندي هي حاجه من الاتنين يا نسافر نقعد يومين تلاته في فندق او منتجع سياحي على البحر والموضوع ده بيبقى بالكتير مرتين في السنه عشان ظروف عمل جوزي اما بقي الفسحه التانيه اللي ممكن تعيد الى وجهي الابتسامه والاقي الدنيا ربيع والجو بديع ومحلاها عيشة الفلاح هي الشوبينج ايوه الشوبنج ثم الشوبنج ثم الشوبنج انشالله حتى لو ما اشتريتش حاجه ليا واشتريت لبنتي بس او حاجه للبيت ياااه اد ايه بانبسط وبحس براحه نفسيه والصعب بيهون وبتقبل كل حاجه مهما كانت صعبه وهنا انا ممكن اقول لجوزي على نقطة ضعف فيا ممكن يستغلها انه لو عاوز يبلغني بأي حاجه وخايف من ردة فعلي او عاوز يطلب اي طلب ومتوقع رفضي انا انصحه انه انسب وقت هو وانا راجعه بعد رحلة شوبنج حتى لو قالي مثلا حبيبتي انا اتجوزت عليكي ..صدقوني ردة فعلي هتختلف تماما لو كنت لسه راجعه من الشوبنج او بقالي فتره محرومه منه
اللهم دم علينا نعمة الشوبنج واحفظها من الزوال يا رب

وقوع البلا ولا إنتظاره

يا اخوانا انا جالي الهسهس خلاص في دماغي مع انفصام كتاتوني وهلاوس سمعيه وبصريه انا قاعده بعد الدقايق وكل شويه اقول دلوقتي هيرن الجرس والاقي بنت الجيران في وشي ويا سلام بقى لو الجرس ضرب فعلا بابقى مش عارفه اعمل ايه ولا اروح فين ولا اجي منين انا بقالي يومين مش بطلب دليفري(يا فرحة جوزي) وده لاني خايفه لما الدليفري يجي هيرن الجرس طبعا وانا بقى إش عارفني ده اللي انا طالباه ولا بنت الجيراان؟؟؟
هتقولولي بصي من العين السحريه.. فالحين اوي قال يعني انا مش عارفه الحل ده هو حل غير مجدي (بضم الميم) وده لان بعيد عنكم ورغم ان المثل بيقول العين ما تعلاش على الحاجب إلا إن العين عندي عليت مش بس عن الحاجب عني انا كلي اي نعم انا قصيره وازعه بس مش كده يا اخواننا الرحمه حلوه يا سلام صحيح الطول هيبه والقصر خيبه والطويله تقضي حاجتها والقصيره تقف فوق ترابيزتها المهم وبفرض اني جبت كرسي ولقيت بتاع الدليفري هبله انا بقى افتحله بالبساطه دي ما يمكن البنت واقفه وراه ..وبعدين اعمل ايه ؟؟ انا النهارده ربنا سترها معايا ان الباب ضرب وجوزي موجود حيث جاتلي الحاله وبقيت رايحه جايه وبهلوس واقول بنت الجيران بنت الجيران فراح مكبر في ودني وقاري عليا عدية يس فابتديت افوق وقلت انا فين خير اللهم اجعله خير ..قالي روحي افتحي الباب ولو طلعت هي قوليلها اني نايم ومش هينفع تلعب مع بنتي عشان ما يعملوش دوشه ودخل وخد بنتي معاه عشان ما تشبطش في بنت الجيران والحمد لله عارفين طلع مين الراجل السكره محصل الكهربا وتلاقي الراجل استغرب إشمعنى المره دي مقابلاه بالترحاب وكمان اديتو بقشيش محترم ياللا مش خساره فيه حلاوه إنقشاع الغمه
وفوتكم بعافيه