سبحان الذي سخر لنا هذا ..

نحمد الله حمدا كثيرا ونشكره على فضله ونعمته بان جعل ام العريف تعترف بان لنا فايده في هذه الدنيا ، اي فايده مش مهم .. والحمد لله ايضا انني انا شخصيا رغم عدم معرفتي بلعبة الشطرنج ، وعدم اتقاني لطاولة الزهر وبدليل موشح خالتي دوسة ودرجها ونظرها اللي شيش بيش ، الا انني لا ازال مسليا للست ام العريف ، ده طبعا في اوقات الهم والغم لما جوزها بيكون مش قادر او مش فاضي يفسحها ويسليها وبتكون جارتها وبنتها طفشانين منها . يا ستي مش اشكال ، عايزه تتسلي علينا ماشي ، بس سيبك من التحقيقات الفدرالية اللي كل شويه عاملاها معانا ومصره انه انا بالذات فاهم تهمتي وعارف جنايتي كويس اوي بس بأستعبط .. والنبي انتي شكلك كده من بتوع كلم الباشا عدل ياد !! والحمد لله للمره الالف اني بعيد عنك والحكايه قاصره على الكلام وبس ، يعني كتابه في كتابه وكان الله يحب المحسنين ، وعمرها ما حتبقى ملك ابدا ، ولو انه منصب الملكه اصبح شاغرا برحيل الاخت مولاتي الى الاسماعيليه اللي شكلها خارج نطاق التغطية . وبيني وبينكو شكلها تلكيكه من الملكة السابقة ، بس معلش كل واحد وظروفه بأه . على كل الاحوال انا عايز الاخت ام العريف ما تقلقش ابدا ، يعني احنا تحت امرها في اي تسليه ولا الحوجة للب ولا السوداني ، بس ما تكنش دي احدى وسائل انتزاع الاعترافات من المتهم اللي ما عملش حاجه ، اصله بحر الاستخبارات والتحقيقات ده غميق اوي وما لوش قرار .. وام العريف باينها عميلة مخضرمه ومتوتكه اوي ولا تقولي كولومبو ولا كوجاك ولا حتى يسري بيه .. مين يسري بيه ؟ انتي روحي مديريه الامن واسألي وهم حيقولولك بالتاكيد

اقل حاجه عندي

يا جماعه انا والله وضحت سؤالي كويس وانا متأكده مليون في الميه ان من ضيع فاهم سؤالي كويس وده باين اصلا من كلامه على العموم مش مشكله انا متنازله عن حق الرد
انا مبسوطه النهارده علشان سمعت خبر حلو عقبال عند الجميع يا رب رغم اني وكالعاده بمر بوعكه صحيه بس ده العادي بتاعي يعني زي ما بيقولو اقل حاجه عندي
اكتر حاجه غيظاني النهارده ان النهارده الخميس وطبعا بكره الجمعه هتقولولي وفيها ايه ؟ هقولوكوا ان قناة ال (mbc) وللاسف الشديد يوم الجمعه والخميس مافيش مسلسلات قال يعني اصل دي ايام اجازات والناس قال ايه بتخرج تتفسح طب والغلابه اللي زينا اللي اجوازهم بيجروا على اكل العيش ومالهمش اجازات يتسلوا في ايه؟
يا الله اديني بتسلى معاكم والناس لي بعضيها
وفوتكم بعافيه

الاسطوانة!!!

النهارده غلبنى الشوق زى كل يوم حنيت كتير لذكريات (....)اتصلت بتلفون تمحت ارقامه وتحرقت علشان اسمع اسطوانة فارغة بتقلى مفيش حد هيرد... مفيش حد هنا..الغريب انى مشغولة جدا فى حياتى وفكرى لكن بلاقى الوقت الكافى رغم الزحمة ولسه بحن... اكيد الرقم الصعب فهم الحكاية خد بعضو ومشى بقسوة وبسرعة وساب الاسطوانة الفارغة تواسينى ..وتخيلت الرقم بيرد وضحكت وتكلمت وفتكرت ايام حلوة كنت فيها لسه عايشة صداقة وحب وامل ولسه مبقيتش مجرد ذكرى موقعتش تحت ظلم القرار ..لسه مبكيتش من الفراق .
انا مبلومش حد ولا حاجة بس زعلانة من نفسى انى لسه............................................ بسمع ومصدقة الاسطوانة .

ايه اللى بيحصل ده!!ايه اللى انا شايفه ده؟؟؟

ايه يا جماعة بس صلوا بينا على رسول الله ، مش كده يا ام العريف هدى اخلاقك شوية الراجل مش فاهم قصدك ايه!! انتى بس جربى قوليله ايه هو السؤال وهو هيجاوب على طول، وانتى يا مولاتى صحيح هتسيبينا؟؟ ده انتى كنتى مونسانا والله ، ايه هتعيشى في الاسماعليه على طول ولا ايه ؟؟
وانتى يا من ضيع والله عداك العيب وازح اديك مسالم ومستعد لتقديم كافة الخدمات لكافة شئ ،ربنا يعينك على اللى انت فيه وعلى اللى هيحصل فيك .ويجعله عامر

اجري على ايديك ورجليك .. خالتك دوسه بتدور عليك

قلنا اننا منعرفش نلعب شطرنج ، وده مش عيب ولا مخالف للقانون والشرعية الدوليه على ما اعتقد .. ودلوقت كمان بنتنازل عن طاولة الزهر باللي فيها .. خديها يا ست ام العريف غنيمة حرب وابقي علقي عليها الشعارات الرنانة والطنانة والزنانة كمان بتاعتك من امثال تعمل ناضورجي ، اطويك واحطك في درجي .. و اجري على ايديك ورجليك ، خالتك دوسه بتدور عليك .. طب اقول لها ايه دي .. ياعم هي بس تفهمني ايه اللي بتقصده بالكلام اللي بتقوله وانا اديلها اللي هي عايزاه .. المشكله بس انها تقول جملة مفيده افهم منها المطلوب وانا انفذ على طول . عايزه اعتراف باني معادي للسامية مثلا ؟ معنديش مانع .. عايزه اعتراف باني من انصار تحديد النسل ؟ مفيش مانع . هي تكتب الاعترافات اللي هي عايزاها وانا اوقع عليها وانا مغمض ، بس افهم هي عايزه ايه واللي قالته كان معناه ايه . وبعدين انا عايز اسأل هي جارتها وبنتها راحو فين ؟؟؟ كانو شاغلينها عنا ومدينها فروتهم تنتف فيها براحتها ، وهم ما شاء الله فروتهم سميكه اوي والوبر فيها شبرين ، يعني ماده صالحة جدا للنتف ، بس الظاهر على حظنا نتفت فروتهم لحد ما دوبت الجلد ذات نفسه فصعبو عليها وسابتهم في حالهم واتدورت علينا .. والغريب بأه انها بتستنجد بالست الغلبانه مولاتي اللي يادوبك بتدافع عن نفسها بالعافيه ، وبتقول لها انتي خط دفاعنا الاول واوعي يا ابله تمشي وتسيبينا للرجاله الوحشين دول يضربونا .. ذكرتني بأسرائيل لما قلبت الايه وعملت عكس منطق الاشياء وضد الحقائق التاريخيه كلها وبأت هي اللي بتشتكي في مجلس الامن مش العرب ، ومن مين ؟ من الفلسطينين اللي نازله فيهم دبح ليل نهار ، قال ايه .. صواريخهم بتضرب البلدات والقرى الجنوبيه بتوعها !!! بالذمة مش حاجه تضحك ؟؟ تمام ، زي استعانة ام العريف بمولاتي لرد هجوم الرجاله الممثلين بحضرتي !

شيش بيش

ايه الحكايه يا مولاتي انا مش فاهمه ايه اللي هيحصل بالظبط ؟ انتي قصدك انك كنتي مش فاضيه الوقت اللي فات لانك كنتي في اسماعيليه ودلوقتي فضيتي وهتكتبي ولا قصدك هترجعي تاني اسماعيليه ومش هتكتبي ؟ ويا ترى مش هتكتبي ليه وانتي هناك؟ واسماعيليه دي فتره مؤقته ولا دائمه؟
يا ريت ما تبعديش عن المدونه لاني بعتبرك خط دفاع اول ليا في المدونه وما ينفعش تبعدي ابدا
اما عن تعليق مدام\آنسه ذكريات فالمدونه مكان مفتوح للي يحب يتكلم في اي حاجه هو نفسه يتكلم فيها او شاغله باله وكل واحد حر يكتب عن فلان يكتب عن فلانه يكتب تعليق عن حاجه اتكتبت قبل كده براحته اقصد انه مش ضروري كل الكلام يكون خاص بالواحد وبحياته وبمكنوناته الداخليه المنبثقه من البؤره المركزيه للاشعور اللولبي الشبه منحرف والمشتق من الكتله العنقوديه للفراغ الكوني بالعكس الواحد ضروري يشترك مع الآخرين في حواراتهم ومشاكلهم لان ده بيكون احيانا الحل الوحيد عشان الواحد ينسى مشاكله الشخصيه وما يجيلوش اكتئاب وبالعربي كله يدلع نفسه اما الاخ سوسو قصدي من ضيع ولو ان سوسو مش وحش يعني انا ما كنتش اعرف ان الجامعه الامريكيه فتحت كليه جديده متخصصه في اللف والدوران والتتويه لان من الواضح ان البكالوريوس بتاع حضرتك كان في الحاجات دي لانك مصر ما تردش على سؤالي الاساسي والغريب انك كمان مش عاوز تتعداه وتتجاهله وخلاص فا نفهم انك مش عاوز ترد عشان منظرك ما يبقاش وحش ونقول بلاش نحرج الراجل ويبقى زي اللي خد دش بارد ونسيبك في حالك ونعديها لا ده انت بتصر تلف حوالين الموضوع وتنكش فيه وترمي كلام زي الدبش و تقولي قال خانة اليك ؟ يك ايه بس شكلك كده شيش بيش ومش شايف اني اقدر اطويك واحطك في درجي واخسسك النص و تربط بنطلونك بدوباره و كفايه عليك كده وروح احسن خالتك دوسه بتدور عليك

حتوحشيني اوي يا مولاتي

طب وحياة ربنا اني زعلت اوي لما قريت كلام مولاتي .. انا كنت ناوي ارد كالعادة رد جر شكل على كل اللي في سكتي . وكالعادة قريت المواضيع من تحت الفوق ، يعني من القديم للجديد ، بس لما وصلت لمولاتي وقريت انها حتسيبنا وتروح الاسماعيليه فرحت طبعا انها داخله على تجربه جديده وواضح انها بتأمل منها خيرا وانشاء الله تكون فعلا كما تتمنى وانا عارف الاسماعيليه وجمالها وهدوئها وكان نفسي اعيش فيها واقعد كل يوم على شط الكنال اتفرج على السفن الكبيره وهي معديه ، وكمان اخد فلوكه انا وحبيبتي ونضرب بنطه على شط الكنال .. بس اللي زعلني هو ليه مولاتي حتسيبنا ، افهم من كده ان الاسماعيليه لسه ما وصلتهاش الانترنيت ؟؟؟؟؟؟؟ وحتى لو كان المكان اللي حتنزل فيه مولاتي مفيهوش انترنت لاي سبب من الاسباب ، طب الانترنيت كافيز راحت فين يا مولاتي !! والا انتي عملتيها حلوانه في سلوانه يعني بتخلعي مننا بصنعه لطافه ؟؟!! انا شخصيا بالاصالة عن نفسي وبالنيابة عن كافه الزميلات اناشدك العدول عن قرار التنحي عن الكتابة في المدونه والعودة الى اهلك وناسك والى مكانك الطبيعي في صدر المدونه .. وبصراحه عندي احساس قوي بان مولاتي مش حتخيب املي فيها وستنزل على رغبة الجماهير وتعدل عن قرار التنحي . ما هو بيني وبينك العرش ما لوش طعم من غيرك يا مولاتي ، والبلاط كله من غيرك نقلعو احسن ونبيعه كسر . اما عن ذكريات فانا اشكرها على عقلانيتها ودعوتها المخلصة لنبذ الخلافات بيننا ووأد الفرقة في مهدها حتى لا تصبح فتنه تصيبن الذين امنو منكم خاصة . بس فات الست ذكريات ان كل ما كان يدور بيننا من مهاترات لم يكن يعدو كونه ضربا من المشاكسات والمناغشات لاضفاء جو من البهجة والاثارة على المدونة يكسر رتابة الحديث في الخصوص وعن الهموم والاحزان والاحباطات بالذات . واعتقد ان ما كتبته الان وهو ردة فعلي الحقيقية على قرار مولاتي بالرحيل عن المدونه ، وانا صادق فيه كل الصدق ، لهو خير دليل على صحة ما اقول . . وعلى فكره انا ومولاتي كنا اكتر اتنين بنتناقر في المدونة دي .

اما عن الست ام العريف ، فأنا من الاول حاطط ايدي على قلبي وبقول اللهم كف عنا لسان ام العريف .. واذا بتذكرو من يوم ما يسريه اللي ليها على كل بيت في الحتة واجب قالت وا جاراتاه .. انا قلت كله يهون بس اخلع قبل ما تصحالي ام العريف .. واهي صحيت وحتشتغلي في الازرق .. طب يا ست ام العريف ويا استاذ هاني سلامه انا موافق اخليني في السباكه . بس هي فين السباكه دي ؟ ما هو انا اهلي الله يسهل عليهم ويرحم الميت منهم ما علمونيش حاجه اواجه بيها الزمن واكل من وراها عيش .. اعمل ايه ، اصلهم كانو دقة قديمه وتفكيرهم حلزوني على قدهم ، قامو وعلى قد فهمهم دخلوني الجامعه الامريكيه وخدتلي حتتة بكالوريوس لا بيودي ولا بيجيب ولا بينفع ولا بيشفع .. واديني بدفع التمن لحد النهارده .. وياريت الست ام العريف تدلني على الاستاذ هاني سلامة عشان ياخدني من ايدي للعلامة سوسو بلبل الشرابيه اديله حتة البكالوريوس بتاعي يغني بيه في الافراح والموالد والحدائق العامة كمان ، واخد منه السباكة واقول يا فكيك لحسن يرجع في كلامه . على فكره يا ست ام العريف اهلنا زمان لا كانو بيعرفو احنا بنذاكر ايه ولا فين ولا ليه .. ولا بيقولولنا ذاكرو من اصله .. ولما رحنا الجامعه كنا عايشين لوحدنا بعيد عنهم مسافات من بتاعة نادية صالح وشوف سافرو معاك كام واحد ما وحشنا منهم واحد .. بس شوف الحاجه العجيبه بأه والخارقه لناموس الطبيعه وناموس كفر الجبل .. دنت وحشتنا بالذات .. واهي ارزاق .. وياريت حد يشوفلنا الست نادية صالح يمكن يكون معاها هي الاخرى مهنة خياطة ولا ترزي عربي اهي تنفع برضه ، وخليلها الغنا تشبع بيه . وشوفي الصدفه كمان الخارقة لناموس الطبيعه ، انا فعلا ما بعرفش العب شطرنج من اصله ، يعني ريحي دماغك يا ام العريف ، لا بعرف العب مع محترفين ولا مع مبتدئين حتى . بس بعرف العب طاولة زهر .. ايه رأيك ؟؟خانة اليك حلوه ، مش كده ؟؟؟؟

اسماعيليه رايح جاي

إخترت عنوان الفيلم عشان ينطبق عليا هلا يا جماعة أولا ازيكو كلكو وحشتوني ويارب تكونو بخير انا كنت في شغل في الإسماعيليه وهلا هعد فتره هناك عندي حاجه جديده يارب تعجبكو والفتره اللي رحت والله فكرت فيكو وكان نفسي أقرا المدونه واشوفكو كاتبين شو المهم انشغلت وما لقيت وقت أعد عالنت بس هلا هقضي فتره طويله هناك هحاول أتابع المواضيع أول بأول وبتمنى ليكو أيام حلوة وأشوفكو على خير وعارفين حلوة الاسماعيليه هدوء وعجبتني السفن الكبيرة وهي بتعدي منظرها كتير حلو زي تيتانيك هههه المهم ربنا يوفقكو كلكو وأراكم بخير واحنا نتمنى ما يكون حدا زعل منا طبعا كنا بنكتب ونمزح والايام الحلوة على فكره ما بتتعوض وبنفضل فاكرينها ويارب تتعاد ويجي أيام أحسن وأحلا وشكرا يا من ضيع في الأوهام عن كلامك عني والمسامح كريم أنا مش زعلانه من حد بس قلتلك قبل كده اللي ما يعرفك يجهلك

عرب يا رسول الله

فحياتى دخل عنصر قال عايز نبقى صحاب ...والصديقة دى عايزة تبقى صدوقة وداخلة حامى وانا بخاف من الكلام المزوق والحب اللى ملوش داعى ولولا الخطوط الحمرا اللى انا حطاها كانت تلزقلى فى كل طلعة ودخلة يا جماعة قلبى بيقلى النصب دا وراه حاجة بس انا معنديش حاجة معقول تكون شافت فيا صفات يعنى مبهرة تخليها تمتدح فيا طول الوقت وتحبنى بالطريقة دى ولا علشان ظروف حياتها التعيسة جدا بتخليها تدور على حد يساعدها ويشغلها كل الاحتمالات بقلبها فى راسى بس بقيت محبش تكلمنى ولا تيجى بيتناوحلقتلها خالص وهى حاسة وبرضو بتيجى ومبصدق انها تمشي تطورت معايا حالة الهسهس وبقيت بشك انها بعد متمشى بيجرالى حاجة او بيحصل نكد هتقولو طيب خلاص فهميها متجيش تانى هقول انها قربتى ومقدرش امنعها تيجى بيتنا المهم يمكن علشان انا مريت ايام الجامعة بصداقة انتهت بكارثة بيئية ونفسية بحتة كنت تعرفت على صديقة قال ومخلصة جدا لدرجة انها بقت مش عايزة الهوا يجى عليا وتخدنى وتودينى وتجبلى حاجات وانا مبسوطة انها بتحبنى يااااه كل دا انا مبهرة وذات صفات ساحرة تخلى الناس تحبنى كدا وفى يوم حسيت انها بتخنقنى وبتضغط عليا باختصار انهيت صدقتنا ولكن العواقب كانت وخيمة جداعلى اثرها بقيت بخاف من الناس وثقتى مهزوزة ..

فى النهاية احب اقول انى ملاحظة ان المدونة بقت ساحة معارك بين الاعضاء وفقدت معناها الحقيقى وهى الفضفضة عن مشاعرنا ومخاوفنا ومشكلاتنا و توجيه الانفعالات والمشاكل تجاه بعض ونعترض على الرأى اللى مبيعجبناش وننتقد بعض ياريت نهدا شوية ونبدأ من جديد نحكى فى امور اهم من فلانة وفلان قالو انا متاكدا ان جوانا حاجات وافكار اهم من الاعتراض على اراء بعض والتحزب والعنصرية ولا هنعمل زى العرب مفيش مجال للراى الاخر...