زملائي الاعزاء...شكرا

بصوا يا جماعة الخير انا فيا حاجه يمكن ما تعرفوهاش انا وللاسف في بعض الواقف بيبقى رايي شديد التطرف يعني يا ابيض ناصع البياض يا اسود غطيس واللون الرمادي حقيقي بيخنقني ماشي يا سمرا كلامك حقيقي ده دورنا ورسالتنا والجزء الخاص بمسؤوليتنا عن الاسرة وده دور صعب جدا واعتقد ان الاجل لا يمكن يستحمل يعمل اللي احنا بنعمله على مدار اليوم هو بيشتغل في اغلب الاحيان 8 ساعات مثلا بعد كده بيروح يرتاح لكن احنا طول ما احنا صاحيين واحنا بنشتغل و ورانا مسؤوليات في المنزل (انا طبعا بتكلم عن الستات صاحبات الضمير) يبقى بعد ده كله إزاي بس اضاعف الشغل عليا اللي انا اصلا تعبانه منه باني اشتغل بره؟ اي عقل واي منطق ؟ ممكن لو اولادك كبار ومعتمدين على نفسهم ..ممكن لو الحاله مبشبشه وعندك شغاله لكن غير كده يبقى انا مصره ان اللي بتعمل كده في نفسها من غير مساعده نفسيه وفعليه من جوزها يبقى تستاهل كل اللي يجرالها
والى من ضيع لما مرتبها اكبر منه وعايش هو على قفا المدام ما بتشبشبش للي جابوه ليه؟ لو بكل بساطه تخلص منه ما هو لا بيساعد ولا كلمه حلوه ولا ذوق ولا حتى كافي خيره شره وحاطط لسانه في بقه يبقى احسن تخلص من عبئه يا اخواننا هي عايزه من واحد زي ده ايه بس؟؟!! ما تقولوليش ضل راجل بقه.

من ضيع في الاوهام عمره .. موضوعك واقعي جدا

بصراحة موضوعك واقعي جدا، واللى يقول غير كده يبقى عايز ينتقد من أجل النقد، دى فعلاً حياة امرأة عاملة، ومش بس عاملة لآ كمان حياتها الزوجية فاترة، اذا أنا اللى مش بشتغل، صباحي بيكون مٌشابه للى أنت قولتو، لما بصحي الصبح بجرى علي ملى وشي بدخل بسرعة أعمل لجوزى السندوتشات وبعدها أجرى علي غرفة بنتي أصحيها وبعد كده اغسلها وشها وأغيرلها والبسها، يكون جوزي طلع من الحمام، أحضرله الفطار، وافطر البنت ،وبعد كده اجرى اعملها سندوتشات الحضانة ، وكل ده لازم يحصل خلال ساعة او ساعة ونص بالكثير ، ده طبعا بيتخلله طلبات فين الشراب ، الشاي عايز سكر ، البنت تجرى مني وانا بلبسها ، فا انا متخيلة لو فعلا انا بشتغل وهعمل ده كله وبعده هلبس وافطر واجهز نفسي انا كمان ، ده انا كنت اتجنتت، وانا مش شايفة ان الواحدة لما تشوف طلبات جوزها وتكون بتدرس عيالها وتخدمهم انها في الحالة دي بتبقي سيرلانكية او محتاجة تخلع جوزها، ده واجبها ودى حاجة المفروض تخليها فخورة بنفسها، اللي يضايقها فعلا اهمال جوزها ليها المتعمد، مبتكلمش علي انه بيشوف الاخبار الصبح ومش بيساعدها لآن معظم الرجالة كده ، مش هيساعد وهو نازل شغل ولا جاى من شغله .

بصراحة يا ام العريف انتى كنتى متعصبة جدا في ردك على القصة دى ، يمكن لانك مجربتيش يكون عندك مسؤلية الصبح انك تفطري عائلة وتفطرى وجوزك وتكوني مضطرة تنزلي علي شغلك كمان، واللى أيده في المية مش زى اللي أيده فى النار، واللى مايعرفش يقول عدس..واذا احنا يا ستات قلنا على بعضنا كده وكان حكمنا كده علي ظروف بعض ، يبقى الرجالة ليهم حق يدونا بال...... باللي عايزينو بقي.

قالت يا ولدي لا تحزن

النقد عليك هو المكتوب يا ولدي.... رسالة الي من ضيع في الاوهام عمره.. لاتحزن وتشجع ، في انتقادات كثير جايالك بس ده مش معناه انك تُحبط وتبطل كتابة ، احنا مازلنا بنرحب بيك وبمواضيعك ، وزى ما انا قلت قبل كده كل واحد حر يكتب الموضوع اللى هو عايزة ومن حق اى حد انه ينتقد براحته برضة ما دام النقد ده مفيهوش تجريح ، بعدين انت لو كنت قدمت السبت كنت هتلاقي الاحد قدامك ، بس يظهر انك نسيت اول مرة كتبت نقدك فيها انك واقع في مدونة ستات وان كيدهن عظيم ، ولكن معلش انشاء الله مع العـشرة هيحصل هدنة . اما عن رأيى الشخصي في المرأة العاملة ، ف انا على خلاف مع ام العريف ، بس انا مضطرة اقوم دلوقتي ولما ارجع انشاء الله هكمل.

فينك يا مولاتي .. تنازلتي عن العرش ولا ايه ؟!!

صباح الخير يا مولاتي .. انا قريت تعليقك على الجزء الاول من المرأة العاملة ، ولانني رجل ، يعني شديد الذكاء عرفت ليه انتي على طول كده بتخانقي دبان وشك .. انتي اكيد امرأة عامله .. بس والعلم عند الله لسه لم يستعبدك الرجل بمنحك امتياز العمل لزيادة دخل الاسرة وتحسينه .. يعني من الاخر كده لسه ما دخلتيش دنيا .. وبيني وبينك بس من غير زعل ولا شتيمه يعني وما تقوليش على موضوعاتي بايخه ، انتي بالعصبية دي عمرك ما حتدخلي دنيا ولا تعرفي بابها فين .. لا انا مش بفول عليكي ( من الفال وليس الفول ) انا بس بلفت نظرك عشان انتي صعبانه علي ومستخصرك في العصبية .. اصلك بتكتبي حلو ومسلية جدا ، وانا بصراحه زعلت وقلقت لما شفتك اختفيتي كده لعل المانع خيرا .. اذا كان علي انا وموضوعاتي البايخه ما تشيليش هم .. انتي اؤمري وانا اوقف كتابة من دلوقت ، بس ما تهربيش من اول جوله كده وتنسحبي من المدونه .. ارجعي اكتبي وزي ما لاقيتي واحد بينتقد اللي بتقوليه ، بكره يمكن تلاقي ميه يعجبو بكلامك .. وبيكي كمان ياست ولا تزعلي ..

العلبه القطيفه(تعليقا على الجزء الاول من المراه العامله)

انا بصراحه عاوزه اعرف إذا حقيقي في واحده ست عايشه حياه زي كده زي ما صورت القصه انها يعيني طالعان عينيها الاتنين ومش ملاحقه تخدم ولادها ولا جوزها (اللي صورته القصه في دور اقرب ما يكون للكومبارس الصامت ) ولا تنظف بيتها ولا لسه بقى شغلها اللي اكيد همه ما يتلم من ضغط اعصاب ومسؤليه وخلافه...كل ده ليه ؟ ومقابل ايه ؟ لو علشان الفلوس برضه ليه هل جوزها دخله مش مكفي ؟ وإذا دخله مش مكفي ايه السبب ؟هل هي شايفه انه قليل لانه مش مكفي مصاريف مدارس اجنبيه للاولاد وموبايل ليها وللاولاد آخر موديل ويتغير كل كام شهر ومش مكفي إشتراك البيوتي سنتر عشان جمال المدام ومش مكفي قسط العربيه الفور باي فور وقسط الشاليه اللي علي البحر لزوم تصييف الاولاد؟؟ والله لو كان كده يبقى ضروري قى تشتغل عشان يقدروا يجيبوا ده كله بس في الحاله دي يبقى هي اللي جايباه لنفسها واللي بيحصلها ده اقل واجب وحق جوزها يقعد ويحط رجل علي رجل واياكش هي تولع هو ماله ما هي اللي عاوزه كده ولو اني مستغربه لما هي متطلبه كده ما اتجوزتش من اولها ليه رجل اعمال يوفرلها كل ده ؟ ولا هو ده اللي اتقدم ومالقتش غيره؟ اما بقى إذا كانت غلبانه وراضيه بقليلها بس راتب جوزها مش مكفي الاساسيات طيب ليه ما يدورش على شغل احسن ولا يشتغل بعد الظهر اي حاجه ولا بهدلة مراته وفي الحالة دي يا إما هو راجل خسع وبيقبل على مراته البهدله او هو بوروطه مش بتاع شغل طيب برضه الحاجات دي بتبان قبل الجواز يعني خطأ منها في الاختيار من الاول يبقى تشربه وهي ساكته لان محدش ضربها على ايدها عشان تتجوزوا ده غير انها مازالت مستمره في الخطأ بأستمرارها في الجواز من راجل زي ده رأيي تخلعه في ستين داهيه واهي تبقي ريحت نفسها من خدمته اما إذا كان مسكين بتاع شغل وبيحب مراته ومش هاين عليه يبهدلها في الشغل وحاول يلاقي شغل وحظه وحش طيب مش بيساعدها ليه في مسؤوليات البيت والاولاد رغم ان هي بتساعده في المصاريف ؟ ما هو يا عديم الاحساس وواحد زي ده ما يستاهلش اللي بتعمله عشانه يبقى مكمله معاه ليه؟ او بقى هي اللي عودته وتستاهل برضه اللي يجرالها انها ما اخدتش معاه موقف حازم في الموضوع ده يا اما بقى حالها من حال واحده صاحبتي جوزها وصلها لحاله من عدم الثقه بالنفس وانها ماكانتش تستاهله وان الحمدلله انه رضي بيها رغم انه العكس هو اللي صحيح بس مسح المخ بقه وصلها لدرجة انها بتشتغل وتصرف عليه وهو ما بيعملش حاجه تبقى برضه تشرب وهي ساكته او لو هو فعلا الوضع كده يعني وحشه في عين جوزها وهو شايف ان مستواها اقل منه وهي قبلت تعيش معاه على الوضع ده يبقى برضه تستحمل وهي ساكته اما بقى لو بتشتغل عشان بقى تحقق ذاتها والكلام الخايب اللي لا بيودي ولا بيجيب يبقى انا مش عاوزه اكمل حكاية الست دي لان العالم دي بتخنقني وآخر حاجه اقولهالها في كل الاحوال انت السبب الاول والخير في كل اللي انت فيه واشربي وانت ساكته لان اللي زيك هما اللي جابوا الرجاله ورا وعلموهم البلاده وقلة النخوه وابتدت تختفي نظرتهم للمراه على انها كائن لطيف رقيق ناعم اقل حاجه تجرحه ومحتاج لعلبه قطيفه تحفظه ويعامل بمنتهى النعومه وان المراه ملكه في بيتها كلها دلع ورقه ولطافه تأمر فتجاب ولو بعد حين جتكوا نيله جبتونا ورا

المرأة العاملة .. الجزء الثاني

صباح الخير يا اخواتنا .. شوفو انتو عندكن الساعة كام دلوقت وحولوها حسب فروق التوقيت .. انا بالنسبة لي صباح الخير ولسه يادوبك صاحي من النوم .. بس الحمد لله غسلت وشي وفطرت كمان .. ماهو انا مش موظف زي الست ام شيرين مرات سي السيد اللي بتصحى والديك بيدن كوكو كوكو في الفجرية ، مش عشان تعجن لا سمح الله .. لا ده كان زمان .. ايام ستي وستك .. النهارده الحمد لله في مخابز بتبيع العيش جاهز .. يعني الستات ارتاحو من دوشة العجين وهدة حيله ، وكمان من الخبيز ونار الفرن وبهدلته .. وبقت الست معززه مكرمه مرتاحة على الاخر .. طبعا مع توفر الاختراعات الحديثة اللي كلكن عارفينها من التلاجه والبوتجاز للكوفي مشين .. تحمد الست ربنا وتشكر فضله وتهدا وتكن بأه ؟؟ ازاي !! وحريتها ومساوتها تسيبها لمين .. وهدى شعراوي الست الكبارة صاحبة الدعوة النبيلة لتحرير المرأة تموت فطيس يعني من غير هدف ولا ايه !! .. تقوم الست تصر على انها تشتغل زيها زي الراجل .. يقوم الراجل بصفته اكثر خبثا من المرأة في كثير من الاحيان يستغل الرغبة دي عند المراة ويحولها الى ضرورة قصوى والى حاجة اساسية لايمكن للاسرة انها تعيش حياة كريمة من غيرها .. وبكدة يا ستات يا حلوين وقعت المرأة في الفخ .. وعادت عن طريق العمل الى عبودية الرجل من جديد .. راجل مستعبدها في الشغل ، الا فيما ندر عندما تكون رئيستها في العمل امرأة وفي الحالة دي بتكون عبوديتها اكبر واشد قسوة وايلاما .. وراجل تاني .. ايوه سي السيد بعينه .. مستعبدها في البيت .. ازاي ؟ اقولكو ازاي .. بس ياريت اللي لم يقرأ الجزء الاول يرجع يقراه عشان يستوعب الجزء التاني ده كويس . وايضا ارجع والفت الانتباه الا انني لا اقصد نقد المرأة او لومها بما اكتب ، وانما احاول ان الفت الانتباه الى ما قد يكون فاتها عندما وقعت في شرك العمل واصبحت الست الجارية العاملة .. نتوكل على الله ونبدأ استئناف الموضوع من غير زعل انشاء الله ...

يلقي سي السيد الست ام شيرين زوجته على باب المؤسسة التي تعمل بها كما يلقي كيس مهملات ويندفع في طريقه الى عمله من جديد والشر بيطق من عينية .. اصله الست ام شيرين اخرته .. معلش الفولت بتاعها كان واطي النهارده وطاقتها الانتاجية لم تكن في عنفوانها .. تدخل ام شيرين الى المؤسسة وتتصنع ابتسامة لا لون ولا طعم لها علها تغري المسئول عن سجل توقيع الموظفين حضورا وانصرافا يغض الطرف عن تاخرها بطريقته الخاصة .. تصل الى مكتبها فينظر اليها رئيسها في العمل نظرة اعتادت ان تفهم معناها .. ويزفر زفرة تسمعها بكل حواسها ، وتكاد يلفحها لهيبها وهو يقول .. مفيش فايدة .. وهي ولا كأنها سمعت حاجه .. رائحة الفول والطعمية تنبعث من الغرفة المجاورة .. تتذكر انها لم تتناول الافطار بعد .. تتبع الرائحة كما يتبع الفأر جيري رائحة الجبن الى مصدرها في افلام الرسوم المتحركة .. يهتف الزملاء والزميلات عندما يروها .. اتفضلي ، بسم الله .. ويستمرو في عملية الوهم المتبدد والموجهة اصلا الى مقولة اللقمة الهنية بتكفي ميه .. هو معرفش في انهي زمن كان ده ، بس هي على اي حال مجاملة والسلام .. الست ام شيرين العاملة تفلت ببضع لقيمات يقمن اودها الى حين العودة الى البيت .. قال يعني الخروف المحشي مستنيها في البيت .. تمضي الست ام شيرين الى روتين عملها اليوم .. اوامر متلاحقة من السيد المدير .. مضايقات لا تنتهي من الجمهور واحيانا من الزملاء .. وايضا بعض الغزل والتحرش الذي يصل الى حد السماجة احيانا .. ومعلش يا بت استحملي .. اكل العيش عايز كده .. يدق جرس هاتفها المحمول .. هو مش جرس بصراحه بس جرت العاده اللغوية على تسميته جرس .. الادق هو ، يغني هاتفها المحمول فترد من فورها على سي السيد وقد عرفت رنته بالطبع .. يقول بطريقة استفزازية ساخره .. الكفتة اللي عملتيها للغداء بالطحينة ولا بالطماطم .. تكتم ام شيرين غيظها وترد بهدوء .. يا حبيبي ما انت عارف اني امبارح بالليل ما لحقتش اعمل حاجه .. يادوبك غسلت وكويت بعد ما درست العيال ونضفت المطبخ ، وعلى ما حضرت جدول المدرسة ورتبت الشنط كنت خلاص استويت ونمت مكاني .. يقاطعها سي السيد قائلا .. مفهوم مفهوم .. حفظنا الدرس من زمان .. يعني اجيب معايا حاجه جاهزه للغدا ولا علب السردين والتونه ماليه البيت .. بنفس الهدوء تجيبه .. اللي انت عايزه يا حبيبي بس ارجوك انا عندي شغل ومش لاحقة .. يقول بغضب وهو ينهي المكالمة .. طيب ياوزيرة اللي هو .. ادي اللي احنا ماخدينه من شغلك ..
تبتلع ام شيرين الاهانة وتواصل العوم تحت اكداس الملفات التي يجب الانتهاء منها اليوم .. يمضي يوم عملها كبقية الايام .. نفس المنغصات ونفس المعوقات ونفس الرتابة وهدة الحيل كمان .. ينتزعها من غياهب الاستغراق في العمل غناء هاتفها النقال من جديد .. يا الله .. انه هو .. كم الساعة الان .. يبدو انني نسيت نفسي .. تفتح الهاتف في اضطراب وتقول فيما يشبه التوسل والرجاء .. معلش يا حبيبي الشغل كبس علي ، انا نازله حالا .. ما ان تصعد الى السيارة حتى يبدأ موشح انا في انتظارك مليت ويضيف عليه سي السيد هذه المرة صب جام غضبه ولعناته على اليوم اللي سمح لها فيه بالعمل .. وتهديد بان يكون هذا الشهر هو خاتمة الاحزان .. اقصد خاتمة تاريخها النضالي في العمل .. تتشاغل ام شيرين عنه بمداعبة الاولاد والسؤال عن كيف كان يومهما المدرسي .. يستمر الموشح مسافة لابأس بها من الطريق ثم يسود صمت مطبق لا تقطعه سوى زفرات سي السيد التي تعبر عن ماهو واقع تحت نيره من ظلم شديد وعدم استمتاع بالحياة .. ولا حتى لقمة هنية .. او اي لقمة والسلام بس تكون سخنه وطرية ..
في البيت تلقي ام شيرين بحقيبتها حيثما اتفق وتهرع الى المطبخ تخرج علب السردين وتسخن الخبز وتعد وليمة الغداء فسي السيد لم يسمح وقته بشراء طعام جاهز .. سي السيد يدخل مباشرة الى الحمام ليزيل عن بدنه وعثاء الطريق والعمل في ذلك اليوم المكفهر القائظ الحر .. شيرين واحمد في غرفتهما يحاولان تبديل ملابسهما . . الغداء يصبح جاهزا وسي السيد منتعش تماما بعد الدش الساقع الذي تنعم به .. يجلس الى المائدة بينما تبدل ام شيرين للاولاد ملابسهما وتحضرهما معها لتناول الغداء .. ما ان تجلس الى المائدة وتمد يدها الى الطعام حتى يبدأ سي السيد موشح ظلموه .. يعني الواحد لو اضطر يعمل عملية في بطنه الدكتور لازم يلبس بدلة غوص .. اصله حيلاقي نفسه فجأة في بركة سمك سردين .. انا مش عارف الرجاله بتتجوز ليه .. ولا يمكن مش كلهم زيي .. اكيد في منهم بيعرفو يعني ايه طبيخ وشوربة ومحمر ومشمر والحاجات دي يعني اللي كنا بنسمع عنها ايام الستات اللي كنت محترمه نفسها وقاعدة في بيوتها تشوف شغل بيتها ومصالح عيالها وجوزها .. الى هنا وانقطع الاستقبال عند الست ام شيرين .. طفح الكيل .. القت باللقمة التي في يدها وهبت واقفه وهي ترغي وتزبد .. واللهي العظيم ما انا واكله .. هو كل يوم سمة بدن بالشكل ده .. يعني الحق علي اللي بشتغل وبطفح الكوتة عشان اساعدك في المصاريف .. قاطعها صائحا .. حيلك حيلك .. تساعدي مين .. هو انا اشتكيتلك .. طب ايه رايك ما نتيش رايحه الشغل من بكره .. دنتي اصلا اللي بتكسبيه من الشغل بيروح على لبسك ومكياجك يا هانم .. حمي الوطيس فانسحب احمد وخلفه شيرين الى غرفتهما واغلقا الباب ليتركا حلبة الصراع خالية الا من المتصارعين .. لم تشأ ام شيرين ان تصعد الموقف وذلك من واقع خبرتها الطويلة في مثل هذه المواقف .. وكالعادة حطت همها في تنظيف البيت .. بدأت برفع الاطباق عن المائدة حتى وسي السيد لم ينته من طعامه بعد ، ما دفعه الى القاء ما بيده من خبز على الطاولة بعنف والانصراف الى سريره يتمدد عليه كعادته بعد الغداء يشاهد التلفاز استعدادا لنومة القيلولة .. اما الست ام شيرين فقد بدأت برنامجا تحفظه عن ظهر قلب .. تنظيف المطبخ .. لا ليس تنظيف المطبخ بل تجميع الاواني والاطباق في الحوض تمهيدا لتنظيفها فيما بعد .. والانتقال الى الحمام مع شيرين واحمد لياخذ كل منهما دش كل يوم .. ومن ثم العودة الى المطبخ ومنه الى بقية ارجاء المنزل .. وهكذا دواليك ..
وللحديث بقية ....

التكرار يعلم الشطار!

قال التكرار يعلم الشطار قال ، كلام فاضى ، وبالذات مع الرجالة اى والله، بجد الواحد مش عارف يقول ايه ، سبحان الله فعلاً ، تفتكروا هما بيكونوا اتعلموا وبيطنشوا ويعملوا اللى فى دماغهم برضة ولا مساكين واحنا اللى ظالمينهم وهما مبيكونوش واخدين بالهم.؟؟!!

بجد انا مش عارفة اقول ايه غير اني حاسة ان راسي هتفرقع من الغيظ ، مش عايزة اقول حسبي الله ونعمة الوكيل علشان محدش يجرالو حاجة بس هقول ايه طيب ... هقول منه له ..منه له

وقال على رأي المثل ، تيجي تصيدو يصيدك ، والمعني في بطن الشاعر، والشاعر لازم يبقى همه علي بطنه .

المرأة العاملة (الجزء الاول)

في البداية عايز اوضح حاجه مهمه يمكن تخلي الستات تهدى وماتدورش الضرب على طول من غير لا احم ولا دستور .. انا لا اعني النقد ولا اظهار عيوب السيدات بهذا المقال .. كل ما ارمي اليه هو لفت انظارهن الى حقائق على ارض الوقائع لو انهن انتبهن اليها لكان رايهن هو نفس رايي .. تمام كده ؟ يعني مفيش ضرب انشاء الله ؟ توكلنا على الله .

المرأة العاملة يا اخواتنا ، الشرقية بالطبع ، هي مثال حي على كون المرأه الشرقية تعشق تعذيب الذات وتشتري بعبوديتها للرجل حرية زائفة لا معنى لها .. ازاي ؟ اقوللكم ازاي .. ربنا فتح عليها واتوظفت زي ماهو كمان متوظف .. خلينا ناخد يوم من حياتهم ونشوف .. يادوبك الديك يأدن كوكو في الفجرية ، تفز من نومها مفزوعه زي اللي قرصتها عقربة وجري على اودة العيال .. اومي يا شيرين ، قوم يا احمد .. ياللا يا حبيابي مفيش وقت .. وتتركهما بعد الانذار الاول وتهرع الى المطبخ تضع ابريق الشاي على النار وتخرج اللبن من الثلاجه وشوية الجبنة والمربى والذي منه وتلقي بربطة الخبز على الطاوله ثم تعود مهرولة الى غرفة نوم الاولاد .. انتو لسه ما صحتوش .. يالله بأه بلاش دلع اتاخرتو عالمدرسه .. ياللا ياوله بلاش لكاعه .. وتجذب احمد خارج الفراش ، فتشتري شيرين نفسها وتزيح الغطاء بعيدا فتطمئن الام العاملة الى ان كل شئ يسير حسب الخطه .. تعود مهرولة الى المطبخ لتغلق البوتجاز فالماء في ابريق الشاي يغلي .. تعد الشاي وتضعه على الطاوله وترجع ثانية الى غرفة الاولاد ، وبدون اي كلام تشد شيرين واحمد من زراعيهما الى الحمام ليغسلا وجهيهما وينظفان اسنانهما ويقضيان حاجتهما اذا لزم الامر .. تتركهما بسرعه بعد ان يكون سي السيد قد اصدر صوتا هو في الواقع اعلان عن استيقاظه من النوم .. تنشغل باعداد قهوة الصباح له .. في هذه الاثناء يكون احمد قد بلل ملابسه بالماء وهو يحاول غسل وجهه .. تصيح شيرين الفتانه باعلى صوتها .. الحقي يا ماما ، حمادة غرق نفسه .. تركض الى الحمام تبدل لاحمد ملابسه كاملة .. ينادي سي السيد طالبا القهوة .. تترك احمد وشيرين وتعود الى المطبخ لتصب القهوة وتحملها الى سي السيد ثم تعود الى احمد وشيرين وتصحبهما الى غرفتهما ليرتديا ملابس المدرسة . تخرج لهما الملابس المطلوبة من الخزانة ثم تعود الى المطبخ لتعد الافطار .. يصبح الافطار جاهزا على الطاولة .. تهرع الى غرفة الاطفال .. احمد لا يزال بالملابس الداخلية .. اصلة ما بيعرفش يلبس .. ماشي .. البس يا احمد وخلصني على الصبح .. يصبح احمد جاهزا للخروج .. يسبق امه الى المطبخ ريثما تمشط لشيرين شعرها .. تعود الى المطبخ ويجلس الجميع الى مائدة افطار الصباح وفيروز تغني سالوني الناس عنك يا حبيبي .. اين حبيبها ؟ يالله يا سي السيد الفطار جاهز .. يقطع سي السيد دندنته امام المرأه وهو يسرح شعره تارة الى اليمين وتارة الى اليسار .. يصيح بكل الحماشة التي في الدنيا .. طيب .. احمد يرفض اخر لقمة وراسه والف سيف انه شبع خلاص .. يترك المطبخ ويركض الى الصالون ليشاهد التلفزيون وتلحق به شيرين .. لم يبق على موعد الخروج من البيت سوى ساعة واحدة .. تركض الى غرفتها لتبدأ في ارتداء ملابسها .. تتذكر انها لم تغسل وجهها بعد .. تتجه الى الحمام فترى ان سي السيد قد انتهى من افطاره .. تعرج على المطبخ لتزيل بقايا الطعام وتعيد بعض الاطباق الى الثلاجة والبعض الاخر تلقي به في حوض المطبخ .. تهرول الى الحمام تغسل وجهها .. تتذكر انها لم تعد سندوتشات الاولاد بعد .. تنادي على سي السيد وتطلب منه ان يساعدها باعداد السندوتشات ريثما ترتدي ملابسها . يصيح سي السيد بعدم اكتراث وهو يحدق في التلفزيون ويرتشف ما تبقى من كوب الشاي .. استني بس تخلص الاخبار . . اية اخبار هذه التي يمكن ان تنتظرها .. تعود وهي نصف عارية الى المطبخ .. تعد السندوتشات وتضعها في حقائب احمد وشيرين ثم تركض الى غرفتها لتكمل ارتداء ملابسها .. يبدأ سي السيد في التململ .. ينظر الى ساعته .. يرفع عقيرته بالصياح .. وينك يا ست .. مش باقي غير نص ساعه انا نازل اسخن السيارة .. تهتف كالغريق من تحت الماء .. طيب خد الاولاد معك الله يخليك .. لحظة صمت ثم ياتيها صوت انفجار من الصالون .. كيف بدي اخدهم .. احمد لسه حافي .. هاتيهم معك يا ستي . تصمت مغلوبة على امرها وتكمل مايمكن ان يطلق عليه مكياجها مجازا .. يعني على راي اللي قالت ، فرشه كده وفرشه كده .. تخرج الى الصالون وهي تلهث .. تمسك بحذاء احمد في يدها وحقيبتها وحقيبته في اليد الاخرى وتحاول ان تمسك بيد احمد فلا تستطيع .. تعطي الحذاء لشيرين وتشد احمد من يده ثم تغلق الباب وتهرول الى المصعد .. السيارة تقف على باب العمارة في انتظارها .. سي السيد يجلس خلف مقعد القيادة ودخان سيجارته يتصاعد كمدخنة كبابجي عندما تكون اللحمة كثيرة الدهون . تفتح الباب الخلفي وتدفع بشيرين واحمد الى داخل السيارة . تجلس في المقعد الامامي وتستدير للخلف لتمسك بقدم احمد وتلبسه الحذاء .. ينفث سي السيد دخان سيجارته بغضب واضح قبل ان يندفع بالسيارة بعنف يوحي بعدم رضاه عن الدنيا كلها .. يصيح في وجه زوجته .. يعني مفيش فايدة .. عمرك ما حتظبطي موعد الخروج الصبح .. لازم كل يوم تاخرينا .. عيشه تطهق .
تحدق المرأة العاملة في وجه زوجها وتهمس لنفسها .. يا فتاح يا عليم يارزاق يا كريم .. تمضي السيارة في طريقها وفيروز تغني .. بكتب اسمك ياحبيبي عالحور العتيق .. تكتب اسمي يا حبيبي عرمل الطريق ..
نواصل غدا انشاء الله

وعايزها محافظ ولا شيكات؟

ده جزء من اغنيه في فيلم مولد يا دنيا المفروض ان عفاف راضي عامله جنيَه ومحمود يس طالب فلوس فبتقوله وعاوزها محافظ ولا شيكات..اما اللي فكرني بالاغنيه دي هي اني زهقانه وانا ما بزهقش غير من حاجتين المرض بعيد عنكم وقلة الفلوس اصل انا احسن فسح عندي هي حاجه من الاتنين يا نسافر نقعد يومين تلاته في فندق او منتجع سياحي على البحر والموضوع ده بيبقى بالكتير مرتين في السنه عشان ظروف عمل جوزي اما بقي الفسحه التانيه اللي ممكن تعيد الى وجهي الابتسامه والاقي الدنيا ربيع والجو بديع ومحلاها عيشة الفلاح هي الشوبينج ايوه الشوبنج ثم الشوبنج ثم الشوبنج انشالله حتى لو ما اشتريتش حاجه ليا واشتريت لبنتي بس او حاجه للبيت ياااه اد ايه بانبسط وبحس براحه نفسيه والصعب بيهون وبتقبل كل حاجه مهما كانت صعبه وهنا انا ممكن اقول لجوزي على نقطة ضعف فيا ممكن يستغلها انه لو عاوز يبلغني بأي حاجه وخايف من ردة فعلي او عاوز يطلب اي طلب ومتوقع رفضي انا انصحه انه انسب وقت هو وانا راجعه بعد رحلة شوبنج حتى لو قالي مثلا حبيبتي انا اتجوزت عليكي ..صدقوني ردة فعلي هتختلف تماما لو كنت لسه راجعه من الشوبنج او بقالي فتره محرومه منه
اللهم دم علينا نعمة الشوبنج واحفظها من الزوال يا رب

وقوع البلا ولا إنتظاره

يا اخوانا انا جالي الهسهس خلاص في دماغي مع انفصام كتاتوني وهلاوس سمعيه وبصريه انا قاعده بعد الدقايق وكل شويه اقول دلوقتي هيرن الجرس والاقي بنت الجيران في وشي ويا سلام بقى لو الجرس ضرب فعلا بابقى مش عارفه اعمل ايه ولا اروح فين ولا اجي منين انا بقالي يومين مش بطلب دليفري(يا فرحة جوزي) وده لاني خايفه لما الدليفري يجي هيرن الجرس طبعا وانا بقى إش عارفني ده اللي انا طالباه ولا بنت الجيراان؟؟؟
هتقولولي بصي من العين السحريه.. فالحين اوي قال يعني انا مش عارفه الحل ده هو حل غير مجدي (بضم الميم) وده لان بعيد عنكم ورغم ان المثل بيقول العين ما تعلاش على الحاجب إلا إن العين عندي عليت مش بس عن الحاجب عني انا كلي اي نعم انا قصيره وازعه بس مش كده يا اخواننا الرحمه حلوه يا سلام صحيح الطول هيبه والقصر خيبه والطويله تقضي حاجتها والقصيره تقف فوق ترابيزتها المهم وبفرض اني جبت كرسي ولقيت بتاع الدليفري هبله انا بقى افتحله بالبساطه دي ما يمكن البنت واقفه وراه ..وبعدين اعمل ايه ؟؟ انا النهارده ربنا سترها معايا ان الباب ضرب وجوزي موجود حيث جاتلي الحاله وبقيت رايحه جايه وبهلوس واقول بنت الجيران بنت الجيران فراح مكبر في ودني وقاري عليا عدية يس فابتديت افوق وقلت انا فين خير اللهم اجعله خير ..قالي روحي افتحي الباب ولو طلعت هي قوليلها اني نايم ومش هينفع تلعب مع بنتي عشان ما يعملوش دوشه ودخل وخد بنتي معاه عشان ما تشبطش في بنت الجيران والحمد لله عارفين طلع مين الراجل السكره محصل الكهربا وتلاقي الراجل استغرب إشمعنى المره دي مقابلاه بالترحاب وكمان اديتو بقشيش محترم ياللا مش خساره فيه حلاوه إنقشاع الغمه
وفوتكم بعافيه

كله ضرب مفيش شتيمة؟؟

هو احنا ليه لازم كل يوم نعمل غدا لرجالتنا ؟؟ ليه ماينفعش منعملش اكل من غير ما يبقي ضميرنا مئنبنا؟ يا سلالالالالالالالالالالام نفسي كده يبقي عندي طباخ وهو يعمل كل حاجة، ده طبعا في السرايا بتاعتنا لان عندى هنا فى البيت مفيش مكان ليا انا وجوزى اساسا ما بالكو بقى لو جبنا طباخ كمان ، والخوف انى لما اجيبه هنا جوزي يطردنى ويخليه هو!!!

نفسي كده اصحي الصبح من غير ما اطلب الاقي جاتلي صنيه زى الافلام كده وفيها فطار مرة اوريانتل ومرة الاسمو ايه ده الثاني اللي هو اسمه .....ايوه اسمه كونتينتل، ومعاه عصير برتقال

وبعد كده انزل اسبح في البسين واقرا شوية كده اى حاجة (علشان الفيلم بس) وبعد كده اقعد شوية اعمل تان ، وبعدين ادخل اشوف ايه اخبار الاكل والتنظيف علشان برضة جوزي لما يجيى ميلاقيش الحكاية كده ماشية سبهلاله....

اعوذ بالله من الشيطان الرجيم ... انا كنت بحلم يظهر ولا ايه شايفة نفسي كاتبه طباخ وفيلا وحمام سباحة ،،، يااااه ده كان كابوس ،الله يباركلك يا بنتي صحتيني من الكابوس الفظيع ده ، الحمد لله .

اقوم بقي علشان اعمل الغدا و اعمل اكل بنتي وبعدين اطلع البطاطين المنقوعة في البانيو واطلع الهدوم اللي في الغسالة وبعدين انشرهم وبعد كده اعمل كيك لزوم الحلو وبعد كده احمي البنت وبعدين الاعبها شوية برضة حرام وبعد كده انيمها بقي وبعدين اشوف جوزي عايز يتعشي ايه وبعد كده ....... سلامو عليكو

كــوز دره ( حلوة يا بلدي )

تعـرفو امبارح كنت بشتري حاجات من السوق انا وصحبتي المهم شفت بتاع الدرة وجه في نفسنا زي كل الناس ناكل دره قلت هشتري 5 بالعدد ليا واخواتي فالبيت المهم يا فرحه ما تمت جينا ندفع فقلنا بتاع الدره الخمسه دول بـ15 جنيه كوز الدرة ابو جنيه ب15 جنيه يا سلالالالام المهم مش دا اللي زعلني اللي زعلني اكتر واكتر بقى انا وصحبتي كان في بنات واقفين وست كبيرة بيشترو سألتهم بكام ( الدرة ) فضلو يبصولنا وكانو احنا مخلوقات غريبه نازله من الفضاء لأ وشارين دره زينا بس بسعرها الحقيقي واسألهم تاني يا حجه بكام الدرة لا مجيب ،يا بنات يا عالم يا هوووووو ان حد يرد علينا أبدا باصين واتخرسو فجاة ولا عايزين يردو ولا يعملو عمل خير لوجه الله رحت راميه الدرة ومشيت وقلتلو والله ما انا واخده حاجه مش عايزة ان شالله ما اكلتها والله مش عشان الفلوس عشان الموقف والناس اللي واقفه ولم تحرك ساكنه عارفين مشيت اقول لصحبتي الساكت عن الحق شيطان اخرس ودول كده شايفيييين هي الناس جرالها ايه يا ناس وجت في بالي اغنيه حلوة يا بلـدي المهم ركبنا التاكسي وبنتكلم فالموضوع راح الاخ السواق طبعا لازم يشاركنا الحديث قلني ركبو معاه سعوديين واشترو ازازة خمرا ب1000 جنيه قلتلو وهي الدرة زي الخمرا ايش جاب لجاب والله هو مش كل مره بيحصلي كده بس دا موقف من المواقف الطريفه وبصراحه لحد هلا نفسي بالدره بس تخافوش عليا هجيبها اسيبكو تفكرو كده براحتكو ونروح نشوف اللي ورانا واللي قدامنا وهغني حلوة يا بلدي ....

السلام عليكم

فينكو من الصبح وانا بحاول اكتب ما فيش فايده مش عارفه شو المشكله كانت
المهم عاملين ايه النهاردة اكيد زي كل يوم مع شوية تغيير يعني وبعدين عفكره حابه اقول حاجه صحيح برحب بكل حد عايز يضيف حاجات جديده ومعلومات جديده بس بصراحه مش بنكتب احنا كلام عشان حد يجي ينتقدنا ويقلنا رأيو في كل واحده فينا مع اني ضحكت جدا عكلامك بس هو دا اللي كنت بتكلم في ان الناس بتحكم من غير ما تعرف الشخص واحنا مش بنكتب عشان حد يعلق علينا ممكن نقول رأينا بكل صراحه بس مش لازم الكلام اللي مالوش لازمة احنا عايزين نسمع بعض ونكتب كل اللي بنفسنا ونعرف رأي الناس وطبعا اكيد في رجاله مقهورة وابدا احنا ما جبناش سيرت فرق بين راجل وست احنا بنحكي بشكل عام بالعكس بقى انا مؤيده للراجل كتير وبقول ان الرجاله ليه طريقه عشان تتعامل بيها وتكسبها واكيد كل انسان لي طريقه تعرف توصلو بيها وتتعامل معاه وما عجبنيش كلامك لما قلت عن كلامي عن الحب ان ولا عمرو هيجي بالخناقه هو مين اتخانق وانت شو عرفك فيا عشان تحكم عليا بالعكس كنت بوضح حاجات بنشوفها مش شرط ليا انا ممكن حصلت حوليا ولا انتو ما بتصدقو تلاقو حاجه تنتقدوها احنا كده بنحب وما بنصدق نعد نقول عيوب بعض وننتقد بعض والله مش مستعده اعد انتقد حد خلاص بستوعب كل واحد كما هو وممكن اقول حاجه مش عجباني في وخلاص او ابعد عنو لو مش قادره اتفاهم معاه وكمان مره ما بنفرقش بين راجل وست احنا بنكتب مواقف من الحياه بتحصل وكل واحد بيعبر بطريقتو واهلا وسهلا بالضيوف الكرام راجل وست بنت وشاب وهستنى اي رد حلو منكو ووحش كمان بكل ترحاب والحمدلله اليوم حالتي احسن عشان كنت قلقانه على اخويا والحمدلله اطمنت عليه هروح اشوف شغلي وارجعلكووو

الي من ضيع في الاوهام عمره,يعني لو جرالك حاجة يبقي مش احنا السبب

يا استاذ ياللي ضيعت في الاوهام عمرك... اولا نشرنا لتعليقك ده اعتقد كده انه دليل كافي ووافي علي اننا بعيدين كل البعد عن التعصب الانثوى وعلي اننا جنس لطيف وظريف ومستعد دايما للحوار ، بس انا شايفة انك كنت قاسي شويتين علي مولاتي ، ليه تحكم عليها انها بتتخانق ومعرف ايه وانت متعرفش اى حاجة عن ظروفها ؟ده بدل ما تواسيها وتجبلها عصير ليمون تقوم تكتبلها كلام يفور دمها بزيادة!!!

اهو انتو كده يا رجالة لما بتيجو تكحلوها بتعموها ،ثانيا .. حبي لمزمز مش محتاج كلام ولا كتابة ،حبي ليه باينله من غير اى حاجة ،و مسألة غزة اللي مشوفتوش منها حاجة تبسط ف دى مسألة نسبية مينفعش كل الناس تجمع علي حب حاجة واحدة ، وعلي رأي المثل لولا اختلاف الاذواق لبارت السلع والنسوان كمان... وحبي واشتياقي ليها مفيش حاجة تقدر تغيرو لآنى قضيت فيها احلى ايامى واعز اصحابى هناك.
اما عن كلامك عن ام العريف فاعتقد انها ردت ،وردها كان كافى ووافى

وعلي العموم شكرا لمشاركتك معانا ومستنين تعليقك على مواضيعنا القادمة انشاء الله

يا من ضيعت في الاوهام عمرك

ايه يا بلدينا انت حد مسلطك علينا ولا ايه ؟ يكونش اجوازنا سلطوك تسخنا عليهم قوم تاخدنا الجلاله ونعيش الدور بتاع المساواة وحقوق المراه واغسل مواعينك واعمل شاي ليا وليك قوم يلاقوا سبب وجيه يخلصوا مننا عشانه؟؟ لااا ده بعدهم ولا انت عاوز تضيعنا احنا كمان في الاوهام؟ ولا اوهام ايه زمان اوهام نامت من بدري
على العموم اقتراحك ليا باني اماطل على ما ينام مش فعال بنسبه عاليه لان ممكن الطوبه تيجي في المعطوبه ويفضل صاحي مستني كباية الشاي اقوله ايه ساعتها معلش اصلي بعت اجيبلك شاي ام حسن الزرده اللي هي؟؟ وبعدين برضه ده جوزي حبيبي ابو عيالي اللي ياما بيجيبلي يعني ما يغلاش عليه كبايه شاي حتى لو كانت في آخر الليل ومش هتتشرب(كلمتين عشان نربي العيال)
وعلى العموم انا عن نفسي برحب بيك وضيع ولا يهمك ما حدش واخ منها حاجه

انا ناقص يا خويا

سبحان الله في طبع الناس تصوروا يا اخواننا واحنا في زمن العولمه والنت وحيث اصبح العالم قريه صغيره آه والله قد خربتها بحيره اللي مش على الخريطه تصوروا لسه في ناس اي والله ناس زينا كده بيتلصصوا علي جيرانهم واول ما يسمعوا صوت في الشارع يبصوا يشوفوا مين اللي جه ومين اللي خارج ولوحده ولا معاه حد وجاي محمل ولا إيد ورا وإيد قدام ولو جايب يا ترى حاجه حرزانه ولا ياما جاب الغراب لامه؟!!
على فكره الكلام ده مش من وحي خيالي ولا حاجه اقتبستها من مسلسل الساعه 8 ولا انا بهلوس لا انا بكامل قواي العقليه والكلام ده حقيقي وساكن تحتي في الدور الاول ايوه هو كائن زينا لكن هل بتفكر زينا ولا لأ ده اللي بشك فيه , جارتي المصونه يا اخواننا حقيقي بتعمل كده وهي مش ست كبيره في السن دي في اوائل الثلاثينات ومش وحيده دي متجوزه وجوزها مش مسافر ولا حاجه وعندها طفلين كمان يعني اللي زيها بيستأجر حد عشان يهرشلوا من كتر ما هو مش فاضي وعلى فكره هي بتقول انها بتشتغل مصممه لموديلات اثاث وعندها ورشة وكمان هي بتسوق وعندها عربيه يعني من الآخر عندها كل حاجه تخليها ابعد ما تكون عن اللي بتهببه ده ... كنت بلاحظ عليها موضوع الحشريه ده بس وانا مالي بعد كده بقت بتتصل تسألني عن وصفات اكل مع انها عمرها ما داقت طبيخي ولا تعرف إذا كنت شاطره في الطبخ ولا لأ بس ما يهمش بعد كده اشتغلت في السلف ده بقسماط لزوم البانيه وده زعتر لزوم التتبيل وده بقدونس اصل اسم النبي حارسه جوزها ما بيحبش البابا غنوج غير بيه وده شنيور عشان تعلق لوحه قلت زي بعضه الجيران لبعضيها حتي حدثت الطآمه الكبرى........... حيث انها بعد ملاحظه ومراقبه دقيقه ليا على مدار الساعه تحققت من اني قاعده معظم الوقت في البيت فقررت التالي توفر مصاريف حضانه بنتها وتبعتها عندي قال ايه عشان تلعب مع بنتي مع العلم انها مشتركه في النادي الخاص بمنطقتنا ومعاها عربيه يعني لو عاوزه تفك عن نفسها وعن الاولاد تقدر بكل بساطة تاخدهم وتروح ده غير انها بتروح كتير لوالدتها وزي ما عرفت منها ان الاولاد ليهم اصحاب هناك من سنهم ده غير ان اولادها معظم الوقت بيلعبوا تحت من لما كان الولد عمره 3 سنين والبنت سنتين يعني الاولاد مش مكبوتين يعيني ولا ناقصهم لعب عشان تزقهم عليا بس هي قالتلك بيبي سيتر مجاني..... اول مره كان من حوالي اسبوع اتصلت واستاذنت ان بنتها تيجي تلعب مع بنتي قلت مش مشكله وما حطيتش في بالي وما توقعتش انها تبقى عاده لكن للاسف كنت غلطانه لانها اتصلت تاني يوم رغم انها عارفه ان جوزي موجود فاعتذرتلها وقلت احنا رايحين الدكتور كمان ساعتين تقوم تقولي طب البنت هاتيجي نص ساعه بس فصممت على الاعتذار فقررت بينها وبين نفسها ان انا ما بتوراش عين والذوق ما بينفعش مع امثالي وتاني يوم يادوب الشغاله مشيت والبيت زي الفل وداخله احمي بنتي تحت شعار النظافه للجميع الاقي الباب بيخبط بافتح الاقي المزغوده بنت المزغوده من غير بقى لا إتصال ولا غيره آه هو في بينا الكلام ده خلي البساط احمدي وطبعا البنت ابتدت تاخد راحتها وتطلع على الكنب وتطلب شيكولاته وترفع شعار قطعه واحده لا تكفي وطبعا بنتي اخت دور تابعه قفه وعاثوا في الشقه فسادا لما كان هيجيلي انهيار عصبي شويه واتصلت الهانم تقولي نص ساعه كده ونزلي البنت تتغدى شويه واتلككت لبنتي على غلطه وروحت قال يعني بعاقبها باني اخلي بنت الجيران تروح.
اليوم ده نامت بنتي حوالي 2 ونص الفجر لان جالنا ناس واتاخروا وجوزي كان مسافر الساعه 6 ففضلت صاحيه لغاية ما مشي على الساعة 12 الظهر صحيت على جرس متواصل فتحت لقيتها هي برضه بنت واكله ناسها قلتلها ان بنتي نايمه ما استوعبتش قلتلها ابقي تعالي بعدين قامت نزلت الغريب ان الام برضه لا اتصلت ولا اعتذرت ان بنتها صحتني ولا اي حاجه....النهارده بقي برضه واحنا لا بينا ولا علينا الجرس ضرب ما اديتش خوانه وفتحت برضه لقيت البنت لا وايه بعد شويه جه اخوها يقولي اخليها تتصل بي مامتها حاجه غريبه جدا دي بتوفر مكالمات دي ولا حكايتها ايه ؟ طب ما تتصل هي ببنتها
شفتوا بالذمه غلاسه وسآله وسماجه اكثر من كده ؟؟

رضينا بالهم والهم مش راضي بينا

نفسي اعرف وافهم مين بيجري ورا مين احنا بنجري ولا الزمن بيجري ولا العمر بيعدي واحنا واقفييين مكانا وهما الناس ليه بقو شرانين زيادة عن اللزوم قصدي محترمين جدا لا وكمان بقو بيفهمو بكل حاجه وكلهم فلاسفه يعني الواحد بيحب بيسمع الناس بس يا خسارة دلوقتي كلو بدو يحكي وما حدش بيحب يسمع اصلو كلو عندو خبره واتولدو بيفهمو بكل حاجه ولو قالو ما نعرفش او سكتو هاي عيبه في حقهم والله عني لو حاجه ما بفهمش فيها او ما عندي رأي افضل السكوت بس بيفتكروني ما عنديش رأي ولا يمكن بيفتكروني ما عنديش شخصيه هو كده انا طبعي كده وبحب كده وما عنديش اللا كده على رأي نيكول بس هي بطريقتها وانا بطريقتي بيني وبينكو انا زهقت ولازم اشوف حل هو الحمدلله الواحد راضي عن حياتو بس بردو لما يشوف بلاوي حواليه ما بيعرفش يسكت وبيقول ليه حظو كده ( الحمدلله والشكر لله)بس رضينا بالهم والهم مش راضي بينا ولا شغل نافع ولا سفر نافع ولا حتى حب لاسمح الله حب ليه هو اظاهر الحب بقى ينقي الناس كمان يمكن احنا مش من مقامو والله ادينا عايشين وبنحاول ونشوف نصيبنا والحياة دي هتوصلنا لحد وين أكيد كل خير

كباية شاي الليل وآخره

والله بيشرب نصها احسن ما يسيبها كلها وقال إيه بحجة انه بيحب يشرب الشاي دافي فيفضل سايبه وكل شويه افكره بيه وفي الآخر الشاي بيثلج بيبقى آيس تي ويا إما يتدلق يا يضطر يشربه من كسوفه ويا سلام بقى على كباية شاي الليل وآخره ودي بيطلبها وهو نايم بلبل واحلف له ميت يمين انها مش هتتشرب وابدا يصمصم على رايه وطبعا مش محتاجه اكمل بيكون ايه مصير الكبايه دي.
ويا بختك يا سي مزمز ويا كل راجل بيصحى الصبح يلاقي الفطار معمول والشاي كمان يا سلاااام تفتكروا لو سميت نفسي مزمز ممكن حد يعملي الفطار ؟؟ يا حلاوة يا ولاد ده يبقى يوم المنى اصل انا بصراحه ما حدش عملي حاجه اكلها لما اصحى قبل كده غير لما كنت قبل سن 8 سنوات ايام الشغالات الفلبينيه والهنديه والسيلانيه او في كل يوم جمعه في الفترات اللي كان بابا معانا فيها حيث طبق الفول اللي هو ولا تقولي شبراوي الكوربه ولا جاد ولا الجحش بتاع السيدة زينب (شي لله يا امو هاشم) الله يمسيك بالخير يا حج ولا يصبحك ما هو دلوقتي وش الصبح عنده.
تخيلوا انا لغاية دلوقتي واهي داخله على 4 العصر ما كلتش غير زبادي بالخوخ آه والله اصل الواحد لما بيلاقي انه هيقوم يعمل اكل لنفسه نفسه بتتسد ده غير بقى شغل البيت اللي وراكي يالله على العموم لازم ادرس جديا مشروع تحويل اسمي لمزمز.
نفسي حد يقولي طريقه اقنع بيها بنتي الصغيرة انا ليه بضحك لوحدي وانا قدام الكمبيوتر ؟ لانها كل ما بتسمعني بضحك بتسيب اللي في ايدها وتيجي جري تبص علي الكمبيوتر مش بتلاقي حاجه لانها لسه صغيره ما بتعرفش تقرى فتفضل تسالني انا ايه اللي بيضحكني؟ وهو صحيح هو ايه اللي بيضحكني اما غريبه صحيح!

شاى و حليب ولا شاى بلبن؟؟!!!

اتفضلو معايا ..بسم الله ،

اصلي قاعدة بفطر بقسماط وشاي بحليب،قصدي شاي بلبن علشان خاطرك انت بس يا مزمز (ده اسم الدلع بتاع جوزي) ، نرجع لمرجوعنا كنا بنقول ايه !!؟؟ أه افتكرت كنت بقولوكو اتفضلو معايا بسم الله حاجة علي ما قُسُم ..

النهاردة صحيت زي ما بصحي كل يوم ،عملت اللي بعمله كل يوم ، قمت عملت سندوتشات لمزمز( مش بعايرك والله ) وعملته سندوتش للفطار وكوباية شاى ،اى نعم هو بيسيب نصها مش بيشربوا بس مش مشكلة، بيفكرني بماما كانت كل يوم الصبح تصحي وهى في السرير تقولنا اعملولى شاى بحليب وتنام!!! و ياويلنا يا سواد ليلنا لو معملنهوش ، أى نعم هى برضة كانت بتسيبو جمبها لحد ما يتلج ولما تصحى بجد تخلينا نسخنو ثانى بس كان لازم ننعملو ،ولحد دلوقتي محدش عرف ايه هو سر الشاى أبو حليب اللي كان لازم يبقى جمبها وهى نايمة و يُعاد تسخينة مرة ثانية لما تصحى!!!!

ويبقى السؤال حائرا ً.

يسعدلي ايامك

انا خلاص خلوصت يا بيه قصدي خلصت اللي ورايا كنست وغسلت وشفط التراب من الانتريه وحميت العيال وخيطت الهدوم وقلت القسم وحييت العلم واديني جيت اهو مع اني نسيت انا جايه ليه اصلا!!! آه افتكرت انا كنت باتكلم عن تغلب الواحد على مشاكله انا مثلا كان عندي مشكله مع جوزي ما زالت قائمه وهي انه مش منضبط في مواعيده يعني ابقى عاوزه اروح لماما مع العلم إني بروحلها تقريبا في الشهر مره او لما الامور تبقى هاصت على الآخر اروحلها كل اسبوعين وده لاني قال إيه براعي ظروف جوزي فهو شايف انه والدتي ساكنه بعيد والطريق بياخد ساعه بالعربيه وعشان يوصلني يوم اجازته يبقى هيوصلني في ساعه وهيرجع البيت في ساعه وبعد كده يجي ياخدني في ساعه ونرجع البيت في ساعه يعني هيضيع 4 ساعات وهو سايق واليوم اللي كان هيرتاح فيه اتحول بسببي ليوم شقى وعذاب مش بذمتكم وليه مفتريه وظالمه(اللي هو انا) ؟؟ طيب ماشي خليها في يوم يكون عندك شغل فيه يقول ما هي هي ما انا معظم شغلي نواحي بيتنا ..!! طيب اروح لماما إمتى؟ يقول لما يكون عنده شغل جنبها طيب ماشي يخرج ويقولي هاجي اخدك على الساعه 12 الظهر مثلا تتحول 12 دي ل 2 او 3 واحيانا 4 طبعا بروح مش بالحق اقعد ما الواحد معاه عيال صغيره وبيناموا بدري..مع العلم ان ماما ما غيرتش مكان سكنها من ايام ما كنا مخطوبين وكان يوماتي يجيلي مرتين على رأي اغنية عبد المطلب ده انا فاكره مره جالي الساعه 2 الفجر عشان يديني كلكس تحت البيت ويمشي
ومواعيده كده بقه على طول يقولي انا جاي الساعه 9 ما يجيش قبل 1 يعني فرق التوقيت عنده 4 ساعات اعمل ايه انا بقي ؟ كنت بقعد كثير اتكلم معاه واحاول الاقي حلول لكن ما فيش فايده وكنت بانفعل وافرقع من الغيظ وبزعل وبيجيلي اكتئاب دلوقتي انا بقيت اتكيف مع المشكله دي يعني عاوزه اروح لماما اخد تاكسي ..استناه بليل لو ما جاش بعد ساعه من معاده بدخل انام اما بالنسبه لمشكلة عدم تواجده معظم الوقت في البيت واذا جه بدري في يوم بياخدها نوم او يتفرج على التليفزيون لانه عاوز على قولته يريح وانا ليل نهار مرزوعه في البيت فبقيت وقت ما انا زهقانه اخلص شغل البيت وانشالله اروح ساعتين عند صاحبيتي اللي ساكنه جنبي وكده نفسيتي هديت كثير اوي عن الاول الحمد لله
وفوتكم بعافيه

صباح الخير يا مولاتي

لا يا مولاتي ده اللي انا بتكلم عنه كل واحد عشان يبقي مبسوط في قاعده اساسيه للرضا انه يبقى مبسوط بنفسه كده زي ما هو واللي عاجبه كده عاجبه واللي مش عاجبه ما يعرفناش والواحد يبقي لطيف مع كل اللي حواليه وظريف لكن مش لازم يجاري الجو طالما الجو مش عاجبه الجو ده وطالما الجو اللي حواليه ضد مبادئك واخلاقك واللي يقول يقول دقه قديمه دقه بالفلفل دقه زار دقي يا مزيكا ماحدش له عندك حاجه والمهم احترامك لنفسك وان مايجيش يوم تعملي حاجه تحسي انك نادمانه عليها وعلي فكره لسه في ناس في الدنيا محترمه ومش كوول

؟؟؟كلام

مرحبا جميعا

انا نفسي اكتب ومش بس اكتب واتكلم كمان بس طبعا عايزة وقت اكون فاضيه في ومخي رايق وحالتي احسن من هلا عشان انا هلا تعبانه ومش في نفسيه تسمحلي اكتب حاجه عشان الواحد لما يتكلم وهو زعلان او تعبان ما بيكون في حالتو الطبيعية ،،

في حاجات كتير اتخلينا عنها في حياتنا مش عارفه شو السبب بصراحه احنا ولا الظروف الا خليتنا نتخلى عنها بس طبعا في ناس صعب انها تتخلى عن مبادئها او حاجت اتربت عليها بس للاسف انا شايفه ان الشاطر هلا اللي يببقى ماشي مع الموضه وبيجري ورا الخدع والتزييف اكيد مش الكل طبعا بس الاكتر اللي بتخدعهم المظاهر والنفوذ ويبقى coooool بصراحه انا نفسي اكون cool ما بعرفش اصلي بحس شويه مش مهم يلا لأ والغريبه ان لازم تكون كمان روش يعني تتقبل اي حاجه قدامك كانت صح او غلط وما تعترضش على حاجه لو اعترضت يبقى انت ايييييييه ؟ دقـه قدييييييييمه ولسسسسه هنشوف كفايه عليكم كده انا قلتلكم حالتي ما تسمحش اني اكتب هكتفي هلا وهكتب تاني لما اكون cool عشان بتكون حالتي احسن من كده واقدم كل ما في فايده وادينا بنفضفض

الحياة حلوه

آه والله حلوه بس نفهمها اوقات ببقى متضايقه وزهقانه ومخنوقه وعاوزه اولع في اول حد ييجي في سكتي ومين فينا مش بتجيله الحاله دي شئ عادي وبيحصل للكل لكن بصفه عامه انا بشوف ان لكل داء دواء ولو الواحد مش حاسس برضا عام عن نفسه وعن حياته طول الوقت يبقى لازم يكون فيه تغيير فوري في حياته يا إما يحصر مشاكله اللي هي السبب المباشر في إحساسه بعدم الرضا ويحاول يحل المشكله بكل الوسائل او بأه لو مالهاش حل خالص يحاول يتكيف معاها وده كلام مش نظري ولا حاجه لأني شخصيا جربته ووالله إنه نفع كان في اكثر من مشكله في حياتي منغصين عليا عيشتي وحاولت احلهم ما إتحلوش تكيفت معاهم وانا دلوقتي مبسوطه الحمدلله وعال العال عقبال السامعين والقارئين وهبقي احكي بالتفصيل اكثر في المره الجايه عشان عندي غسيل وكنس مع إن الشغاله لسه ماشيه
فوتكم بعافيه

نهار جديد ولكن......

صباح الخير...

النهاردة يوم جديد ,ممكن يكون بداية جديدة لآشخاص كثير,ويمكن يكون يوم ميلاد اشخاص اكثر,ولكن بالنسبة ليا النهاردة يوم زي كل الايام , يمكن الجو مختلف النهاردة حر شوية ,هي دي الحاجة الوحيدة اللي حاسة انها متغيرة النهاردة ,انما كل شئ زي ما هو السكون اللي في البيت بالرغم من دوشة بنتي اللي عمالة تجري وتلعب بكل حاجة , وبالرغم من ام وليد (الدادة) اللي عمالة تخبط في المواعين في المطبخ, ولكن انا ....سامعة كل ده ومش سمعاه, يظهر ان الواحد لما بيفضل يسمع ويعمل نفس الحاجة كل يوم من غير تجديد بيبتدي احساسة بيها يقل شوية بشوية لحد ما بيبطل يسمعها خالص في النهاية , معقول!! ممكن ان الروتين في الحياة يوصل الانسان لانه يفقد حواسه بالشكل ده؟؟ حتي بأقرب الناس ليه؟ اعتقد ان كل شئ جايز,وعلي رأي المثل كل شئ جايز حتي جواز العاجايز , كان المثل ده دايما لما بتيجي سيرته بيغظني, ايه يعني لما العجايز يتجوزو يعني ,هما ملهمش نفس , بالعكس دول اكثر ناس محتاجين ونس وان يكون معاهم شريك حياة يونسهم في الايام السودة اللي احنا فيها دي اللي العيال فيها مبيسئلوش عن اهلهم ولا كأنهم خلفوهم وربوهم ...هيييييييييه يالا ملناش دعوة دع الخلق للخالق.... نرجع لمرجوعنا ,النهاردة انا صاحية عايزة اتكلم عن غزة اللي هي محافظة في فلسطين (اصل في كثير بيعتقدو انها علي كلامهم حته في ليبيا!!!)

غزة .... ناس كثير عايشين هناك ونفسهم يهجو منها , كل ما تكلمي حد يقولك ( والله الواحد زهق حياته وبدنا نسيب هالبلد) بس المشكلة انه لو ساب البلد اسبوعين بالظبط هيحس انه مش طايق نفسه وعايز يرجعلها ثاني ,يعني علي رأي الفنانة والمطربة اللي انا بحبها جدا بصراحة شرين اللي قالت ,يمكن ناسي لآنك فيها مش وحشاك ولا غبت عليها ,بس اللي مجرب وسايبها(زي حالاتي) قال في الدنيا مفيش بعديها) اي والله يا شرين...

عارفين ايام كثير لما بيهب عليا هوا بارد بشم في ريحة هواها بسرح وبفتكر ,بفتكر كل حاجة ,كل ايامي هناك حتي الايام الوحشة كانت حلوة ,بفتكر لما كنت بصحي الصبح افتح ستارة غرفتي ويملى الغرفة نور الشمس وهوا البحر,ولما بجري علي غرفة الصالون افتح شبابيكها واشوف شروق الشمس ونورها الاحمر اللي انعكس علي السحاب ورسم احلي صورة ,ولما بفتح الراديو واسمع صوت فيروز وهي بتغني نسم علينا الهوا,ولما كنت بدخل اعمل نسكافيه وافتح شباك المطبخ ويهب عليا منه ريحة القهوة اللي تخليك نفسك تشربها حتي لو مبتحبهاش... بفتكر كل حاجة ,يمكن في ناس في نفس ظروفي راحو عاشو في غزة وكانو نفسهم يمشو منها ويرجعو يعيشو في مصر,وناس اكثر لو سألتهم ايه رأيكم فيها هيقولولك نطيق العمي ولا نطيقهاش... بس انا مش عارفة ايه سر ارتباطي بيها للدرجة دي , مع اني طول عمري كنت عايشة في مصر , عيشت فيها 14 سنة تقريبا و روحت هناك وانا كبيرة في 2 ثانوي , انما قدرت اتكيف مع العيشة هناك بطريقة غريبة وحبيت البلد هناك جدا لدرجة اني مبقتش عايزة ارجع مصر ثاني.. يمكن انا مش مشتاقة للبلد نفسها , يمكن اكون مشتاقة لشبابي اللي عيشتو هناك , ولجمالي اللي كنت حاسة بيه هناك , ويمكن مشتاقة لللمة والعلاقات الاجتماعية اللي كانت اقرب لللاسرية,, ممكن , ممكن اكون ملخبطة بين اشتياقي لكل الحاجات اللي انا فقدتها هنا وكانت عندي هناك, وبين اشتياقي للبلد نفسها ,زي ما قلنا كل شئ جايز...

والبقية تأتي