لو ما كنتش حريف شطرنج

يبدو ان الاخ من ضيع مالوش في الشطرنج وحب يخلع من اللعبه لما لقى نفسه اتورط وبيلعب مع محترفين مش هواة فقام بصنعة لطافة عامل قال ايه مش فاهم الكلام ونظام سعاد نصر الله يرحمها لما مره كانت في مسلسل كان لما جوزها يسألها عن حاجه مش عاوزه تجاوب عليها تعمل نفسها فقدت الذاكره وجالها زهايمر وتقعد تقوله: هااه مين معاياااا؟
وانا عاوزه حد واحد بس يقولي ان كلام من ضيع في الاوهام صحيح وان كلامي مش مفهوم
على العموم هنعديهالك المره دي يا من ضيع وهقولك زي هاني سلامه في فيلم اصحاب ولا بزنس :يا اخ سوسو يا بلبل الشرابيه سيبك من الغنا وخليك في السباكه احسن محتاجالك

سببان وجيهان ..

انا المره دي اتأخرت عليكو مكرها لابطل . . ولتأخري سببان وجيهان .. الاول هو انني اضعت عنوان المدونة كما اضعت في الاوهام عمري ، اصله الكمبيوتر بتاعي حب يتعنطز حبه ويسوق دلاله قام معرفش عمل ايه في العناوين كلها ، الظاهر زهق من اللعبة دي قام قالب الطاولة وقال مش لاعب . اما السبب الثاني فهو انني ما خليتش متحف ولا عالم اثار ولا حتى مرشد سياحي الا ولفيت عليه ووريته اللي قالته الست ام العريف ، ان حد يقوللي ايه اللغه دي ، ابدا . لا هي سنكسريتيه ولا اشوريه ولا سيريانيه ولا مسماريه ولا حتى هيروغليفيه . في الاخر رجعت وامري لله اسألها هي يمكن تحن علي وتفهمني ايه اللي قالته .. انا بصراحه مفهمتش ، مين اللي يعترف بايه ومين اللي يكش ملك وليه .. كل اللي قدرت افهمه من واحد نجار غلباوي افتى بان دي لغة مسماريه بس قديمه اوي وبطلت موضيتها ، ان الحكاية فيها محكمة ومتهم واعتراف ، وقاللي انه يعرف محامي خلع فتك اوي وخلاصه وممكن يطلعني من القضية زي المسمار من اللوح ، يعني يسحبني من وسط الستات اللي اني واقع بينهم زي الشعرة من العجينه . قلتله ياعم انا لا عايز محامي ولا وكيل نيابه ، انا اروح لام العريف بنفسي اخلص الموضوع معاها ، واذا الحكايه على لقب الجلالة بتاع مولاتي انا خلاص ياستات ماليش دعوة ، تسمي نفسها مولاتي ولا حتى كسرى انو شروان ، انا ما ليش دعوة وكل واحد حر في اسمه . عموما انا مش عارف هي تعبانه من الاسم ليه ، يعني فاكره انها لو غيرت اسمها من مولاتي لجاريتي حتى ، شخصيتها حتتغير مثلا ؟ ما اعتقدش ، حتفضل برضة واقفالي على الواحده ونعمل انا وهي فريد شوقي ومحمود المليجي . الا على فكره ، هي ما عدتش تكتب ليه ؟ شكلها كده كانت متأجره المقالين اللي كتبتهم ولا مستلفاهم من حد ، ولا يمكن هم دول الكلمتين اللي حفظاهم . طب معلش يعني الجيران لبعضيها واحنا ولاد منطقه واحده ، يعني ممكن اغششها في اي موضوع عايزه تكبته وما اقولش لحد .. احنا برضه ستر وغطا على بعضينا . بس هي تقول سلفني موضوع والا اتنين وانا على طول فريره . اصله بصراحه شكلها وحش كده وهي بتكتب تحت الهوا ، يعني مش على الهواء مباشرة . عموما خلي سمرا وام العريف ينفعوها .. شبكت معايا في معركة غير متكافئة واهم ما حدش فيهم دافع عنها بكلمة ولا حط في عينه حصوة ملح وسلفها موضوع تنشره بدل الاحراج اللي هي فيه . هم الستات كده ، من اول الست ام شيرين المرأه العاملة لحد الفت بتاعة الكشري .. مين الفت بتاعة الكشري ؟ الست اللي بتقف على عربية الكشري جنب بتاعة الدرة المشوي اللي اشترت منها مولاتي كوزين ، ايام ما كان ليها سنان وبتاكل دره مشوي .

كش ملك

تحياتي للجميع وحشتوني كلكم يا جماعه انا غبت الفتره اللي فاتت وماحشنيش عنكم إلا الشديد القوي انا اصلي كنت تعبانه شويه وكنت بدخل كل فتره اتابع اللي بيحصل في المدونه لكن ماكنتش بقدر اقعد اكتب ولما كان في حاجه بتستفزني اني ارد عليها بلاقي فورا مولاتي جزاها الله كل خير ردت عني وقالت كل اللي عاوزه اقوله وزياده واحب اقولك يا مولاتي اوعي تغيري اسمك وبالعكس شكرا لسمرا انها اقنعتك بعدم تغيير الاسم انت مولاتي وتاج راسي
واحب ابارك لام علي على انها قامت بالسلامه ويتربى المولود في عز والديه اما عن من ضيع في الاوهام بالنسبه لرأيه في الخلفه احب افكره برأيه هو برضه يعني مش رأي حد غيره لما كان بيعلق على اننا كنا زعلانين وكان بيقول اننا بنعلق زعلنا مره على اهلنا ومره على اجوازنا وانه اكيد احنا متحملين جزء كبير من اللي احنا فيه ده إذا ماكناش كمان احنا السبب الرئيسي فيه وبالتالي وبناءا عليه يبقى لو ده رأيه في الخلفه يبقى هو السبب في الرأي ده او متحمل جزء كبير من المسؤليه عن وصوله للرأي ده ما هو يا كده يا إما يتنازل عن اننا إحنا السبب في النكد ومتحملين جزء كبير من المسؤليه شوف بقى انت مستعد تطلع غلطان في اي راي فيهم كش ملك ودلوقتي جه دورك

ذو العقل يشقى في النعيم بعقله ...

بصراحة انا مابحبش افتح المدونة دي يومين ورا بعض والاقي نفس العنوان في وشي . والمشكلة اني بفتحها في اليوم على الاقل خمس ست مرات على امل اني اشوف حاجه جديدة ، لكن لا حياة لمن تنادي .. يعني مفيش فايده اسرح وامرح انا لوحدي في المدونة واكتب اللي انا عايزه .. مش اشكال ، انا سيد مين كتب . بس بيني وبينكو في اشكال صغير كده وهو اكتب ايه !! اصلي انا بحترم كلام مولاتي جدا وبعمل بنصحيتها ميه ميه . هي قالتلي ما تكتبش الا اللي تفهم فيه ، طب انا اعرف اللي بفهم فيه واللي ما بفهمش فيه ازاي ؟ انا عايز حد يساعدني ويقوللي انا بفهم في ايه عشان اكتب فيه .. ما حدش بيعرف اللي الواحد بيفهم فيه اكتر منه هو شخصيا !!! مين قال كده ؟! ده كان زمان ياعم ، اما دلوقت في مولاتي بتفهم ايه اللي بيفهم فيه الواحد وايه اللي مابيفهمش فيه اكتر منه هو شخصيا . لا وايه ، كمان بتعرف ايه اللي الواحد جربه وايه اللي ما جربوش ، يعني مش ناقص الا تكون حكيم عيون وبتفهم في العين . ياسيدي ما علينا ، اللهم لا اعتراض ، خلي جلالتها تقوللي انا بفهم في ايه وانا اكتب فيه على طول . وطبعا شكلها بعد الكلمتين اللي كتبتهم دول حتقوللي اني ما بفهمش في اي حاجه ، ولا حتى في قواعد الجرجير والفلفل الرومي واصول المسقعه اللي بالفاصوليا . ساعتها بأه حقفل المدونة المظلومه دي وامشي ولما ستاتي الافاضل ييجي على بالهن يكتبن اي حاجه ، ابقى ارجع . بس اقول لكو حاجه قبل ما امشي . بغض النظر عن رأي مولاتي ، انا بفهم في التحليل النفسي وممكن اكتب المره الجايه في موضوع ، ليه مولاتي سمت نفسها مولاتي ، واثر هذه التسمية على شعورها بالعظمة والجلالة واستخفافها بعباد الله . حلو الكلام ؟!!! انتظرونا